قازاقستاندىق رەجيسسەر تۇسىرگەن فيلم يتالياداعى فەستيۆالدە باس جۇلدە الدى
استانا. KAZINFORM - قازاقستاندىق رەجيسسەر اسحات كۋچينچەرەكوۆتىڭ «باۋىرىنا سالۋ» فيلمى يتاليانىڭ يسكيا ارالىندا ءوتىپ جاتقان 23-شى Ischia Film Festival حالىقارالىق كينوفەستيۆالىنىڭ باس جۇلدەسىن جەڭىپ الدى.
اتالعان تۋىندى «ۇزدىك تولىقمەتراجدى فيلم» نوميناتسياسى بويىنشا جەڭىمپاز اتاندى. فيلم قازاقستان مادەنيەت جانە اقپارات مينيسترلىگىنىڭ جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن.
ەستەرىڭىزگە سالا كەتەيىك، بۇعان دەيىن كارتينا Asia Pacific Screen Awards-تاعى ەڭ ۇزدىك جاستار فيلمى اتاندى، ازەربايجانداعى Baku International Film Festival دوداسىندا دا باس جۇلدەگە يە بولدى. فرانسياداعى Cinema Heritage Festival بايقاۋىندا ارنايى ماراپاتقا يە بولدى.
وپەراتور جاناربەك ەلەۋبەك Asia World Film Festival-دا «ۇزدىك وپەراتور» نوميناتسياسى بويىنشا توپ جاردى. سونىمەن قاتار فيلم رەسمي تۇردە قازاقستاننان «شەت تىلىندەگى ۇزدىك فيلم» نوميناتسياسى بويىنشا «وسكار-2025» سىيلىعىنا ۇسىنىلدى. 22-شى حالىقارالىق «دۋح وگنيا» كينوفەستيۆالىنىڭ باس جۇلدەسىن جانە باسقا ءبىرقاتار ماراپاتتى يەلەندى.
فيلمنىڭ سيۋجەتى ەجەلگى قازاق ءداستۇرى بويىنشا اجەسىنىڭ تاربيەسىندە بولعان بالانىڭ وقيعاسىن باياندايدى. اجەسى ومىردەن وتكەن سوڭ بالا اتا-اناسىنا ورالىپ، جاڭا ورتادا بەيتانىس ادامدارمەن قارىم-قاتىناسى قيىندايدى.
ق ر مادەنيەت جانە اقپارات مينيسترلىگىنىڭ باسپا ءسوز قىزمەتى ءمالىم ەتكەندەي، 2003 -جىلى نەگىزى قالانعان Ischia Film Festival - ەۋروپاداعى ەڭ كوركەم جانە ەرەكشە فەستيۆالدەردىڭ ءبىرى. ول ورتاعاسىرلىق اراگون سارايىنىڭ اۋماعىندا وتەدى.
فەستيۆالدىڭ باستى ەرەكشەلىگى - كينونىڭ كورنەكى ورتاسىنا جانە ءتۇسىرىلىم ورىندارىنىڭ كوركەمدىك رولىنە نازار اۋدارۋ. سونىڭ ارقاسىندا ءاربىر فيلم مادەني جانە تابيعي كەڭىستىك كونتەكستىندە قاراستىرىلادى.
ايتا كەتەيىك، قازاقستاندىق رەجيسسەر اسحات كۋچينچيرەكوۆتىڭ «باۋىرىنا سالۋ» فيلمى وسكارعا قالاي ۇسىنىلعانىن جانە تۋىندى نەلىكتەن الەمدىك ۇزدىك كارتينالار تىزىمىنە ەنۋى ءتيىس ەكەنى بەلگىلى بولدى.
