قازاقستاندىق كومپانيا ەكى ۇشاعىن ساتىلىمعا شىعاردى
الماتى. قازاقپارات - 2019 -جىلعى ۇشاق اپاتىنان كەيىن قىزمەتىن توقتاتقان Bek Air كومپانياسى ەكى Fokker-100 ۇشاعىن ساتىلىمعا شىعاردى.
ساۋدا-ساتتىقتىڭ ەلەكتروندى الاڭىندا جاريالانعان اقپاراتقا سايكەس، ساتىلىمعا شىققان Fokker-100 ۇشاقتارىنىڭ تىركەۋ نومىرلەرى: UP- F1018 (1991 -جىلى شىعارىلعان) جانە UP- F1019 (1990 -جىلى شىعارىلعان).
لوتتىڭ باستاپقى باعاسى - 104,4 ميلليون تەڭگە، ال ەڭ تومەنگى باعا - 67,9 ميلليون تەڭگە. ساۋدا 26 -ماۋسىم كۇنى ساعات 11:00-دە وتەدى. ۇشاقتاردىڭ كەدەندىك بەرەشەككە بايلانىستى شەكتەۋى بار.
اۋە كومپانيانىڭ مالىمەتىنشە، اتالعان ەكى ۇشاق 2019 -جىلدىڭ جەلتوقسان ايىنان بەرى پايدالانىلماعان جانە ولارعا تەحنيكالىق قىزمەت كورسەتىلمەگەن.
اۆياتسيالىق تەحنيكانى جوندەۋ جانە قىزمەت كورسەتۋ بويىنشا شەتەلدىك كومپانيالاردىڭ قورىتىندىسىنا سايكەس، 2019 -جىلدان 2025 -جىلعا دەيىنگى ارالىقتا ۇشاقتارعا ءتيىستى تەحنيكالىق قىزمەت كورسەتىلمەگەندىكتەن ولار جارامسىز كۇيگە تۇسكەن. ۇشاقتاردىڭ جارامدىلىعىن قالپىنا كەلتىرۋ ءۇشىن اگرەگاتتار مەن توراپتاردى، بورتتىق جۇيەلەر مەن اۆيوندىق جابدىقتى تەكسەرۋ جانە اۋىستىرۋدى قوسا العاندا، اۋقىمدى جۇمىس اتقارۋ قاجەت.
الدىن الا ەسەپتەۋلەر بويىنشا، ءبىر Fokker-100 ۇشاعىن قالپىنا كەلتىرۋگە 2- 2,6 ميلليون ا ق ش دوللارى كەتەدى.
ەسكە سالايىق، 2019 -جىلدىڭ 27 -جەلتوقسانىندا الماتىدان استانا قالاسىنا ۇشىپ شىققان Bek Air كومپانياسىنىڭ ۇشاعى راداردان جوعالىپ كەتتى. كەيىن 95 جولاۋشىسى جانە 5 ەكيپاج مۇشەسى بار ۇشاقتىڭ اپاتقا ۇشىراعانى ءمالىم بولدى.
ۇشاق جەرگە قۇلاعان سوڭ سىرعاناپ بارىپ اۋەجاي اۋماعىنا جاقىن تۇستاعى اۋىل شەتىندەگى ەكى قاباتتى ۇيگە سوعىلعان. سالدارىنان 12 ادام قازا تاپتى. وسىدان كەيىن Bek Air اۋە كومپانياسىنا تيەسىلى توعىز Fokker-100 ۇشاعىنىڭ قىزمەتى توقتاتىلدى.
2024 -جىلى الماتى ماڭىندا اپاتقا ۇشىراعان Bek Air ۇشاعىنا قاتىستى تەرگەۋ اياقتالدى.
اۆتور
دوسبول اتاجان
