قازاقستاندىق كاسىپكەرلەر شياندا 98 ميلليون دوللارعا كەلىسىمشارت جاساستى

استانا. KAZINFORM - شيان قالاسىندا وتكەن ساۋدا ەكونوميكالىق ميسسيا قورىتىندىسى بويىنشا قازاقستاندىق كاسىپكەرلەر $98 ميلليونعا كەلىسىمشارت جاساستى، دەپ حابارلايدى ق ر ساۋدا جانە ينتەگراتسيا مينيسترلىگىنىڭ باسپا ءسوز قىزمەتى.

وتكەن جىلدىڭ قورىتىندىسى بويىنشا قازاقستان مەن قىتاي اراسىنداعى تاۋار اينالىمى 6,8 پايىزعا ارتىپ، $43,8 ميللياردقا جەتتى. وتكەن جىلى ش ى ۇ سامميتىندە ەكى ەل باسشىلارى بۇل كورسەتكىشتى $80 ميللياردقا جەتكىزۋ مىندەتىن قويعان بولاتىن.

2024 -جىلى قازاقستان مەن قىتايدىڭ شانشي پروۆينسياسى اراسىنداعى ءوزارا تاۋار اينالىمى $382,3 ميلليوندى قۇراپ، وتكەن جىلدىڭ سايكەس كەزەڭىمەن سالىستىرعاندا ($157 ميلليون) 2,4 ەسەگە ارتتى.

قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى ارمان شاققاليەۆتىڭ شانشي پروۆينسياسىنىڭ اكىمشىلىك ورتالىعى شيان قالاسىنا بيزنەس-دەلەگاتسيانى باستاپ بارۋى - وڭتۇستىك- شىعىس ازيا باعىتىنداعى ەكسپورتتىق جولدا ماڭىزدى كولىك-لوگيستيكالىق توراپ بولىپ سانالاتىن شانشي پروۆينسياسىمەن ساۋدا- ەكونوميكالىق جانە ينۆەستيتسيالىق ىنتىماقتاستىقتى ودان ءارى تەرەڭدەتۋگە ىقپال ەتتى.

ساپاردىڭ ءبىرىنشى كۇنى، 1-ساۋىردە، ق ك پ پارتيا كوميتەتىنىڭ حاتشىسى، شانشي پروۆينسياسى حالىق وكىلدەرى جينالىسىنىڭ ءتوراعاسى جاو يدەمەن كەزدەسۋ ءوتتى.

«شاڭحاي ىنتىماقتاستىق ۇيىمىنىڭ وتىرىسىنان كەيىن ارىپتەسىممەن بىرگە بۇل ماقساتقا قالاي قول جەتكىزۋگە بولاتىنىن تالقىلادىق جانە بىرلەسىپ پاراديگمانى وزگەرتۋ قاجەت دەگەن ورتاق شەشىمگە كەلدىك. تەك ساۋدا-ساتتىقپەن عانا شەكتەلمەي، ينۆەستيسيالارعا دا كوڭىل ءبولىپ، بىرلەسكەن وندىرىستەردى ىسكە قوسۋىمىز كەرەك. وسى ارقىلى تاۋار اينالىمىن ارتتىرۋ مۇمكىندىكتەرى كەڭەيەدى. ءبىز وڭىرلەندىرۋ قاعيداتىن قولدانا باستادىق»، - دەدى ارمان شاققاليەۆ.

ناتيجەسىندە، وتكەن جىلى س ي م باسشىسى قىتايدىڭ جەتى پروۆينسياسىنا ساپار جاساپ، ءارقايسىسىندا 3-4 ءىرى كومپانيا انىقتالىپ، قىتايلىق تاراپپەن بىرلەسىپ ءوزارا ساۋدا، وندىرىستىك كووپەراتسيا جانە ينۆەستيتسيا تارتۋ بويىنشا تاۋارلار ءتىزىمى جاسالدى.

«چىڭدۋ قالاسىندا قول جەتكىزىلگەن كەلىسىمدەر ناتيجەسىندە تاۋار اينالىمىن 50 پايىزدان استامعا، ال نانكيندە - 3,5 ەسەگە ارتتىردىق. شانشي پروۆينسياسىمەن دە ىنتىماقتاستىق كەڭەيەدى دەپ سەنەمىن. ءبىز $490 ميلليون استام سوماعا 16 ءتۇرلى ءونىم بويىنشا ۇسىنىس اكەلدىك. 30 كۇنگە دەيىن ۆيزاسىز رەجيمنىڭ ەنگىزىلۋى تۋريزم مەن ىسكەرلىك بايلانىستاردىڭ دامۋىنا ۇلكەن سەرپىن بەرەدى»، - دەپ اتاپ ءوتتى ق ر ساۋدا جانە ينتەگراتسيا ءمينيسترى.

تاراپتار مەملەكەتتەر اراسىنداعى ىنتىماقتاستىق ءبىرقاتار باعىتتا، سونىڭ ىشىندە كولىك سەكتورىندا بەلسەندى دامىپ كەلە جاتقانىن ايتتى. وتكەن جىلى قازاقستان ارقىلى قىتايدان ەۋروپاعا شامامەن 300 پويىز جونەلتىلسە، 2025 -جىلدىڭ العاشقى ەكى ايىندا 111 دەن استام پويىز جىبەرىلگەن.

قىتاي حالىق رەسپۋبليكاسىنىڭ جوعارى وقۋ ورىندارىندا قازاقستاننان 400 دەن استام ستۋدەنت ءبىلىم الۋدا. قىتايدىڭ سولتۇستىك- باتىس پوليتەحنيكالىق ۋنيۆەرسيتەتىنىڭ ءال-فارابي اتىنداعى قاز ۇ ۋ بازاسىنداعى فيليالى 56 ماگيسترانتتى قابىلدادى.

ەكى ەل اراسىنداعى ىنتىماقتاستىقتىڭ باسىم باعىتتارى تالقىلاندى. ەڭ الدىمەن، قىتاي مەن ەۋروپا اراسىنداعى تەمىرجول قاتىناسىن دامىتۋ جالعاسىن تابادى.

«ءبىرىنشى باعىت بويىنشا ءبىز تەمىرجول قاتىناسى ارقىلى قىتاي - ەۋروپا باعىتىندا اۆتوكولىك، بالامالى ەنەرگەتيكا جانە اۋىل شارۋاشىلىعى ونىمدەرى بويىنشا ساۋدا سالاسىنداعى تاۋار اينالىمىن كەڭەيتە الامىز. سونىمەن قاتار، شەتەلدەگى قويما ينفراقۇرىلىمىن كەڭەيتۋ بويىنشا دا ارىپتەستىكتى دامىتۋعا بولادى. ەكىنشى ماڭىزدى باعىت - اۋىل شارۋاشىلىعى»، - دەپ اتاپ ءوتتى جاو يدە.

ول قازاقستاندىق جوعارى وقۋ ورىندارىن ش ى ۇ ۋنيۆەرسيتەتتەر اليانسىنا جانە «ءبىر بەلدەۋ - ءبىر جول» كاسىبي ۋنيۆەرسيتەتتەر اليانسىنا قوسىلۋعا شاقىردى.

سونىمەن قاتار، گۋمانيتارلىق- مادەني الماسۋ سالاسىنداعى ىنتىماقتاستىق تا كەڭەيتىلەدى. بيىل شانشي پروۆينسياسىنان شيان قالاسىنان الماتىعا دەيىن العاشقى مادەني- تۋريستىك پويىز جولعا شىقپاق. سونداي-اق «جىبەك جولى» ونەر فەستيۆالىن وتكىزۋ جوسپارلانىپ وتىر.

پارتيا كوميتەتىنىڭ حاتشىسى اتاپ وتكەندەي، 2025 -جىلدىڭ ماۋسىم ايىندا قىتاي مەن ورتالىق ازيا ەلدەرىنىڭ ەكىنشى ءسامميتى استانا قالاسىندا وتەدى. ونىڭ اياسىندا قىتاي ىسكەرلىك كەڭەسىنىڭ وتىرىسىن وتكىزۋ جوسپارلانۋدا.

كەزدەسۋ سوڭىندا ق ر ساۋدا جانە ينتەگراتسيا ءمينيسترى قىتاي بيزنەس وكىلدەرىن 11-13-ماۋسىم ارالىعىندا استانادا وتەتىن ەكسپورتتىق- يمپورتتىق كورمەگە قاتىسۋعا شاقىردى. بۇل كورمە سامميت اياسىندا ۇيىمداستىرىلادى. بۇگىنگى تاڭدا كورمەگە 200 گە جۋىق قىتايلىق كومپانيا قاتىسۋعا نيەت ءبىلدىرىپ وتىر.

سونىمەن قاتار، ق ح ر كاسىپكەرلەرىمەن جەكە كەزدەسۋلەر ءوتتى.

Shaanxi Foreign Economic and Trade Group كومپانياسىنىڭ باسقارما ءتوراعاسى مياو شيان ءوز سوزىندە كومپانيانىڭ شانشي پروۆينسياسىندا تاۋار اينالىمى بويىنشا ءۇشىنشى ورىندى يەلەنەتىنىن ايتتى. كومپانيا كوپتەگەن سالادا جۇمىس ىستەيدى، ونىڭ نەگىزگى باعىتى - تاۋ-كەن ونەركاسىبىندەگى ساۋدا، ونىڭ ىشىندە ءتۇستى مەتالدار، كاتودتى مىس جانە اليۋميني.

«ءبىز تابيعي گاز بەن شيكى مۇناي يمپورتتاۋعا مۇددەلىمىز. شانشي پروۆينسياسىنىڭ جىل سايىنعى قاجەتتىلىگى 3,6 ميلليون توننانى قۇرايدى. سونىمەن قاتار، ءبىز EPC- كەلىسىمشارتتار شارتتارىنداعى كۇن جانە جەل ەلەكتر ستانتسيالارىن سالۋ بويىنشا بىرلەسكەن جوبالاردى ىسكە اسىرۋعا، قويما ينفراقۇرىلىمىن دامىتۋ جوباسىنا قاتىسۋعا قىزىعۋشىلىق تانىتىپ وتىرمىز»، - دەدى مياو شيان.

ءوز كەزەگىندە Ningxia State Farm كومپانياسىنىڭ باس ديرەكتورى دۋان جيشيان ولاردىڭ كاسىپورنى اۋىل شارۋاشىلىعى سالاسىندا جۇمىس ىستەيتىنىن جانە 400 ميلليارد ەۋرودان استام اكتيۆكە يە ەكەنىن اتاپ ءوتتى. ول كومپانيا 250 مىڭنان استام ءىرى قارا مال ۇستايتىنىن ايتىپ، وسىعان بايلانىستى جەم-ءشوپ داقىلدارى مەن مينەرالدى تىڭايتقىشتارعا سۇرانىستىڭ جوعارى ەكەنىن، سونىڭ ىشىندە جوڭىشقا مەن جۇگەرىنى ساتىپ الۋعا نەمەسە بىرلەسىپ وسىرۋگە دايىن ەكەندىگىن ءبىلدىردى.

«ءبىزدىڭ كومپانيا 70 جىلدان استام جۇمىس ىستەپ كەلەدى. ءبىز ءسۇت ءوندىرۋ باعىتىندا ءىرى قارا مال تۇقىمىن وسىرۋدە وزىق تاجىريبەنى ەنگىزىپ كەلەمىز، قازىرگى زامانعى مال شارۋاشىلىعى جۇيەسى جولعا قويىلعان. جوڭىشقا مەن ازىقتىق جۇگەرى ءوسىرۋ بويىنشا B2B فورماتىندا ۇلكەن تاجىريبەمىز بار. سونىمەن قاتار، ءونىمدى ءبولۋ مەن سۋ رەسۋرستارىن باسقارۋدىڭ زاماناۋي «اقىلدى» جۇيەلەرى دە بار»، - دەپ اتاپ ءوتتى دۋان جيشيان.

ءوز كەزەگىندە ق ر ساۋدا جانە ينتەگراتسيا ءمينيسترى ارمان شاققاليەۆ قازاقستاندا اۋىل شارۋاشىلىعى ماقساتىنداعى جەر كولەمى 260 ميلليون گەكتاردان اساتىنىن جانە بۇل كورسەتكىش بويىنشا ەلىمىز الەمدە اۆستراليا مەن كانادادان كەيىنگى ءۇشىنشى ورىندا ەكەنىن ەسكە سالدى.

«ارينە، ءبىز اۋىل شارۋاشىلىعىن وففتەيك- كەلىسىمشارتتار قاعيداتى بويىنشا دامىتۋعا مۇددەلىمىز. سىزدەر ءوز تەحنولوگيالارىڭىز بەن ستاندارتتارىڭىز بويىنشا ونىمدەردى ءوسىرىپ، قايتا وڭدەپ، ەكسپورتقا شىعارا الاتىن بولاسىزدار. ا و ك سالاسىنداعى نەگىزگى باعىتىڭىزدى ەسكەرە وتىرىپ، سىزدەردى قازاقستانعا ينۆەستور رەتىندە شاقىرامىز»، - دەدى مينيستر.

ساپاردىڭ ەكىنشى كۇنى - 2025 -جىلدىڭ 2-ساۋىرىندە شيان قالاسىندا قازاقستاننىڭ ساۋدا- ەكونوميكالىق ميسسياسى (س ە م) ءوتتى. B2B- كەزدەسۋلەردىڭ قورىتىندىسى بويىنشا قازاقستاندىق كومپانيالار $98 ميلليون سوماسىنا ەكسپورتتىق كەلىسىمشارتتارعا قول قويدى.

بۇل ساۋدا ميسسياسى العاش رەت شەتەلدىك مەكەمە - قازاقستان رەسپۋبليكاسىنىڭ باس كونسۋلدىعىنىڭ بازاسىندا وتكىزىلدى. ەكى جىل بۇرىن ءدال وسى عيماراتتا مەملەكەت باسشىسىنىڭ قاتىسۋىمەن قازاقستاندىق تاۋارلاردىڭ شوۋرۋمى اشىلعان بولاتىن. ميسسياعا قازاقستاننان 60-تان استام، قىتايدان 100-دەن استام كاسىپكەر قاتىستى.

ساۋدا-ەكونوميكالىق ميسسيا اياسىندا QazTrade ۇيىمداستىرعان كورمە ءۇش قازاق كيىز ءۇيى فورماتىندا وتكىزىلدى. وندا نەگىزىنەن ازىق-تۇلىك سالاسىنداعى 50-گە جۋىق قازاقستاندىق كومپانيا ءوز ونىمدەرىن تانىستىردى. ۇن، مايلى جانە ءداندى داقىلدار - قىتاي نارىعىندا جوعارى سۇرانىسقا يە. بۇل ونىمدەر قازاقستاننىڭ قىتايعا باعىتتالعان ستراتەگيالىق ەكسپورتىنىڭ نەگىزىن قۇرايدى جانە وتاندىق وندىرۋشىلەر ءۇشىن جاڭا مۇمكىندىكتەر اشۋدا.

س ە م قورىتىندىسى بويىنشا QazTrade شانشي پروۆينسياسى حالىقارالىق ساۋداعا جاردەمدەسۋ كوميتەتىنىڭ ساۋدا-ونەركاسىپ پالاتاسىمەن جانە AIJU Grain and Oil Industry Group كومپانياسىمەن ىنتىماقتاستىق تۋرالى كەلىسىمدەرگە قول قويدى. بۇل كەلىسىمدەر قازاقستان مەن قىتايدىڭ بيزنەس وكىلدەرى اراسىندا تىكەلەي بايلانىس پەن تىعىز ارىپتەستىك ورناتۋعا مۇمكىندىك بەرەدى.

وسىعان دەيىن قازاقستان مەن قىتاي سۋ تاسقىنىمەن كۇرەسۋ ءۇشىن ترانسشەكارالىق وزەندەر بويىنشا اقپارات الماسىپ جاتقانىن جازدىق.

اۆتور

ايدار وسپاناليەۆ