قازاقستاندىق جاستار قانشا جاسىندا شاڭىراق كوتەرەدى؟
استانا. قازاقپارات – قازاقستان رەسپۋبليكاسىنىڭ ۇلتتىق ستاتيستيكا بيۋروسى ەل ازاماتتارىنىڭ نەشە جاسىندا وتباسىن قۇرىپ جاتقانى جايلى ستاتيستيكا ۇسىندى.

ەل جاستارى نەشە جاستا ۇيلەنگەندى قۇپ كورەدى؟
ستاتيستيكاعا سەنسەك، ەلىمىزدەگى قىز-جىگىتتەر 30 عا جاقىنداعاندا ءبىر-اق وتباسىن قۇرىپ جاتىر. ناقتىراق ايتساق، سوڭعى ءۇش جىلدا قازاقستاندىق جىگىتتەر 25-29 جاس ارالىعىندا ەڭ كوپ نەكەلەسكەن.
«2022-جىلى - 41207 جىگىت، 2023-جىلى - 36882 جىگىت وتباسىن قۇرعان. ونىڭ ىشىندە 2022-جىلى - 38038 جىگىت، 2023-جىلى - 33824 جىگىت العاش رەت نەكەگە تۇرعان. ال 2022 دە 39، 2023-جىلى - 41 ەر ادام ايەلىنەن ايىرىلىپ، ەكىنشى رەت نەكەلەسكەن. 2022-جىلى – 3095، 2023-جىلى - 2982 ەر ادام اجىراسىپ، قايتا ۇيلەنگەن»، - دەلىنگەن دەرەكتە.
ەلىمىزدەگى قىزداردىڭ ەڭ كوپ تۇرمىس قۇراتىن ورتاشا جاسى 20-24 جاس. بۇعان ۇلتتىق ستاتيستيكالىق بيۋرو ۇسىنعان دەرەك دالەل. «وتىرعان قىز ورنىن تابادى» دەگەن ماقالعا سۇيەنەتىن قىزدار دا از ەمەس.
«سوڭعى ءۇش جىلدا جالپى العاندا 20-24 جاس ارالىعىنداعى 97774 قىز تۇرمىس قۇرعان. ونىڭ ىشىندە 94439 ى العاش رەت قالىڭدىق اتانعاندار. ال 72 ءسى جەسىر قالىپ، قايتا نەكەلەسكەندەر. سونداي-اق 3171 ايەل اجىراسىپ، قايتا ءوز باقىتىن تاپقاندار»، - دەگەن ساندار كورسەتىلگەن دەرەكتە.
قاي ايماقتىڭ جاستارى ۇيلەنۋگە اسىقپايدى؟
2023-جىلعى ستاتيستيكامەن ەسەپتەسەك، ەلىمىزدە ءبىرىنشى نەكەگە تۇرعان جىگىتتەردىڭ ورتاشا جاسى - 27,8 قۇرايدى. ەڭ كەش ۇيلەنەتىن جىگىتتەر سولتۇستىك قازاقستان وبلىسىندا تۇرادى.
«2023-جىلعى دەرەككە سايكەس، سولتۇستىك قازاقستان وبلىسىنىڭ جىگىتتەرى ورتاشا العاندا 29,1 جاسىندا شاڭىراق كوتەرەدى. ودان كەيىن، شىعىس قازاقستان - 29,0، الماتى قالاسى - 28,8 جاس شاماسىمەن كوشتى جالعايدى. وزگە ايماقتارمەن سالىستىرعاندا ماڭعىستاۋ وبلىسىنىڭ جىگىتتەرى ەرتە ۇيلەنەتىن جاستار قاتارىنا جاتادى (ماڭعىستاۋ - 26,1 ورتاشا جاس)»، - دەلىنگەن دەرەكتە.
ال قىزداردىڭ ورتاشا جاسى بۇدان دا ەرتە. 2023-جىلعى دەرەكپەن الساق، قازاقستاندىق ارۋلاردىڭ تۇرمىس قۇراتىن ورتاشا جاسى - 25,2 قۇرايدى.
«سولتۇستىك قازاقستان وبلىسىنىڭ قىزدارى ورتاشا العاندا - 26,6 جاسىندا وتباسىن قۇرادى. ودان كەيىن ءتىزىمدى پاۆلودار - 26,5، شىعىس قازاقستان وبلىستارى - 26,4 جاستا. ال تۇركىستان وبلىسىنىڭ قىزدارى (ورتاشا جاس - 22,9) ەرتە تۇرمىس قۇراتىندارعا جاتاتىنى بەلگىلى بولدى»، - دەلىنگەن اقپاراتتا.
ۇلتتىق ستاتيستيكالىق اگەنتتىك 2024-جىلعا جىلدىق اقپارات جۇمىس جوسپارىنا سايكەس 12-ناۋرىزدا قالىپتاستىرىلىپ، جاريالاناتىنىن حابارلادى.