قازاقستاندىق دەسانتشىلار گيمالايدى باعىندىردى
استانا. KAZINFORM - ق ر قارۋلى كۇشتەرى دەسانتتىق- شابۋىلداۋ اسكەرلەرىنىڭ اسكەري قىزمەتشىلەرى ەفرەيتورلار بالجان مۇساتايەۆا مەن مارجان سايرانوۆا «قاز-ءۇندى-2024» وقۋ-جاتتىعۋى بارىسىندا گيمالاي تاۋ بوكتەرىنە پاراشيۋت قوندىردى. بۇل تۋرالى ق ر قورعانىس مينيسترىلىگىنىڭ باسپا ءسوز قىزمەتى ءمالىم ەتتى.
تەڭىز دەڭگەيىنەن 3200 مەتر بيىكتىك، اينالا - تاۋ كورىنىستەرى، ارقادا - پاراشيۋت، قارۋ-جاراق پەن جابدىقتار، ماقسات - جاۋىنگەرلىك تاپسىرمانى ورىنداۋ. وسىلايشا، قازاقستاندىق دەسانتشىلار كاسىبي بىلىكتىلىكتەرى مەن جاۋىنگەرلىك دايىندىقتارىن كورسەتىپ وتىر.
قازاقستان رەسپۋبليكاسى قارۋلى كۇشتەرى دەسانتتىق- شابۋىلداۋ اسكەرلەرىنىڭ پاراشيۋتشىلەر توبى «قاز-ءۇندى-2024» وقۋ-جاتتىعۋىندا تاپسىرمالاردى اسكەري كونتينگەنت قۇرامىندا ورىندادى. ولاردىڭ ىشىندە ەكى قىز - پاراشيۋتشى- نۇسقاۋشى ەفرەيتور بالجان مۇساتايەۆا مەن 61993 اسكەري ءبولىمى ماتەريالدىق- تەحنيكالىق قامتاماسىز ەتۋ ۆزۆودىنىڭ سانيتارلىق نۇسقاۋشىسى ەفرەيتور مارجان سايرانوۆا دا بار.
بيىك تاۋداعى كۇردەلى احۋالدا قىزدار شەكتەۋلى الاڭعا پاراشيۋتپەن سەكىرىپ ءدال قونۋ ارقىلى جاقسى ناتيجە كورسەتتى.
- ءدال سەكىرۋ - ادەتتە تەڭىز دەڭگەيىنەن 1200-دەن 4000 مەترگە دەيىنگى بيىكتىكتەن، جەكە جانە توپتاسقان تۇردە، ءارتۇرلى تومەندەتۋ رەجيمدەرىندە بەرىك جانە باسقارىلاتىن دەڭگەيلەرى بار «قانات» تۇرىندەگى ارنايى پاراشيۋت جۇيەسى ارقىلى ورىندالادى. ءدال سەكىرۋ باسقارىلاتىن پاراشيۋتتەرمەن بىرگە پايدا بولعان ەڭ كونە پاراشيۋت سپورتىنىڭ ءبىرى بولسا دا، ول ەڭ كۇردەلىسى، ويتكەنى پاراشيۋت جۇيەلەرى جاڭارتىلعان سايىن الاڭنىڭ ولشەمدەرى مەن رۇقسات ەتىلگەن نورمالار وزگەرەدى. ەفرەيتور مۇساتايەۆا ەكەۋمىز تۋرا شەكتەلگەن الاڭنىڭ ورتاسىنا قونامىز، - دەدى ەفرەيتور مارجان سايرانوۆا.
ەفرەيتور بالجان مۇساتايەۆا ءتۇرلى پاراشيۋت جۇيەلەرىمەن جۇزدەن اسا سەكىرىپتى. جۋىردا عانا باعدارلامانى اياقتاعاننان كەيىن ول پاراشيۋتشى- نۇسقاۋشى اتاعىن الدى. مارجان سايرانوۆا پاراشيۋتپەن سەكىرۋدى ەندى باستاعان. بۇل ونىڭ العاشقى حالىقارالىق جاتتىعۋى، دەگەنمەن پاراشيۋت كومانداسىنىڭ اعا وفيتسەرى پودپولكوۆنيك ەرجان تولەپ ۇلىنىڭ ايتۋىنشا، مارجان قىسقا ۋاقىتتا جاقسى ناتيجە كورسەتىپ ءجۇر.
ەستەرىڭىزگە سالا كەتەيىك، «قاز-ءۇندى - 2024» وقۋ- جاتتىعۋى 30-قىركۇيەك پەن 13-قازان ارالىعىندا ءۇندىستاننىڭ سولتۇستىك بولىگى اۋلي قالاسىنىڭ ماڭىنداعى «سۋريا» وقۋ- جاتتىعۋ ورتالىعىندا وتكىزىلىپ جاتىر. نامىستى دوداعا قۇرلىق اسكەرلەرىنەن «وڭتۇستىك» وڭىرلىك قولباسشىلىعى مەن ق ر قارۋلى كۇشتەرىنىڭ دەسانتتىق- شابۋىلداۋ اسكەرلەرى اسكەري قىزمەتشىلەرىنىڭ قۇرامىنان جاساقتالعان روتا قاتىسىپ جاتىر.
وقۋ-جاتتىعۋ بارىسىندا ەكى كونتينگەنتتىڭ اسكەري قىزمەتشىلەرى تاۋ دايىندىعى تاجىريبەسىمەن ءبولىسىپ، تەرروريزمگە قارسى قاۋىپسىزدىك بويىنشا بىرلەسكەن مىندەتتەردى ورىندايدى. دەسانت ءتۇسىرۋ كەزىندە قازاقستان دەسانتتىق- شابۋىلداۋ اسكەرلەرىنىڭ اسكەري قىزمەتشىلەرى ءۇندى ارىپتەستەرىمەن بىرلەسىپ، كۇردەلى تاۋلى جەرلەردە پاراشيۋتپەن سەكىرۋ جاتتىعۋلارىن ورىنداعان.
اۆتور
باقىتگۇل اباي قىزى
