قازاقستاندىق دارىگەرلەر روبوتتىڭ كومەگىمەن ونلاين وتا جاسادى

الماتى. KAZINFORM - الماتىداعى قازاق ونكولوگيا جانە راديولوگيا عىلىمي-زەرتتەۋ ينستيتۋتى روبوتتاندىرىلعان حيرۋرگيا بويىنشا حالىقارالىق تاجىريبە الماسۋدىڭ الاڭىنا اينالدى. مۇندا ا ق ش، قىتاي جانە قازاقستان ماماندارىنىڭ قاتىسۋىمەن ونلاين وتا جاسالىپ جاتىر.

ءىس-شارانىڭ باستى تاقىرىبى - روبوت-اسسيستەنتسيالىق راديكالدى پروستاتەكتوميا جانە نەفرەكتوميا. بۇل - ونكولوگيالىق اۋرۋلاردى ەمدەۋدىڭ از ءينۆازيۆتى جانە جوعارى ءتيىمدى ءادىسى رەتىندە الەمدە كەڭىنەن مويىندالعان ءتاسىل.

وتا وپەراتسيا بولمەسىنەن تىكەلەي ەفيردە كورسەتىلەدى. حيرۋرگتەر روبوتتىق جۇيەنى پايدالانا وتىرىپ، ناقتى ۋاقىت رەجيمىندە كۇردەلى وپەراتسيالاردى بىرلەسە جۇزەگە اسىرىپ جاتىر.

ونكولوگ دارىگەر اسەت احان ۇلىنىڭ ايتۋىنشا، بۇگىنگى وتا روباتتى اسسيستەنتسيالىق وپەراتسيا دەپ اتالادى. ونىڭ ەرەكشەلىگى مۇندا بارلىق قيمىل روباتتىڭ كومەگىمەن جۇزەگە اسىرىلادى. ال ونى حيرۋرگ دارىگەرلەر باسقارادى.

- وتا 3 ەلدىڭ قاتىسۋىمەن قاشىقتان جاسالادى. ءۇش حيرۋرگ بۇل وتانى بولىسكە سالادى. قازىرگى كەزدە بۇل ناۋقاسقا ءبىرىنشى ساتىداعى كوپوشاقتى وبىر ديوگنوزى قويىلعان. ءبىزدىڭ ماقساتىمىز - ىشكى ورگاندى ساقتاپ قالىپ، وبىردى الىپ تاستاۋ. مۇنداي وپەراتسيالار الداعى ۋاقىتتا دا جالعاسىن تابادى، - دەدى اسەت احان ۇلى.

مامانداردىڭ ايتۋىنشا، مۇنداي تەحنولوگيا وپەراتسيانىڭ دالدىگىن ارتتىرىپ، قان جوعالتۋدى ازايتادى، اسقىنۋ قاۋپىن تومەندەتەدى. سونىمەن قاتار ناۋقاستىڭ اۋرۋحانادا جاتۋ مەرزىمى قىسقارادى.

ءىس-شارا بارىسىندا ءۇش ەلدىڭ جەتەكشى حيرۋرگتەرى وتا كەزەڭدەرىن بىرلەسىپ تالقىلاپ، تاجىريبە الماسادى. ونلاين-ترانسلياتسياعا ەلدەگى بارلىق ونكولوگيالىق ورتالىق قوسىلعان. بۇل ونكولوگ دارىگەرلەردى جاڭا تەحنولوگيالارمەن تانىستىرىپ، كاسىبي ىنتىماقتاستىقتى ارتتىرۋعا مۇمكىندىك بەرمەك.

ايتا كەتەيىك، وسىعان دەيىن قاتەرلى ىسىك نە سەبەپتى قارقىن العانى تۋرالى جازعانبىز.