قازاقستاندىق ءتولقۇجات جاڭارتىلدى: ەسكى پاسپورتتى نە ىستەۋ كەرەك

استانا. KAZINFORM — قازاقستاندىقتاردىڭ ءتولقۇجاتىندا جاڭا قورعانىس ەلەمەنتى، ياعني قار بارىسىنىڭ سۋرەتى پايدا بولدى. وسى ورايدا ازاماتتار ەسكى ءتولقۇجاتتى اۋىستىرۋى كەرەك پە؟ بۇل ساۋالعا ىشكى ىستەر مينيسترلىگى جاۋاپ بەردى.

— قوسىمشا قورعانىس ەلەمەنتىمەن جاڭا ۇلگىدەگى ءتولقۇجات شىعارۋ قولدانىستاعى ەسكى ءتولقۇجاتتاردى جاپپاي اۋىستىرۋدى كوزدەمەيدى، ياعني اۋىستىرۋ مىندەتتى ەمەس. جاڭا ۇلگى ەنگىزىلگەنگە دەيىن بەرىلگەن ءتولقۇجاتتار (جارامدىلىق مەرزىمى ءوتىپ كەتكەن، بۇلىنگەن، جوعالعان نەمەسە يەسىنىڭ مارتەبەسىنە سايكەس كەلمەيتىن جاعدايدى قوسپاعاندا) قازاقستان رەسپۋبليكاسىنىڭ زاڭناماسىنا سايكەس، قولدانىلۋ مەرزىمى اياقتالعانعا دەيىن كۇشىن ساقتايدى، — دەپ حابارلادى مينيسترلىك.

قار بارىسىنىڭ بەينەسى بار ءتولقۇجاتتار بيىل 3 -شىلدەدەن باستاپ بەرىلە باستادى.

2025 -جىلعى 24 -شىلدەدەگى جاعداي بويىنشا، جاڭا قورعانىس ەلەمەنتىمەن 88136 ءتولقۇجات دايىندالىپ، ونىڭ 55882- ءسى ازاماتتارعا بەرىلگەن.

بىرنەشە كۇن بۇرىن قازاقستاندىقتاردىڭ ءتولقۇجاتىندا جاڭا قورعاۋ ەلەمەنتى پايدا بولاتىنى تۋرالى جازعان ەدىك.

ەسكە سالا كەتسەك، بيىل مەملەكەت باسشىسى قاسىم-جومارت توقايەۆ قازاقستان حالقى اسسامبلەياسىنىڭ سەسسياسىندا «ءتولقۇجاتىمىزدىڭ ابىروي-بەدەلىنىڭ كوتەرىلۋى ەلىمىزدىڭ ىقپالى كۇشەيە تۇسكەنىن كورسەتەدى»، — دەگەن ەدى.

اۆتور

داۋلەت ىزتىلەۋ