قازاقستاندىق ءانشى «سلاۆيان بازارى» بايقاۋىندا گران-پري يەلەندى
استانا. قازاقپارات - XXXIV حالىقارالىق «ۆيتەبسك-2025» ەسترادالىق ءان ورىنداۋشىلارى بايقاۋىندا گران-پري جۇلدەسى قازاقستاندىق الماگۇل باتتاليەۆاعا بۇيىردى، دەپ حابارلايدى بەلتا.
ۆيتەبسك قالاسىندا وتكەن «سلاۆيان بازارى» حالىقارالىق فەستيۆالىنىڭ جاس ورىنداۋشىلارعا ارنالعان بەدەلدى بايقاۋىندا قازاقستاندىق ءانشى الماگۇل باتتاليەۆا جەڭىسكە جەتىپ، گران-پري يەگەرى اتاندى. ەكى كۇنگە سوزىلعان بايقاۋ قورىتىندىسى بويىنشا ول 137 ۇپاي جينادى. فينالدا ءانشى جۇرەك تەبىرەنتەرلىك «ۆەچنوست» ءانىن ورىنداپ، كورەرمەندەردىڭ قوشەمەتىنە جانە قازىلار القاسىنىڭ جوعارى باعاسىنا يە بولدى.
ءبىرىنشى ورىن بەلارۋسيالىق ۆالەريا بەرناتوۆيچكە بۇيىرسا، ەكىنشى ورىندى ارمەنيادان داۆيد كيراكوسيان مەن يتاليادان دومەنيكو باربەرا ءبولىستى. ال ءۇشىنشى ورىندى رەسەيلىك ەريك احمەتوۆ پەن قىرعىزستاندىق رىسكەلدى ساربەكوۆ يەلەندى.
ايتا كەتەيىك، وتكەن جىلى وسى بايقاۋدا ەرنازار جۇبان ءبىرىنشى ورىندى جەڭىپ العان بولاتىن.
