قازاقستاندىق عالىمدار نوبەل سىيلىعىنا تالاساتىن جوباعا 10 ميلليون دوللار ىزدەپ ءجۇر

استانا. KAZINFORM - «يادرولىق فيزيكا ينستيتۋتى» رەسپۋبليكالىق مەملەكەتتىك كاسىپورنىنىڭ باس ديرەكتورى سايابەك ساحيەۆ سەناتتا وتكەن كەزدەسۋدە نوبەل سىيلىعىنا تالاساتىن جوباعا 10 ميلليون دوللار تاپپاي وتىرعاندارىن ءمالىم ەتتى.

- بىزدەگى عىلىمي جوبالاردى قولداۋ تىزبەسىندە MegaScience ساناتىنداعى جوبالار مۇلدە جوق. وسىنى ەنگىزسەك... الەمدىك دەڭگەيدەگى العاشقى MegaScience جوباسىن ۇسىنعانىمىزعا ءۇش جىلدان اسىپ بارا جاتىر. بۇل - ۋلتراسالقىن نەيتروندار كوزىن جاساۋعا ارنالعان جوبا. وسى جوبا ارقىلى كەم دەگەندە ەكى نوبەل سىيلىعىنا تاتيتىن جاڭالىق اشۋعا بولادى. ءبىر جاڭالىعىمىز نوبەل سىيلىعىنا ساي ەكەنىنە سەنىمدىمىز. ءبىراق وعان قاجەتتى قوندىرعىنى ورناتۋ ءۇشىن 15 ميلليون دوللار كەرەك، - دەيدى ول.

ايتۋىنشا، اتالعان قوندىرعى قازاقستاندا ورناتىلسا، كەيىن الەمدەگى ەڭ جەتەكشى دەگەن 15 جوعارى وقۋ ورنىنىڭ عالىمدارى سوندا كەلىپ ەكسپەريمەنت جاسايدى.

- ءبىراق بىزدە ونداي قارجى بولۋگە نەگىز بولاتىن MegaScience باعدارلاما اتىمەن جوق. الەمنىڭ 27 ەلى مۇشە بولىپ كىرەتىن بىرىككەن زەرتتەۋلەر يادرولىق ينستيتۋتى 5 ميلليون دوللاردى بەرۋگە دايىن وتىر. قالعان 10 ميلليون دوللاردى بولۋگە قولداۋ كورسەتسەڭىزدەر دەگەن ءوتىنىش بار. بار-جوعى 5 ميلليارد تەڭگەنى بولسە، اينالدىرعان 3 جىلدىڭ ىشىندە الەمدىك دەڭگەيدەگى ۇلكەن جاڭالىق اشاتىن ورتالىق قۇرار ەدىك، - دەدى سايابەك ساحيەۆ.

ءۇش جىلدىق قارجىلاندىرۋ دەگەن از. 5-10 جىلدىڭ كولەمىندە ۇزدىكسىز قارجىلاندىرىلاتىن باعدارلاما كەرەك. ويتكەنى بۇگىن 100 ميلليون تەڭگە تۇراتىن قوندىرعى 2 جىلدان كەيىن قانشا تۇراتىنىن ءبىر قۇداي بىلەدى.

سونداي-اق، ول ينستيتۋتتىڭ ا ە س قالدىقتارىن وڭدەيتىن جوباسىن تۇركيا پاتەنتتەپ الۋى مۇمكىن ەكەنىن ءمالىم ەتتى.

اۆتور

ەسىمجان ناقتىباي