قازاقستاندىق عالىمدار 1 گرامى 80 ميلليون دوللار تۇراتىن ءونىم شىعاراتىن ۇدەتكىش جاساماقشى

استانا. KAZINFORM - «يادرولىق فيزيكا ينستيتۋتى» رەسپۋبليكالىق مەملەكەتتىك كاسىپورنىنىڭ باس ديرەكتورى سايابەك ساحيەۆ سەناتتا وتكەن كەزدەسۋدە ۇكىمەتتەن 1 گرامى 80 ميلليون دوللار تۇراتىن ءونىم شىعاراتىن ءوندىرىستى ۇيىمداستىرۋعا قولداۋ سۇرادى.

- ءبىزدىڭ يادرولىق فيزيكا ينستيتۋتى شىعارىپ وتىرعان «كوبالت-57» دەيتىن راديويزوتوپتى فرانسيانىڭ اتاقتىڭ Orano كومپانياسى، Zekkert كومپانياسى ساتىپ الادى. بۇلاردىڭ قاتارىنا رەسەيدەن كەيىن تۇرىكتەر كىرگىسى كەلىپ وتىر. وسى جوباعا سىزدەر كوڭىل ءبولىپ، تاعى ءبىر ۇدەتكىش ورناتا الساق، گەرماني-گەلي گەنەراتورىن، اكتيني-225 راديوفارم پرەپاراتىنىڭ نەگىزىندە قۇرالاتىن، 1 گرامى 80 ميلليون دوللار تۇراتىن وسىنداي ءوندىرىستى اينالدىرعان 3-4 جىلدىڭ ىشىندە ۇيىمداستىرا الامىز. ءبىراق وعان قاجەتتى 5-10 ميلليون دوللار قارجى بولگىزەتىن تەتىك زاڭنامادا جوق، - دەدى عالىم.

ونىڭ ايتۋىنشا، عىلىم جانە جوعارى ءبىلىم مينيسترلىگى ۇسىناتىن ءۇش جىلدىق گرانتتار مۇنداي قىمبات جوبالاردى قولداۋعا قاۋقارسىز.

- بىزگە 5-10 جىلدىڭ كولەمىندە ۇزدىكسىز قارجىلاندىرىلاتىن باعدارلاما كەرەك. ويتكەنى بۇگىن 100 ميلليون تەڭگە تۇراتىن قوندىرعى 2 جىلدان كەيىن قانشا تۇراتىنىن ءبىر قۇداي بىلەدى، - دەدى سايايۋەك ساحيەۆ.

سونداي-اق، ول ينستيتۋتتىڭ ا ە س قالدىقتارىن وڭدەيتىن جوباسىن تۇركيا پاتەنتتەپ الۋى مۇمكىن ەكەنىن ءمالىم ەتتى.

اۆتور

ەسىمجان ناقتىباي