قازاقستاندىق عالىم كوز اۋرۋىن ەمدەۋدىڭ ءتيىمدى ءادىسىن ويلاپ تاپتى

اقتوبە. KAZINFORM - ق. جۇبانوۆ اتىنداعى اقتوبە وڭىرلىك ۋنيۆەرسيتەتى «حيميا جانە حيميالىق تەحنولوگيا» كافەدراسىنىڭ دوتسەنتى، PhD گۋزەل ابيلوۆا ۇلى بريتانياداعى رەدينگ ۋنيۆەرسيتەتىنىڭ حيميا، ونىمدەر جانە فارماتسيا مەكتەبىنىڭ پروفەسسورى ۆيتالي حۋتوريانسكيمەن بىرلەسە كوز اۋرۋىن ەمدەۋدىڭ ءتيىمدى ءادىسىن ويلاپ تاپتى.

عالىم بىرنەشە جىلدىق زەرتتەۋلەرىنىڭ ناتيجەسىندە كوزگە ارنالعان لينزاعا ۇقساس وتە جۇقا پوليمەرلى دارىلىك پلەنكالار جاساپ شىقتى.

گۋزەل قابىلەت قىزىنىڭ ايتۋىنشا، وفتالمولوگيالىق دارىلىك پلەنكالاردى جاساۋ يدەياسى 2016 -جىلى دوكتورانتۋراعا تۇسكەن كەزدە پايدا بولعان.

- بيوپوليمەرلەر نەگىزىندە پلەنكالىق ماتەريالدار تۇرىندەگى دارىلىك فورمالاردىڭ دامۋى عىلىمي قىزىعۋشىلىعىمدى تۋدىرعان. وسىعان دەيىنگى زەرتتەۋلەردى زەردەلەي كەلە، كوزدىڭ، مۇرىننىڭ، اۋىزدىڭ شىرىشتى قاباتتارىنا قولدانۋعا ارنالعان پوليمەرلەر نەگىزىندە جاڭا پلەنكالى دارىلىك فورمالار جاساۋعا بولادى. پلەنكالار دارىلىك زاتتاردىڭ دوزاسىن جانە شىعىنىن ايتارلىقتاي ازايتادى. باستىسى - دەنساۋلىققا ەشقانداي زياندى ەمەس. سونىمەن قاتار پوليمەرلى كوز پلەنكالارى كوزگە ارنالعان تامشىلاردىڭ نەگىزگى كەمشىلىكتەرىن جويۋعا مۇمكىندىك بەرمەك. كوزگە ارنالعان تامشىلاردىڭ ەمدىك مەرزىمى قىسقا بولادى. كوبىنە تامشىلار كوز جاسىمەن قوسا نەمەسە باسقا دا ءتۇرلى سەبەپتەرمەن سىرتقا شىعىپ كەتەدى. ال بۇل جاساعان پوليمەرلى پلەنكا كوز جاسىمەن بايلانىسقا تۇسكەن كەزدە بىرتە-بىرتە ەرىپ، پرەپارات ۇزاق ۋاقىت بويى كوز ىشىندە ساقتالادى، - دەيدى عالىم.

يمپورتتالعان فارماتسيەۆتيكالىق نارىقتا پوليمەرلەرگە نەگىزدەلگەن كوز ءدارى-دارمەكتەرىنىڭ تۇرلەرى بار. جۇبانوۆتىق عالىم جاساعان كوزگە ارنالعان دارىلىك پلەنكالار باكتەريالدى ەتيولوگيانىڭ كوز اۋرۋلارىن ەمدەۋگە ارنالعان. ياعني، بۇل ميكروبقا قارسى پرەپاراتتارمەن، اتاپ ايتقاندا سيپروفلوكساتسينمەن اسەر ەتەتىن انتيبيوتيكپەن ازىرلەنگەن.

وليمەر نەگىزىندە جاسالعان دارىلىك فورما بوساتىلعان دارىلىك پرەپاراتتىڭ مولشەرىن رەتتەۋگە مۇمكىندىك بەرەدى. دايىندالعان كوز پلەنكالارى 6-8 ساعاتقا دەيىن ەمدىك اسەرىن بەرە الادى. الداعى ۋاقىتتا عالىم ءدارى-دارمەكتىڭ اسەر ەتۋ ۋاقىتىن مۇمكىندىگىنشە ۇزاق ۋاقىتقا ارتتىرۋدىڭ ءادىس-تاسىلدەرىن انىقتاۋدى جوسپارلاپ وتىر.

ايتا كەتۋ كەرەك، گۋزەل قابىلەت قىزىنىڭ «جەرگىلىكتى ءدارى-دارمەكتەردى جەتكىزۋگە ارنالعان فۋنكسيونالدى بيوپوليمەرلەر نەگىزىندە پلەنكالى دارىلىك فورمالار» تاقىرىبىنداعى جوباسى 2022-2024 -جىلدارعا ارنالعان «جاس عالىم» كونكۋرسىندا گرانتتىق قارجىلاندىرۋعا يە بولدى.