قازاقستاندىق بيشىلەر «سلاۆيان بازارى» بايقاۋىندا جەڭىسكە جەتتى

الماتى. KAZINFORM - «ۆيتەبسكتەگى سلاۆيان بازارى» جارىسى اياسىندا وتكەن حالىقارالىق Dream Dance Fest بايقاۋىندا قازاقستاندىق «جاس وركەن» ءبي ءانسامبلى 1-ورىنعا يە بولدى.

حالىقارالىق ءبي جارىسى بەلارۋس ەلىنىڭ ۆيتەبسك قالاسىندا وتكەن. «جاس وركەن» جەتەكشىسى ايدا كەلگەنبايەۆانىڭ ايتۋىنشا، قازاقستاندىق ءبيشى قىزدار 20 شاقتى كوماندانى ارتتا قالدىرىپ، 1-ورىندى جەڭىپ العان. ال گران-پري جۇلدەسى بەلارۋس ەلىنىڭ ۇجىمىنا بەرىلگەن.

- «سلاۆيان بازارى» اياسىندا Dream Dance Fest حورەگرافيالىق بايقاۋى وتە جوعارى دەڭگەيدە ءوتتى. ءارتۇرلى مەملەكەتتەردەن كەلگەن 20 دان اسا ءبي انسامبلدەرى قاتىستى. سولاردىڭ ىشىندە توپ جارىپ، 1-ورىنعا يە بولعانىمىزعا وتە قۋانىشتىمىز. بۇل ءبىز ءۇشىن ءبىرىنشى حالىقارالىق جارىس ەمەس. بىلتىر گرۋزياعا بارىپ، وندا دا ءبىرىنشى ورىن العانبىز. وعان دەيىن تۇركيا ەلىندەگى جارىسقا قاتىسقانىمىز بار. ءبىراق سولاردىڭ ىشىندە وسى «سلاۆيان بازارىنداعى» ءىرى جارىستا جەڭىسكە جەتكەنىمىزگە قۋانامىز، - دەدى ايدا كەلگەنبايەۆا.

سونداي-اق ول «جاس وركەن» ءبي ءانسامبلى 2007-جىلى قۇرىلعانىن اتاپ ءوتتى. توپ جەتەكشىسىنىڭ ايتۋىنشا، قازىر انسامبلدە 150 دەي بالا بار. نەگىزگى باعىتى - ۇلتتىق بيلەر. دەگەنمەن، ەستاردالىق جانە زاماناۋي بيلەر دە ۇيرەتىلەدى.

- ءبىز بەلارۋس ەلىندە اققۋ ءبيىن بيلەدىك. «سارماد» ەتنو-فولكلورلىق ءانسامبلىنىڭ «كوركەم ساز» دەگەن اۋەنىنە ءبي قويدىق. وسى ءبي ارقىلى قازاق قىزدارىنىڭ نازىكتىگىن، قاراپايىمدىلىعىن، سىپايلىعىن كورسەتكىمىز كەلدى. سول ماقساتىمىزعا جەتتىك دەپ ويلايمىن. وتە اسەرلى قويىلىم بولدى. سول جاقتىڭ ءادىلقازىلارى، كورەرمەندەرى قازاقتىڭ كيىمدەرىنە، بيىنە ءتانتى بولدى، - دەپ اتاپ ءوتتى ول.

ايدا كەلگەنبايەۆا ۆيتەبسك قالاسىندا وتكەن جارىستا ءادىلقازىلاردىڭ داۋىس بەرۋى جابىق وتكەنىن جانە اشىق تالقىلاۋ بولماعانىن ايتتى.

- ءبىز ءبىرىنشى ورىن العاندىقتان، ءادىلقازىلار جوعارى باعالادى دەپ ويلايمىن. ءبىراق جابىق داۋىس بەرۋ بولدى. ءار انسامبل ونەر كورسەتكەن سوڭ، بىردەن باعالاۋ پاراقتارىنا ۇپاي جازىلىپ، ونى كۋراتورلار جيناپ الىپ كەتەدى ەكەن. بىزدە سەكىلدى تالقىلاۋ بولمايدى. سول ۇپايلاردى سوڭىندا ساناپ، جەڭىمپازدى انىقتادى، - دەدى انسامبل جەتەكشىسى.

قازاق ءبيىن ەۋروپادا پاش ەتىپ، جوعارى ناتيجەگە جەتكەن ءبيشى قىزدار قازىرگى ۋاقىتتا ەلگە ورالعان. ايدا كەلگەنبايەۆا بۇل جارىس انسامبل ءۇشىن ۇلكەن تاجىريبە بولعانىن اتاپ ءوتتى.

- كوڭىل-كۇيىمىز وتە جاقسى. سەبەبى وسىنداي حالىقارالىق جارىستا ابىرويمەن قايتقانىمىزعا قۋانىشتىمىز. مۇندا قانشاما تالانتتى بالالاردى، ۇستازداردى كوردىك. ولاردان ساباق الدىق. ءبىلىمىمىزدى تولىقتىرىپ كەلدىك دەپ ايتا الامىن، ۇلكەن تاجىريبە بولدى، - دەدى ول.

ەسكە سالايىق، بۇعان دەيىن ساعىن ءومىرباي ۇلى «سلاۆيان بازارىنىڭ» بالالار بايقاۋىندا ەكىنشى ورىن العان ەدى.