قازاقستاندىق بوكسشى قىز گيننەستىڭ رەكوردتار كىتابىنا ەنەدى
استانا. قازاقپارات - قازاقستاندىق كاسىپقوي بوكسشى، IBO تۇجىرىمى بويىنشا الەم چەمپيونى انگەلينا لۋكاس جاقىن ارادا ونىڭ ەسىمى گيننەستىڭ رەكوردتار كىتابىنا رەسمي تۇردە ەنگىزىلەتىنىن مالىمدەدى، - دەپ حابارلايدى Massaget.kz ءتىلشىسى.
بۇعان دەيىن تارازدىق سپورتشى قىز ءوز ماقساتى - الەمدىك رەكوردتى جاڭارتىپ، گيننەستىڭ كىتابىنا ەنۋ ەكەنىن ايتقان بولاتىن. ەندى بۇل ارمانى ورىندالۋعا جاقىن.
«بيىل رەكورد ورناتتىم، ەندى جاقىندا رەسمي تۇردە تىركەلەدى. بۇل مەن ءۇشىن ۇلكەن موتيۆاتسيا بولدى. سوڭعى كەزدە مەنىڭ الەمدىك رەيتينگىم وسپەي قالعان سوڭ، وزىمە بىرنەشە جەكپە-جەكتى قاتار وتكىزەمىن دەگەن ماقسات قويدىم. كوماندام بۇعان قارسى بولدى. بارلىعى بۇل وتە قيىن، دەنەڭ قالپىنا كەلمەي قالادى دەپ ايتتى. ءبىراق مەن دايىن بولدىم. سەبەبى مەن ۇنەمى جاقسى فورمادامىن. مىسالى، ءتۇن ورتاسىندا وياتىپ، «ەرتەڭ جەكپە-جەك» دەسە دە، مەن شىعامىن. بۇل - مەن ءۇشىن عانا ەمەس، كوماندام مەن وتباسىم ءۇشىن دە ماڭىزدى»، - دەيدى انگەلينا.
ول كەيبىر سپورتشىلاردىڭ جارتى جىل بويى دايىندالماي، تەك ءبىر جەكپە-جەككە عانا كۇش سالاتىنىن، ال ءوزى كەرىسىنشە - قارقىنىن ارتتىرا تۇسكەن سايىن جاقسى ناتيجە كورسەتەتىنىن ايتتى.
«مەن ءۇشىن توقتاماۋ ماڭىزدى. دەگەنمەن دەنساۋلىقتى دا باقىلاۋدا ۇستايمىز. بيىل قانشا جەكپە-جەك وتكىزەتىنىمدى ناقتى بىلمەيمىن، ءبىراق ازىرگە ءوزىمدى وتە جاقسى فورمادا ۇستاپ، دايىندىقتى جالعاستىرىپ ءجۇرمىن»، - دەدى لۋكاس.
ايتا كەتەيىك، انگەلينا لۋكاس قاتىسقان سوڭعى جەكپە-جەك جانجالمەن اياقتالعان. ول 21-اقپاندا تۇركيانىڭ ستامبۋل قالاسىندا وتكەن RMO Boxing تۋرنيرىندە ءوتتى. بۇل كەزدەسۋدە لۋكاس IBO تۇجىرىمى بويىنشا الەم چەمپيونى اتاعىن قورعاپ، بوليۆيادان كەلگەن قارسىلاسى يسەنيا توكونى ەكىنشى راۋندتا تەحنيكالىق نوكاۋتپەن جەڭدى.
الايدا، جەكپە-جەك بارىسىندا لۋكاس بىرنەشە مارتە ەرەجە بۇزعان: قارسىلاسىن تىستەگەنى جانە جەلكەدەن ۇرعانى بايقالعان. سوعان قاراماستان، تورەشىلەر بۇل ەرەجە بۇزۋشىلىقتاردى ەسكەرمەي، جەڭىستى لۋكاسقا بەردى.
سونىمەن قاتار، قوس راۋندتا دا لۋكاس رەفەري ەسكەرتۋلەرىنە باعىنباي، تەك فيزيكالىق ارالاسۋدان كەيىن عانا توقتاعان. ال جەكپە-جەكتەن كەيىن قارسىلاسى سىپايىلىق تانىتىپ، قول سوزعاندا، لۋكاس ونى يتەرىپ جىبەرىپ، قۇرمەتسىزدىك كورسەتكەن.
