قازاقستاندىق بوكسشى 2 جىلدان كەيىن ازيا ويىندارىنىڭ قولا جۇلدەسىن الادى
استانا. KAZINFORM - قازاقستاندىق بوكسشى ەرتۋعان زەينۋللين 2022-جىلعى حاڭجوۋداعى جازعى ازيا ويىندارىنىڭ قولا جۇلدەسىن الادى.
ازيا وليمپيادا كەڭەسى مەن حالىقارالىق بوكس قاۋىمداستىعى موڭعول بوكسشىسى باتارسۋح چينزوريگتىڭ ناتيجەسىن جوققا شىعاردى، - دەپ حابارلايدى msports.kz سايتى.
2022-جىلى حاڭجوۋدا وتكەن جازعى ازيا ويىندارىندا موڭعول بوكسشىسى 63,5 كەلىگە دەيىنگى سالماقتا توپ جارعان بولاتىن. كەيىننەن حالىقارالىق انتيدوپينگ اگەنتتىگى (ءى ت ا) ازيا ويىندارىندا دوپينگ قولداندى دەپ كۇدىككە ىلىنگەن 16 سپورتشىنىڭ ءتىزىمىن جاريالادى. ولاردىڭ قاتارىندا باتارسۋح چينزوريگ تە بولدى.
موڭعول بوكسشىنىڭ دوپينگ سىناماسىنان «مەتانديەنون» پرەپاراتى انىقتالعان. ناتيجەسىندە وتكەن جىلدىڭ قىركۇيەك ايىنان بەرى سپورتتىق جارىستاردان ۋاقىتشا شەتتەتىلگەن ەدى.
كۇنى كەشە OAC پەن IBA بوكسشىنى 4 جىل بويى جارىستارعا قاتىسۋ قۇقىعىنان ايىردى. ونىڭ التىن جۇلدەسى تايۆان ەلىنىڭ سپورتشىسى ەن چۋ لايعا بەرىلەدى. ال وتانداسىمىز ەرتۋعان زەينۋللين قولا جۇلدەگەر اتانادى. وتانداسىمىز شيرەك فينالدا ءدال وسى موڭعول بوكسشىسىنا ەسە جىبەرگەن ەدى.
