قازاقستاندىق 36 كاسىپورىن ەۋروپاعا ورگانيكالىق ءونىم ەكسپورتتاپ وتىر - مينيستر
استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ قازاقستانداعى يتاليا رەسپۋبليكاسىنىڭ توتەنشە جانە وكىلەتتى ەلشىسى انتونەللو دە ريۋمەن كەزدەسۋ وتكىزدى.
تاراپتار اگروونەركاسىپتىك كەشەن سالاسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ماسەلەلەرىن تالقىلادى.
ايداربەك ساپاروۆ اۋىل شارۋاشىلىعى سالاسى قازاقستان- يتاليان ارىپتەستىگىنىڭ باسىم باعىتتارىنىڭ ءبىرى ەكەنىن اتاپ ءوتتى.
- اۋىل شارۋاشىلىعى ونىمدەرى ساۋداسىنىڭ تۇراقتى ءوسىمى ەلدەرىمىز ەكونوميكاسىنىڭ جوعارى الەۋەتىن كورسەتەدى. ءبىز ەكسپورت كولەمىن ارتتىرۋعا، ينۆەستيتسيا تارتۋعا جانە اوك سالاسىندا تەحنولوگيالار الماسۋعا مۇددەلىمىز. قازىرگى تاڭدا بىزدە ورگانيكالىق اۋىل شارۋاشىلىعى سەكتورى بەلسەندى دامىپ كەلەدى. ارنايى زاڭ قابىلداندى، بۇگىندە 36 قازاقستاندىق كاسىپورىن ەۋروپاعا ورگانيكالىق ءونىم ەكسپورتتاپ وتىر. وسى باعىتتا ىنتىماقتاستىق ورناتۋعا دايىنبىز، - دەدى مينيستر.
2025-جىلعى قاڭتار-ءساۋىر ارالىعىندا قازاقستان مەن يتاليا اراسىنداعى اۋىل شارۋاشىلىعى ونىمدەرىنىڭ تاۋار اينالىمى 105,9 ميلليون ا ق ش دوللار بولىپ، %59 عا ءوستى. قازاقستاندىق ەكسپورتتىڭ نەگىزگى پوزيتسيالارى بويىنشا ايتارلىقتاي ءوسىم بايقالادى: بيداي - %47 عا، بۇرشاق داقىلدارى - 103 ەسە، كۇنجارا - %100.
ەكسپورتتالاتىن ونىمدەردىڭ ە و ستاندارتتارىنا سايكەستىگى ماسەلەسىنە ەرەكشە نازار اۋدارىلدى.
ايداربەك ساپاروۆ بۇگىندە 20 وتاندىق كاسىپورىن ەۋروپالىق وداققا، سونىڭ ىشىندە يتالياعا، بالىق ونىمدەرىن ەكسپورتتاۋعا رۇقسات العانىن اتاپ ءوتتى. سونداي-اق 2025 -جىلعى ناۋرىزدا قازاقستان ەۋروپالىق وداققا بال ەكسپورتتاۋعا رەسمي رۇقسات الدى. اكۆامادەنيەت جانە جىلقى ەتىن جەتكىزۋ بويىنشا ەۋروپالىق كوميسسيامەن كەلىسسوزدەر جۇرگىزىلىپ جاتىر.
انتونەللو دە ريۋ يتاليا بيزنەسىنىڭ قازاقستانعا جوعارى قىزىعۋشىلىعىن راستاپ، ينۆەستيتسيالىق ارىپتەستىكتى دامىتۋعا قولداۋ كورسەتۋگە دايىن ەكەنىن ءبىلدىردى.
- يتاليا ۇكىمەتى قازاقستانمەن ىنتىماقتاستىققا ۇلكەن ءمان بەرەدى. ساياسي ديالوگپەن قاتار ەكونوميكالىق بايلانىس تا دامىپ كەلەدى، بۇل رەتتە اگروونەركاسىپتىك سەكتور ماڭىزدى ورىن الادى،- دەدى ەلشى.
كەزدەسۋدە بولاشاعى زور ءبىرقاتار جوبا قارالدى، اتاپ ايتقاندا: يتاليالىق Tramite Group كومپانياسىنىڭ قىزاناق وڭدەۋ زاۋىتى، جوڭىشقانى تۇيىرشىكتەۋ زاۋىتى، 20 مىڭ توننا ساقتاۋعا ارنالعان كەپتىرۋ جانە مۇزداتۋ جەمىس كومبيناتى مەن قۋاتتىلىعى 10 مىڭ توننا بولاتىن توڭازىتقىش كەشەن سالۋ جوبالارى.
