قازاقستاندى قانشا بوسقىن پانالاپ ءجۇر

استانا. KAZINFORM - ەڭبەك جانە حالىقتىڭ الەۋمەتتىك قورعاۋ مينيسترلىگىندەگىلەر Kazinform ساۋالىنا جولداعان جاۋابىندا قازاقستاننان قانشا بوسقىن پانا تاپقانىن ايتتى.

«2024 -جىلعى 1-ناۋرىزعا ەلىمىزدە 322 شەتەل ازاماتتارىندا بوسقىن مارتەبەسى بار. بوسقىنداردىڭ باسىم بولىگى الماتى (219 ادام)، شىمكەنت (21 ادام) قالالارىندا، اتىراۋ (15 ادام)، الماتى (13 ادام)، سولتۇستىك قازاقستان (12 ادام)، شىعىس قازاقستان (9 ادام) جانە ت. ب. وبلىستاردا تۇرادى»، - دەلىنگەن جاۋاپتا.

ۆەدومستۆونىڭ دەرەگىنە سۇيەنسەك، ۇلتتىق زاڭناما بوسقىن مارتەبەسى بار ادامدارعا قازاقستان بيۋدجەتىنەن الەۋمەتتىك كومەك اۋلعا مۇمكىندىك بەرەدى. ءبىراق ول مۇمكىندىكتى بوسقىنداردىڭ ەشبىرى پايدالانىپ وتىرعان جوق.

«ق ر الەۋمەتتىك كودەكسىنىڭ 120-بابىنا سايكەس، اتاۋلى الەۋمەتتىك كومەك جان باسىنا شاققانداعى ورتاشا كىرىسى كەدەيلىك شەگىنەن اسپايتىن قازاقستان رەسپۋبليكاسىنىڭ ازاماتتارىنا، قازاقستان رەسپۋبليكاسىندا تۇراقتى تۇراتىن قانداستارعا، بوسقىندارعا، شەتەلدىكتەرگە جانە ازاماتتىعى جوق ادامدارعا بەرىلەدى. ادامداردىڭ (وتباسىلاردىڭ) شارتسىز اقشالاي كومەك نەمەسە شارتتى اقشالاي كومەك تۇرىندەگى اتاۋلى الەۋمەتتىك كومەك الۋعا قۇقىعى بار. الايدا قازىرگى تاڭدا ەلىمىزدە اتاۋلى الەۋمەتتىك كومەك الاتىن بوسقىن مارتەبەسىنە يە شەتەل ازاماتتارى جوق ەكەندىگىن حابارلايمىز»، - دەپ جازىلعان مينيسترلىك جاۋابىندا.

اۆتور
ەسىمجان ناقتىباي