قازاقستاندى مەكەندەيتىن دالا اڭدارى تۋرالى جاڭا كىتاپ شىقتى
استانا. KAZINFORM - بۇگىن ەلوردادا قازاقستاننىڭ بيوالۋانتۇرلىلىگىن ساقتاۋ قاۋىمداستىعى قۇراستىرعان «قازاقستانداعى دالا اڭدارى» كىتابىنىڭ رەسمي تانىستىرىلىمى ءوتتى. كىتاپتا دالا ەكوجۇيەسىندە مەكەندەيتىن سۇتقورەكتىلەر تۋرالى باياندالادى.
قاۋىمداستىق مالىمەتىنشە، قازاقستان اۋماعىنىڭ ۇشتەن ءبىرىن الىپ جاتقان دالالى وڭىرلەر بيولوگيالىق تۇرعىدان باي ەكوجۇيەلەر قاتارىنا جاتادى. باسىلىم وقىرماندى وسى وڭىرلەردە مەكەندەيتىن اڭداردىڭ تۇرلىك قۇرامى، تىرشىلىك ەتۋ ورتاسىنا بەيىمدەلۋى مەن تابيعي تەپە- تەڭدىكتەگى رولىمەن تانىستىرادى. بۇل - كىتاپتىڭ ەكىنشى، تولىقتىرىلعان جانە ورىس تىلىندەگى نۇسقاسى. بۇعان دەيىن، 2023 -جىلى قازاق تىلىندە شىققان. اۆتورلارى - زوولوگ- عالىمدار الەنا كوشكينا، سەرگەي سكليارەنكو جانە يليا سمەليانسكي.
- دالالى جەرلەر - قازاقستاننىڭ جان جۇرەگى. ءبىزدىڭ مىندەتىمىز - ونداعى بيوالۋانتۇرلىلىكتى ساقتاۋ. بۇل قۇرال بىرەگەي الەمدى جەتە تانۋعا جانە ونى قورعاۋعا تالپىناتىن ءار ادام ىزدەپ وقيتىن كىتاپقا اينالادى دەپ ۇمىتتەنەمىز، - دەيدى الەنا كوشكينا.
جاڭا باسىلىمنىڭ ەرەكشەلىگى - جانۋارلار تۋرالى عىلىمي دەرەكتەرمەن قاتار، داريا سكليارەنكونىڭ قولىنان شىققان كوركەم يلليۋستراتسيالارمەن بەزەندىرىلگەن.
- ارينە، كورنەكى شەشىمنىڭ ماڭىزى زور. كىتاپتىڭ باسىم بولىگى سۋرەتتەردەن تۇرادى. سۋرەتشى رەتىندە ماعان ءتۇس پەن كومپوزيتسيانىڭ ۇيلەسىمىن تابۋ، دالا جانۋارلارى مەن لاندشافتارىنىڭ تابيعي ءتۇسىن ءدال بەرۋ ماڭىزدى بولدى. سوندىقتان فوتو جانە ۆيدەو ماتەريالدارعا سۇيەندىم، ساراپشىلارمەن ۇنەمى بايلانىستا بولدىم، - دەيدى يلليۋستراتور.
باسىلىم مەكتەپ وقۋشىلارى، مۇعالىمدەر، ستۋدەنتتەر مەن تابيعات جاناشىرلارىنا ارنالعان. قازاق تىلىندەگى العاشقى نۇسقاسى اۋىل مەكتەپتەرى مەن وڭىرلىك كىتاپحانالاردا كەڭىنەن قولدانىلىپ، وڭ باعاسىن الىپتى.
شىعارۋشى رەداكتور ەلميرا مۋستافينانىڭ ايتۋىنشا، بولاشاقتا كىتاپتىڭ اعىلشىن تىلىندەگى نۇسقاسى ازىرلەنبەك. سونداي-اق قازاق تىلىندەگى العاشقى باسىلىمعا مازمۇندىق جانە كوركەمدىك وزگەرىستەر ەنگىزۋ جوسپارلانعان.
كىتاپتىڭ نەگىزگى بولىگى ءبىلىم بەرۋ ۇيىمدارى مەن كىتاپحانالارعا تەگىن تاراتىلادى. باسىلىمدى مىنا ەلەكتروندىق پوشتاسىنا حات جولداۋ ارقىلى الۋعا بولادى.
ءبىرعانىم ءالي قىزى
