قازاقستانداعى تاسقىن اۋقىمى جاھاندىق جىلىنۋ ۇدەرىسىمەن تىكەلەي بايلانىستى - پرەزيدەنت
استانا. KAZINFORM - پرەزيدەنت قاسىم-جومارت توقايەۆ شاڭحاي ىنتىماقتاستىق ۇيىمىنىڭ سامميتى اياسىندا ءوتىپ جاتقان «ش ى ۇ+» كەزدەسۋىندە ەلدە وتكەن تاسقىنداردىڭ اۋقىمىنا جاھاندىق جىلىنۋ ءۇردىسى ەلەۋلى اسەر ەتكەنىن ايتتى.
جيىن كەزىندە مەملەكەت باسشىسى كليماتتىڭ وزگەرۋى بۇكىل الەم ءۇشىن وزەكتى ماسەلەگە اينالعانىن ايتا كەلىپ، ونىڭ جاعىمسىز اسەرىن قازاقستان دا سەزىنە باستاعانىن اتاپ ءوتتى.
«قازىرگى ناقتى جاعدايدا ەكولوگيا مەن كليماتتىڭ وزگەرۋىمەن كۇرەس سالاسىنداعى ىنتىماقتاستىق ەرەكشە وزەكتى. بۇل سالاداعى جاعداي قاتتى الاڭداتادى. ءبىز بارشا مەملەكەتتەرگە وراسان زور زيان كەلتىرەتىن ءارتۇرلى تابيعي اپاتتاردىڭ ايتارلىقتاي وسكەنىنە كۋا بولدىق. جۋىقتا قازاقستان بۇرىن- سوڭدى بولماعان سۋ تاسقىنىنىڭ زاردابىن باستان وتكەردى. مامانداردىڭ ايتۋىنشا، بۇل تابيعي اپاتتىڭ اۋقىمى جاھاندىق جىلىنۋ ۇدەرىسىمەن تىكەلەي بايلانىستى»، - دەدى قاسىم-جومارت توقايەۆ.
پرەزيدەنت كليمات پروبلەمالارىن جالعىز شەشۋ مۇمكىن ەمەس ەكەنىن اتاپ ءوتتى.
«دۇنيەجۇزىلىك قوعامداستىق بارشا مەملەكەتتى دامىتۋ مەن جاڭعىرتۋدىڭ وزەكتى مىندەتتەرىنە نۇقسان كەلتىرمەستەن ەكونوميكانى كومىرتەكسىزدەندىرۋ جولىنداعى شەشۋشى باعىتتى جالعاستىرۋى كەرەك دەپ ەسەپتەيمىن»، - دەدى مەملەكەت باسشىسى.
ايتا كەتۋ كەرەك، كەزدەسۋگە ش ى ۇ- عا مۇشە 10 مەملەكەتتىڭ باسشىسىمەن قاتار ب ۇ ۇ باس حاتشىسى انتونيۋ گۋتەرريش، ب ا ءا جوعارى فەدەرالدىق كەڭەسىنىڭ مۇشەسى، راس-ءال-حايما ءامىرى ساۋد يبن ساكر ءال-كاسيمي، تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ، موڭعوليا پرەزيدەنتى ۋحنااگيينا حۋرەلسۋحا، ازەربايجان پرەزيدەنتى يلحام اليەۆ، تۇركيا پرەزيدەنتى رەجەپ تايىپ ەردوعان، قاتار مەملەكەتىنىڭ ءامىرى شەيح ءتاميم بەن حاماد ءال ءتاني قاتىسىپ وتىر.
