قازاقستانداعى سۋپەركومپيۋتەرگە جابدىقتار قاي ەلدەن جەتكىزىلەدى

استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ەلىمىزدە جاساندى ينتەللەكت جۇيەلەرىن قۇرۋ سالاسىندا ادامي رەسۋرستار جەتكىلىكتى ەكەنىن ءمالىم ەتتى.

«مينيسترلىك سۋپەركومپيۋتەر ءۇشىن جابدىققا امەريكا قۇراما شتاتتارىنا الدىن الا تاپسىرىس بەردى. دەگەنمەن، قازاقستانعا جابدىقتى جەتكىزۋ مەرزىمى اقش ۇكىمەتىنىڭ قازاقستان رەسپۋبليكاسىنا چيپتەردى ەكسپورتتاۋ تۋرالى قورىتىندىسىن شىعارۋىنا بايلانىستى. امەريكالىق تاراپ ەكسپورت ليتسەنزياسىن الۋ پروتسەسى ۇزاققا سوزىلاتىنىن حابارلادى. بۇل تۇرعىدا ەكسپورتتىق ليتسەنزيانى بەرۋ ۇدەرىسىن جەدەلدەتۋ بويىنشا ءتيىستى شارالار ىسكە اسىرىلىپ جاتىر»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

اتالعان ۆەدومستۆونىڭ مالىمەتىنشە، سۋپەركومپيۋتەردى قۇرۋ قۇنى ءالى بەكىتىلگەن جوق.

«قازاقستاندا جاساندى ينتەللەكت جۇيەلەرىن قۇرۋ جانە وقىتۋ ءۇشىن جەتكىلىكتى ادامي رەسۋرستار بار»، - دەپ ناقتىلادى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنەن.

ەسكە سالساق، بيىل ەلىمىزدە سۋپەركومپيۋتەر ىسكە قوسىلاتىنى حابارلاندى.

2024 -جىلى اقپان ايىندا «سامۇرىق-قازىنا»، سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن Presight قازاقستاندا سۋپەركومپيۋتەر جاساۋ جوباسىنىڭ نەگىزگى شارتتارى تۋرالى كەلىسىمگە قول قويدى.