قازاقستانداعى ەكىنشى ا ە س قاي وبلىستا سالىنۋى مۇمكىن

استانا. KAZINFORM - ەنەرگەتيكا ءمينيسترى الماسادام ساتقاليەۆ ۇكىمەتتە وتكەن بريفينگتە ەكىنشى اتوم ەلەكتر ستانسياسىن سالۋ جوسپارلارى تۋرالى ايتىپ بەردى.

nuclear power plant
Photo: pixabay

ونىڭ ايتۋىنشا، قازاقستانعا يادرولىق كلاستەر قۇرۋ ءۇشىن بىرنەشە ا ە س قاجەت، بۇل يادرولىق سالانى دامىتۋ ءۇشىن بارلىق مۇمكىندىكتى پايدالانۋدى، سونىڭ ىشىندە ۋران ونىمدەرىن ءوندىرۋ مەن عىلىمي الەۋەتتى بارىنشا قولدانۋدى كوزدەيدى.

− بۇگىندە بىزگە ەكىنشى ستانسيانىڭ ورنىن انىقتاۋ تاپسىرماسى بەرىلدى. ورىندى تاڭداۋ كەزىندە بولجامدى ەنەرگيا تەڭگەرىمىن، جۇكتەمە ورتالىقتارىنا جاقىندىعىن جانە ۇلتتىق ەلەكتر جەلىسىنىڭ دامۋ دەڭگەيىن ەسكەرەتىن بولامىز. بۇل جونىندە سىزدەردى حاباردار ەتىپ وتىرامىز، - دەپ جاۋاپ بەردى ا. ساتقاليەۆ ءتىلشى سۇراعىنا.

ازىرگە، جوبانى جۇزەگە اسىرۋ ءۇشىن ىقتيمال ورىنداردىڭ ءبىرى رەتىندە اباي وبلىسىنداعى كۋرچاتوۆ اۋماعى قاراستىرىلۋدا.

− كۋرچاتوۆ پەرسپەكتيۆالىق ورىن رەتىندە قاراستىرىلىپ جاتىر. بۇل ماسەلە بويىنشا ءتيىستى شەشىمدى كوميسسيا قابىلدايدى. ءبىز تالداۋ جۇرگىزەمىز، − دەدى ەنەرگەتيكا ءمينيسترى.

ايتا كەتەيىك، بۇگىن پرەزيدەنت قاسىم-جومارت توقايەۆ العاشقى ا ە س قۇرىلىسىن تەزدەتۋدى جانە ەكىنشى يادرولىق ستانسانى قاي ايماقتا سالۋ قاجەتتىگى جونىندە ۇسىنىم بەرۋدى تاپسىرعان ەدى.

سونداي-اق، ەكىنشى ا ە س سالۋعا قايتادان رەفەرەندۋم وتكىزىلمەيدى.

اۆتور

ايجان سەرىكجان قىزى

سوڭعى جاڭالىقتار