قازاقستانداعى جاپونيا ەلشىسى ەكى ۇلتتىڭ ۇقساستىعى تۋرالى ايتتى

استانا. KAZINFORM - قازاقتار مەن جاپوندار راسىمەن ۇقساي ما؟ قازاقستان رەسپۋبليكاسىنداعى جاپونيانىڭ توتەنشە جانە وكىلەتتى ەلشىسى دجۋن يامادا ەكى ۇلتتىڭ ۇقسايتىندىعىن ايتىپ، مىسال كەلتىردى.

«جاپوندار مەن قازاقتاردىڭ وتە ۇقساس ەكەنىن ءجيى ايتامىز. باسقا ۇلتتارعا قاراعاندا الدەقايدا ۇقساس. ەگەر جاپونيادا قازاق ازاماتىن جەكە تانىماسا، ونىڭ وزگە ۇلت ەكەنىنە سەنبەس ەدى. مەن سىزدەرگە ۆيزۋالدى تۇردە عانا ەمەس، الدەقايدا تەرەڭ تاريحي ءمانى بار مىسال كەلتىرسەم. مىنا مىرزانىڭ كىم ەكەنىن ءبارىڭىز بىلەسىزدەر؟ (ەكراندا ءاليحان بوكەيحانوۆتىڭ فوتو شىقتى). ال ەندى مىنا پورترەت تۋرالى نە ويلايسىزدار؟ بۇل مەيدزي يمپەراتورى دەگەن اتپەن بەلگىلى بولعان جاپون يمپەراتورى مۋتسۋحيتو، قازىرگى يمپەراتوردىڭ اتاسى. بۇل جەردە بەينەلەنگەن مەيدزي يمپەراتوردىڭ كەيبىر زامانداستارى، قازىرگى جاپونيانىڭ قالىپتاسۋىنا ۇلەسىن قوسقان ازاماتتار. قازاققا ۇقسايدى ەمەس پە؟ راسىندا بۇل كىسىلەر ءبىزدىڭ الاش كوسەمدەرى ەدى»، - دەدى دجۋن يامادا ەلوردادا وتكەن ءىس-شارادا.

سونداي-اق، ەلشى مىرزا قازاق-جاپون ۇقساستىعىنىڭ قۇپياسى اشىلاتىندىعىنا سەنىم ارتتى.

«كۇندەردىڭ ءبىر كۇنى عالىمدار مەن تاريحشىلار تاڭعالارلىق ۇقساستىقتىڭ ارتىندا تۇرعان قۇپيانى اشادى. ءبىز قازىردىڭ وزىندە تاريحىمىزدىڭ جەكەلەگەن ورتاق بەتتەرىن ەسكە تۇسىرە الامىز. ولاردىڭ كوبى قايعىلى بولعانىمەن، ءبىزدىڭ ىنتىماقتاستىق جانە باۋىرلاستىق سەزىمىمىزدى ودان سايىن نىعايتا تۇسەدى»، - دەيدى ول.

ودان ءارى دجۋن يامادا ەكى ۇلتقا ورتاق سەمەي جانە حيروسيما-ناگاساكيدە بولعان يادرولىق سىناقتىڭ تاريحىنا توقتالدى.

ايتا كەتسەك، استانادا قازاقستانداعى جاپونيا ەلشىلىگىنىڭ ۇيىمداستىرۋىمەن جاپونيانىڭ 126-ۇلى مارتەبەلى يمپەراتورى نارۋحيتونىڭ 64 جاسقا تولۋىنا وراي سالتاناتتى شارا ءوتتى.

اۆتور

داۋلەت ىزتىلەۋ