قازاقستانداعى «ەڭ باي زەينەتكەر» قانشا الادى؟

ءبىرىڭعاي جيناقتاۋشى زەينەتاقى قورى قازاقستانداعى ەڭ جوعارى زەينەتاقى مولشەرىن جاريالادى، - دەپ حابارلايدى Tengrinews.kz ءتىلشىسى.

ب ج ز ق مالىمەتىنشە، 2023 -جىلى ب ج ز ق سالىمشىلارىنا 591,3 ميلليارد تەڭگە تولەگەن. ونىڭ ىشىندە تۇرعىن ءۇي جاعدايلارىن جاقسارتۋ جانە ەمدەلۋ ماقساتىنداعى ءبىرجولعى زەينەتاقى تولەمدەرى (ب ز ت) - 284 ميلليارد تەڭگە بولسا، جاسىنا بايلانىستى تولەمدەر - 150,6 ميلليارد تەڭگە، ساقتاندىرۋ ۇيىمدارىنا اۋدارىمدار - 54 ميلليارد تەڭگە، مۇراگەرلىك بويىنشا تولەمدەر - 52,6 ميلليارد تەڭگە، قازاقستاننان تىس جەرلەرگە تۇراقتى تۇرۋعا كەتۋگە بايلانىستى تولەمدەر - 39,8 ميلليارد تەڭگە، جەرلەۋگە بەرىلەتىن تولەمدەر - 7,5 ميلليارد تەڭگە جانە مۇگەدەكتىك بويىنشا تولەمدەر - 2,8 ميلليارد تەڭگە.

«اتاپ كەتۋ كەرەك، زەينەت جاسىنا تولۋعا بايلانىستى ب ج ز ق-دان كەستە بويىنشا ورتاشا ايلىق تولەم سوماسى - 32202 تەڭگە، ال اي سايىنعى تولەمنىڭ ەڭ جوعارعى سوماسى - 742692 تەڭگە. ەسكە سالايىق، بىلتىرعى سايكەس كەزەڭىندەگى ب ج ز ق-دان كەستە بويىنشا اي سايىنعى تولەمنىڭ ورتاشا سوماسى - 29973 تەڭگە، ال اي سايىنعى تولەمنىڭ ەڭ جوعارى سوماسى 707326 تەڭگە بولدى»، - دەلىنگەن حابارلامادا.

2024 -جىلعى 1-قاڭتارعا ءبىرىڭعاي جيناقتاۋشى زەينەتاقى قورى سالىمشىلارىنىڭ شوتتارىندا 17,9 تريلليون تەڭگە زەينەتاقى جيناقتارى بولعان. 2023 -جىلى جيناق سوماسى 3,2 تريلليون تەڭگەگە نەمەسە 21,8 پايىزعا ۇلعايعانى ايتىلدى.

2024 -جىلعى 1-قاڭتارداعى جاعداي بويىنشا ب ج ز ق-داعى جەكە زەينەتاقى شوتتارىنىڭ (ج ز ش) سانى 12,3 ميلليونعا جەتكەن.