قازاقستانداعى ايەلدەردە قانداي اۋرۋلار ءجيى كەزدەسەدى - گينەكولوگپەن سۇحبات
قازاقستاندا گينەكولوگيالىق اۋرۋلاردى دياگنوستيكالاۋ جىلدان-جىلعا جاقسارىپ كەلەدى جانە ايەلدەر اراسىندا ميوما، ەندومەتريوز، پرولاپس اۋرۋلارى ءجيى كەزدەسەدى.
وسى ورايدا ق ر پ ءى ب مەديتسينالىق ورتالىعى اۋرۋحاناسى گينەكولوگيا بولىمشەسىنىڭ جەتەكشى مامانى تالعات قاپاقوۆ Kazinform تىلشىسىنە ايەلدەردىڭ دەنساۋلىعى، ەتەككىر كەزىندەگى اۋىرسىنۋ، جۇكتىلىككە دەيىنگى دارۋمەندەر، بەدەۋلىك جانە باسقا دا پروبلەمالار جونىندە سۇحبات بەردى.
- تالعات نۇرلان ۇلى، ەڭ الدىمەن ءوزىڭىز تۋرالى ايتىپ بەرىڭىزشى، ادەتتە گينەكولوگيادا ەر ماماندى كورگەندە ءبىراز ايەلدىڭ تاڭداناتى راس. مەديتسينانىڭ بۇل سالاسىنا قالاي كەلدىڭىز؟
- ۋنيۆەرسيتەتتە وقىپ جۇرگەندە بىزدە كوپتەگەن قىزىقتى پاندەر، كۋرستار بولاتىن. باعىت تاڭداعاندا حيرۋرگياعا، تراۆماتولوگياعا، وفتالمولوگيا، پاتولوگيالىق اناتومياعا، كەيدە ءتىپتى پسيحياتريا سالاسىنا بارعىم كەلەتىن. ءبىر جىلى پەرزەنتحانادا تاعىلىمدامادان وتكەندە العاش رەت بوسانۋ پروتسەسىن كوردىم. كىشكەنتاي ادامنىڭ ۇلكەن ومىرگە كەلۋىن ناعىز عاجايىپ ءسات دەۋگە بولادى. وسىدان كەيىن بالالاردىڭ ومىرگە كەلۋىنە كومەكتەسەمىن دەپ اكۋشەرلىك باعىتتى تاڭدادىم. ارينە، اكۋشەرلىك گينەكولوگياسىز، گينەكولوگيا اكۋشەرلىكسىز بولمايدى، ەكەۋى ءبىر-بىرىمەن تىعىز بايلانىستى. ۋاقىت وتە كەلە اكۋشەرلىكپەن قاتار گينەكولوگيادا دا جەدەل كومەك كورسەتە باستادىق.
وسىلايشا، 2009 -جىلى استانا مەديتسينالىق ۋنيۆەرسيتەتىن ءبىتىرىپ، 2011 -جىلى كلينيكالىق رەزيدەنتۋراعا ءتۇستىم. «بولاشاق» باعدارلاماسىنا قۇجات تاپسىرىپ، 2014-2016 -جىلدارى اقش- تىڭ پەنسيلۆانيا شتاتىنىڭ پيتسبۋرگ قالاسىندا اكۋشەرلىك جانە گينەكولوگيا بويىنشا تاعىلىمدامادان ءوتتىم. ونداعى اكۋشەرلىك بويىنشا ۇسىنىمدار، حاتتامالار بىزدەگى جاعدايعا ۇقساس بولسا، گينەكولوگيا سالاسىندا تۇبەگەيلى جاڭاشىلدىقتاردى كوردىم. وندا بىزدەگىدەي بولەك ەمحانا جوق، وتا جاسايتىن دارىگەردىڭ ءوزى ناۋقاستى قابىلداپ، تەكسەرۋدەن وتكىزەدى، مەديتسينا جۇيەسى، ناۋقاسقا قارىم- قاتىناس، قۇرال-جابدىق تۇرلەرى باسقاشا بولاتىن. ءبىز دە وسى جۇيەگە بىرتىندەپ كەلە جاتىرمىز. سول تاعىلىمدامادا ەكى جىل ءجۇرىپ، ۇيرەنگەن ءبىلىمىمدى قازاقستاندا قولدانىسقا ەنگىزىپ جاتىرمىن. قازىر تەك قانا گينەكولوگيا سالاسىندا جۇمىس ىستەيمىن.
- مەديتسينالىق ورتالىقتىڭ مۇمكىندىكتەرى قانداي؟ ءبىر اپتادا قانشا وتا جاسايسىز؟ كوپ جاعدايدا ايەلدەر قانداي شاعىممەن كەلەدى؟
- بۇل ورتالىقتا حالىقارالىق ستاندارتتارعا سايكەس كەلەتىن جابدىقتاردىڭ جاقسى ارسەنالى بار جانە گينەكولوگيالىق وتالاردىڭ بارلىق ءتۇرىن ورىنداي الامىز. ونىڭ ىشىندە روبوت قوندىرعىسىمەن وتا جاسايتىن قازاقستانداعى العاشقى ورتالىقتاردىڭ ءبىرىمىز. ياعني ءبىز بۇگىندە اشىق، ۆاگينالدى، ەندوسكوپيالىق، لاپوروسكوپيالىق جانە روبوت ارقىلى وتا جاسايمىز.
وپەراتسيا سانىنا قاتىستى ناقتى سان جوق، دەگەنمەن شامالاي العاندا، ءبىزدىڭ بولىمدە اپتاسىنا 30-عا جۋىق وتا جاسالادى. بارلىق جەردەگى ستاتيستيكا بويىنشا، بىزدە دە ءبىرىنشى ورىندا قاتەرسىز ىسىكتەردى، اتاپ ايتقاندا ميومانى الىپ تاستاۋ وتاسى تۇر. جاتىر ميوماسى، جىلاۋىق (كيستا) - ايەلدەردە ءجيى كەزدەسەتىن پاتولوگيا. وكىنىشكە وراي، كوپتەگەن ناۋقاستار بەدەۋلىكتى حيرۋرگيالىق جولمەن ەمدەۋگە كەلەدى. سونداي-اق، سوڭعى ۋاقىتتا ەندومەتريوز بەن پرولاپس كوپ انىقتالىپ جاتىر.
قازاقستانداعى ستاتيستيكا دا بۇكىل الەمدەگىدەي، اسا ەرەكشەلەنبەيدى. اۋرۋلار جىلدان- جىلعا جاسارۋدا، دياگنوستيكا جاقسارىپ كەلەدى. مەديتسينا شالعاي اۋىلدارعا، اۋدان ورتالىقتارىنا جەتىپ، ماماندار ءموبيلدى بولا باستادى. سوندىقتان بىزدە جىل سايىن ناۋقاستار مەن وتا سانى ارتىپ كەلەدى. وسىلايشا، ەلىمىزدە قازىرگى ۋاقىتتا جاتىر ميوماسى بارلىق گينەكولوگيالىق اۋرۋلاردىڭ 30 پايىزدان استامىن الادى. سونداي-اق، 30-40 پايىز ايەلدەردە جىنىس مۇشەلەرى پرولاپسى بايقالادى جانە ارينە، ەندومەتريوز بار.
- ەندومەتريوز تۋرالى تولىعىراق بىلۋگە بولا ما؟ مەنىڭ بىلۋىمشە، بۇل جاڭا اۋرۋ ءتۇرى عوي؟
- ءيا، مەديتسينادا ەندومەتريوزدى انىقتاۋ مەن ەمدەۋ، وتا جاساۋ 20 جىل بۇرىن قولعا الىندى. بۇل ەندومەتريا ءتارىزدى جاسۋشالاردىڭ وسۋىنە بايلانىستى اۋرۋ. ادەتتە بۇل جاتىر قۋىسىندا ءوسۋى كەرەك، ال جاتىر سىرتىنا - انالىق بەزدەرگە، تۇتىكتەرگە، ىشەكتەرگە، كوك شاندىرعا، قۋىققا ءوتىپ كەتسە، ەندومەتريوز دياگنوزى قويىلادى. ونى ەمدەمەي جۇرە بەرسە، اۋىر سالدارعا اكەپ سوعۋى مۇمكىن.
ەندومەتريوز - قاتەرسىز اۋرۋ، ءبىراق كەيبىر جاعدايلاردا قاتەرلى ىسىك سياقتى ارەكەت ەتەدى. ياعني، اۋرۋ اسقىنىپ، ايەلدىڭ جىنىس مۇشەسى اينالاسىنداعى ورگاندار مەن تىندەرگە تاراي باستايدى. ءتىپتى كەيبىر ەلدەردە ەندومەتريوزدىڭ كۇردەلى تۇرلەرىمەن اۋىرعاندارعا مۇگەدەكتىك تاعايىندالىپ جاتىر. سەبەبى بۇل ءومىر ساپاسىنا قاتتى اسەر ەتەدى. ءبىراق ەندومەتريوزدىڭ اگرەسسيۆتى ەمەس تۇرلەرى دە بار. ءتىپتى كەي ايەلدەر ەش سيمپتوم بايقاماي، ەندومەتريوز بار ەكەنىن بىلمەي دە ءومىر سۇرە بەرەدى. ددسۇ مالىمەتىنشە، بۇكىل الەمدە رەپرودۋكتيۆتى جاستاعى ايەلدەر مەن قىزداردىڭ شامامەن 10 پايىز ەندومەتريوزدىڭ الۋان تۇرلەرىنەن زارداپ شەگۋدە.
ەندومەتريوزدىڭ ءجيى كەزدەسەتىن بەلگىلەرى - ەتەككىر كەزىندەگى اۋىرۋ، سودان كەيىن جىنىستىق قاتىناس كەزىندە قولايسىز اۋىرسىنۋ سەزىمدەرى پايدا بولا باستايدى. ەندومەتريوزدىڭ اۋىر ءتۇرى بولسا - قاتتى ءىش قاتۋ، ءزار شىعارۋدىڭ بۇزىلۋى (قانمەن) بايقالادى. ياعني، بۇل اۋرۋدىڭ ءارتۇرلى بەلگىسى بار جانە كىمدە قانداي سيمپتوم بولارىن بولجاۋ قيىن.
ازىرگە ەندومەتريوزدىڭ نەدەن تۋىندايتىنى، ونىڭ الدىن الۋ جولدارى تابىلعان جوق. ءتىپتى امەريكالىق دارىگەرلەر دە بۇل اۋرۋدىڭ قالاي پايدا بولاتىنىن بىلمەيتىنىن ايتۋدا. ءالى كۇنگە دەيىن بۇكىل الەمدە ەندومەتريوز زەرتتەلىپ، جاڭا ەمدەۋ ادىستەرى ىزدەلۋدە. ءبىراق ءبىز ونى قالاي دياگنوستيكالاۋ كەرەگىن جانە قالاي ەمدەۋ كەرەگىن ءبىلۋىمىز كەرەك. ەگەر ايەل جىنىستىق ءومىردى باستاسا نەمەسە 21 جاستان اسقان بولسا، جىلىنا ءبىر رەت گينەكولوگقا تەكسەرىلۋ ۇسىنىلادى. مىندەتتى الەۋمەتتىك مەديتسينالىق ساقتاندىرۋ ارقىلى دا كوپتەگەن گينەكولوگيالىق قىزمەتتەر قولجەتىمدى.
- سوسىن ەتەككىر سيكلىنىڭ رەتسىزدىگى مەن اۋىرسىنۋ ايەلدەردە ءجيى كەزدەسەتىن سەكىلدى. بۇل اۋىرسىنۋدى باسۋ ءۇشىن ءتۇرلى پرەپارات ءىشۋ دەنساۋلىققا زيان ەمەس پە؟
- ادەتتە ەتەككىر اراسىنداعى سيكل 28 كۇن بولادى جانە 7+/- كۇن اۋىتقۋ قالىپتى بولىپ سانالادى. ءبىزدىڭ قوعامداعى ايەلدەردىڭ توزىمدىلىگى قايران قالدىرادى، ەتەككىر سيكلى بۇزىلسا دا، اۋىرسا دا، بارىنە شىداپ، وتباسىن، جۇمىسىن، باسقا شارۋالارىن ويلاپ جۇرە بەرەدى. ەمحاناعا دەر كەزىندە كەلمەيدى، اۋىر سالدارى شىققاندا عانا ەم ىزدەپ باستايدى. ەتەككىر تسيكلىنىڭ دۇرىستىعىنا باسا ءمان بەرگەن ءجون، بۇل تۇتاس گورمونالدى فوننىڭ كورسەتكىشى. ياعني، تۇراقتى، كوپ قان كەتپەيتىن، اۋىرمايتىن ەتەككىر - ايەلدىڭ رەپرودۋكتيۆتى دەنساۋلىعى وتە جاقسى ەكەنىن بىلدىرەدى.
ەتەككىر كەزىندەگى اۋىرسىنۋدى باسۋ ءۇشىن گينەكولوگ ناۋقاسقا ستەرويدسىز پرەپاراتتار جازىپ بەرۋى مۇمكىن، بۇل دا قالىپتى جاعداي. الايدا، دارىگەر قاداعالاۋىنسىز، ءدارى-دارمەكتى بەيبەرەكەت ىشە بەرۋگە بولمايدى. ماسەلەن، گاستريتى بار ناۋقاستار مۇنداي دارىلەردى كوپ ىشسە، اسقازان، ىشەك قۇرىلىسى جۇمىسى بۇزىلادى. نەگىزىندە تسيكلدىڭ بۇزىلۋىن قالىپقا كەلتىرەتىن زاماناۋي جاقسى، گورمونالدى پرەپاراتتار بار. اۋىرۋدى باساتىن ءدارىنى ىشە بەرگەنشە، تۇتاس گورمونالدى فوندى قالپىنا كەلتىرۋ كەرەك. كوبىنەسە ايەلدەر گورمونالدى پرەپاراتتار سەمىزدىككە اكەلەدى دەپ ويلايدى. جوق، گورمونالدى پرەپاراتتار اشىعۋ سەزىمىن ازداپ كۇشەيتەدى. بۇل جاعدايدا نان مەن ماي ەمەس، ءسابىز بەن الما جەپ، سالماقتى قاداعالاۋعا بولادى.
جالپى، ەتەككىر كەزىندەگى اۋىرسىنۋ نورما ەمەس، بۇل پاتولوگيا. مۇنىڭ ءبارى جىنىستىق جەتىلۋ كەزەڭىندە، 13-14 جاسقا تولعاندا باستالادى. ال ولاردىڭ انالارى 30-40 جىل بۇرىن ەتەككىردى باستان كەشىرگەن، سول كەزدە گينەكولوگقا بارا الماعان، ۋلترادىبىستىق نەمەسە زاماناۋي پرەپاراتتار بولماعان. ولار ءومىر بويى وسى ازاپپەن ءومىر ءسۇردى جانە قىزدارىنا كۇيەۋگە شىققاندا، بالا تۋعاندا ەتەككىردىڭ اۋىرعانى باسىلادى دەپ جۇباتادى. دارىگەر رەتىندە مەنىڭ ايتارىم، مۇنداي اۋىرۋعا ءتوزۋدىڭ قاجەتى جوق، بۇل بولاشاقتا جاعىمسىز سالدارعا اكەلۋى مۇمكىن.
- تاعى ءبىر وتە وزەكتى ماسەلە - ەلىمىزدە 26 مىڭ ايەل «بەدەۋلىك» دياگنوزىمەن ەسەپتە تۇر. قىز بالا بەدەۋلىكپەن دۇنيەگە كەلە مە الدە بۇل جۇرە كەلە پايدا بولا ما؟
- ەگەر ءبىر جىل بويى تابيعي جولمەن جۇكتىلىك بولماسا، تەك قانا ايەل ەمەس، ەرى دە رەپرودۋكتولوگقا قاتار تەكسەرىلۋى كەرەك. رەپرودۋكتولوگ - بەدەۋلىك ماسەلەسىمەن اينالىساتىن مامان، بۇل ونىڭ تىكەلەي قىزمەت سالاسى. ال ەگەر شىنىندا دا كىنارات ايەلدەن بولسا، ونى ءبىز سياقتى حيرۋرگيالىق گينەكولوگقا وتا جاساۋعا جىبەرەدى.
بەدەۋلىكتىڭ 80-90 پايىزى تۋعاننان ەمەس، كەيىن پايدا بولعان. ايەلدەر بەدەۋلىگىنىڭ ەڭ كوپ تاراعان سەبەبى - تۇتىكشە بەدەۋلىگى. بۇل جاعدايدا جاتىر تۇتىكتەرى انالىق جاسۋشا مەن سپەرماتوزويدتاردى وتكىزبەيدى جانە بۇل ەمدەلمەيدى. وعان ءتۇرلى اۋرۋلار، وتا نەمەسە ابورتتار سەبەپ بولۋى مۇمكىن. سوندىقتان قىز بالا ەرتە جاستان دەنساۋلىعىن كۇتۋى كەرەك، ءجونسىز، قورعانىشسىز جىنىستىق قاتىناسقا جول بەرمەگەن ءجون.
- جۇكتىلىك ءۇشىن ەڭ قولايلى جاس قانشا؟ «ۋاقىت ءوتىپ بارادى، چاسيكي تيكايۋت» دەگەن سوزدەرگە نەگىز بار ما؟
- جۇكتىلىكتىڭ تىم ەرتە بولعانى دا دۇرىس ەمەس. ەڭ قولايلى كەزەڭ - 21-27 جاس ارالىعى. ەرتە زامانداردا قىز بالا 14-15 جاستا تۇرمىسقا شىعىپ، بالا تاپقان دەگەن فاكتىلەر بار. ءبىراق ول زاماندا ەشكىم ستاتيستيكا جۇرگىزگەن جوق، قانشا بالانىڭ شەتىنەگەنىن، قانشا انانىڭ ءولىپ كەتكەنىن بىلمەيمىز. مۇگەدەكتىكپەن تۋعان بالالار سول عاسىرلاردا دا بولدى. سوندىقتان اعزا تۇتاس جەتىلگەندە عانا جۇكتىلىكتى جوسپارلاۋ كەرەك.
قازىرگى زاماناۋي الەمدە كوپتەگەن قىزدار مانساپ تۋرالى ويلايدى، الەۋمەتتىك، تۇرعىن ءۇي، قارجىلىق جاعدايلارىن جاقسارتقىسى كەلەدى، سوندىقتان تۇرمىس قۇرۋ مەن ءسابي ءسۇيۋ ەكىنشى ورىنعا قالىپ قويۋدا. قىرىق جاسقا تاقاعاندا تۇرمىسقا شىعىپ، بالا كوتەرەيىن دەسە، فولليكۋلالار، ۇرىق جاسۋشالارى ازايعان، گورمونالدى فونى بۇزىلعان بولادى. جاس ۇلعايعان سايىن باسقا دا نەشە ءتۇرلى اۋرۋلار تۋىندايدى. سوندىقتان مەن مانساپ تۋرالى ويلايتىن قىزدارعا 30 جاستان كەيىن رەپرودۋكتولوگقا بارىپ، ساپالى ۇرىق جاسۋشالارىن مۇزداتىپ قويۋعا كەڭەس بەرەمىن. مۇنداي ساقتاۋ تاسىلدەرى قازاقستاننىڭ كەز كەلگەن قالاسىندا قولجەتىمدى.
- ەلىمىزدە «جۇكتىلىككە الدىن الا دايىندالۋ» ترەندى كەڭ تارالىپ كەلەدى. جۇكتىلىكتىڭ جاقسى ءوتۋى ءۇشىن ايەل نە ىستەۋى كەرەك؟ قازىر فولي قىشقىلى، ناۋرىزگۇل مايى، ومەگا-3 سەكىلدى وتە كوپ دارۋمەندەر جارنامالانىپ جاتىر، ولاردىڭ قايسىسىن ءىشۋ كەرەك؟
- جۇكتىلىكتى جوسپارلاۋ كەزىندە تۇرعىلىقتى جەردەگى ەمحاناعا بارۋ كەرەك نەمەسە جەكە قالاساڭىز، رەپرودۋكتولوگقا بارۋعا بولادى. مىسالى، 40 جاستا ۇرىقتا گەنەتيكالىق جانە حروموسومالىق اۋرۋلار قاۋپى ارتادى. سوندىقتان ولار سكرينينگ جاساپ، سىنامالار الادى، گەنەتيككە باعىتتايدى. وكىنىشكە وراي، ناۋقاستاردان كوممەرتسيالىق پايدا ىزدەيتىن، ارتىق پرەپاراتتار تاعايىندايتىن ارىپتەستەرىمىز دە بار. جالپى دەنى ساۋ ادامدارعا ەشقانداي دارۋمەن، قوسپالار قاجەت ەمەس، وعان دۇرىس تاماقتانۋ مەن قالىپتى ءومىر ءسۇرۋدىڭ ءوزى جەتكىلىكتى.
جۇكتىلىككە دايىندىق كەزىندە قولدانۋعا بولاتىن جالعىز ۆيتامين - فولي قىشقىلى. دەنەدەگى فولي قىشقىلىنىڭ جەتىسپەۋشىلىگى ۇرىقتا جۇيكە جۇيەسى اۋرۋلارىن تۋىنداتۋى مۇمكىن ەكەنى دالەلدەنگەن. سوندىقتان فولي قىشقىلى - جۇكتىلىككە دەيىن جانە جۇكتىلىك كەزىندە 12 اپتاعا دەيىن بارلىعىنا ۇسىنىلاتىن جالعىز ۆيتامين.
وتاندىق مەديتسينادا، سىناما تالداۋلارىندا كەي ۆيتاميندەردىڭ جەتىسپەۋشىلىگى اۋرۋ نەمەسە پاتولوگيا رەتىندە قاراستىرىلادى. بۇل دۇرىس ەمەس. ءبىزدىڭ ەلىمىز - يودتىڭ ەندەميكالىق ايماعى، د دارۋمەنىنىڭ تاپشىلىعى مەن انەميا دا ءجيى كەزدەسەدى. بۇل ءبارىمىزدىڭ اۋرۋ ەكەنىمىزدى بىلدىرمەيدى عوي. سوندىقتان قاعازداعى كورسەتكىشتەردى ەمەس، ادامدى، ونىڭ بويىنداعى ناقتى كلينيكالىق بەلگىلەردى ەمدەۋ كەرەك. دارىگەر اعزاعا قاجەت دەپ تاپقان دارۋمەندەردى جازسا، سونى الۋ كەرەك.
- سونىمەن بىرگە، جىنىستىق ساۋات تاقىرىبى قوعامدا جىلدار بويى وتە قىزۋ تالقىلانىپ كەلەدى. ءسىزدىڭ پىكىرىڭىزشە، جىنىستىق ساۋاتتى قانشا جاستان باستاۋ كەرەك جانە قالاي ۇيىمداستىرعان ءجون؟
- مەنىڭ جەكە ويىمشا، بۇل ماسەلەدە كوپتەگەن پىكىرتالاستىڭ تۋىنداۋى حالقىمىزدىڭ مەكتەپتە مۇنداي تاقىرىپتى بالالارمەن اشىق تالقىلاۋعا ءالى دايىن ەمەستىگىن كورسەتىپ وتىر. سونداي-اق، كەي بالالاردىڭ ءبىلىمقۇمارلىعى، ىزدەنىمپازدىعى جوعارى بولادى، جىنىسقا قاتىستى سۇراق قويسا، سول بالانىڭ ءوزىن جازعىرىپ، مازاقتايتىندار، بۋللينگ جاسايتىندار بولادى. سول سەبەپتى، ءاربىر ەمحانادا انونيمدى كابينەت اشىلۋى كەرەك دەپ ويلايمىن. ءاربىر اتا-انا جاس ءوسپىرىم بالاسىن سول كابينەتكە اپارسا، وندا تاجىريبەلى پسيحولوگ نەمەسە گينەكولوگ جاسوسپىرىمگە ءبارىن ءجىتى تۇسىندىرسە، دەنساۋلىق پەن قاۋىپسىزدىكتىڭ ماڭىزىن ايتسا، تۇتاس قوعامداعى جىنىستىق ساۋات ەداۋىر ارتار ەدى.
- سۇحبات سوڭىندا ايەلدەرگە دەنساۋلىق پەن گيگيەنا بويىنشا قانداي كەڭەس بەرەر ەدىڭىز؟
- ەڭ ماڭىزدى كەڭەستەر - جۇكتىلىككە دەيىن دەنساۋلىقتى كۇتۋ، سپورتپەن اينالىسۋ، دۇرىس تاماقتانۋ، جوسپارسىز جۇكتىلىكتەن قورعانۋ. ويتكەنى، ءبىز ەشكىمگە جىنىستىق ءومىر سۇرمە، نەكەگە دەيىن ەشكىممەن كەزدەسپە دەپ ايتا المايمىز. بۇل ءار ادامنىڭ جەكە تاڭداۋى. ءبىراق كۇندەلىكتى تاجىريبەدە سومكەدە مۇشەقاپ الىپ جۇرۋگە كەڭەس بەرەمىن. بۇل تەك قانا ەر ادامنىڭ مىندەتى ەمەس. ەر ادام جاۋاپسىز بولۋى مۇمكىن، ال سالدارىن تەك قانا ايەل تارتادى. وعان قوسا، ايەلدەرگە ءوز بەتىمەن ەمدەلمەي، بىلىكتى دارىگەرگە بارۋعا جانە جىلى كيىنۋگە كەڭەس بەرەمىز. ەڭ ماڭىزدىسى وسىلار.
- مازمۇندى سۇحباتىڭىز ءۇشىن كوپ راحمەت!
اۆتور
ايجان سەرىكجان قىزى
