قازاقستاندا ينفلياتسيا قارقىنى بىرتىندەپ باياۋلاي باستادى

استانا. قازاقپارات - 2026-جىلعى ناۋرىزدا قازاقستانداعى ينفلياتسيا باياۋلاپ، ايلىق ءوسىم 0,6 پايىزدى قۇرادى. باعا ءوسىمىنىڭ قارقىنى اقپانمەن سالىستىرعاندا تومەندەپ، ازىق-تۇلىك، ازىق-تۇلىككە جاتپايتىن تاۋارلار جانە اقىلى قىزمەتتەر سەگمەنتتەرىندە دە بىردەي ءۇردىس بايقالدى.

دەگەنمەن جەكەلەگەن تاۋارلار مەن قىزمەت تۇرلەرى بويىنشا باعا ايتارلىقتاي قۇبىلىپ، جىلدىق ينفلياتسيا دەڭگەيى ءالى دە جوعارى - 11 پايىز شاماسىندا قالىپ وتىر. بۇل تۋرالى ۇلتتىق ستاتيستيكا بيۋروسى ءمالىم ەتتى.

اقپانمەن سالىستىرعاندا باعانىڭ ءوسۋ قارقىنى 0,5 پايىز تارماققا باياۋلادى. باعا ءوسىمىنىڭ باياۋلاۋى بارلىق قۇرامداس بولىكتەردە دە بايقالدى: ازىق-تۇلىك تاۋارلارىنىڭ باعاسى 0,7 پايىز، اقىلى قىزمەتتەر - 0,6 پايىز، ازىق-تۇلىككە جاتپايتىن تاۋارلار 0,5 پايىز ءوستى.

ازىق-تۇلىك اراسىندا ءبىر اي ىشىندە باعا قيارعا - 22,6 پايىز، پيازعا - 10,9 پايىز، قىزاناققا - 2,6 پايىز، قىرىققاباتقا - 1,9 پايىز، قاراقۇمىق جارماسىنا - 1,2 پايىز، شوكولادقا بوككەن كامپيتتەرگە - 0,9 پايىز تومەندەدى. بۇل ورايدا باعا ءتاتتى بۇرىشقا - 10,7 پايىز، بانانعا - 5,4 پايىز، قىزىلشا مەن سابىزگە - 4,2 پايىزدان، مايلىلىعى 2-3 پايىز ايرانعا - 2,3 پايىز، بالعا - 1,8 پايىز، قانتتى پەچەنە مەن سيىر باۋىرىنا - ءارقايسى 1,3 پايىزدان وسكەن.

ازىق-تۇلىككە جاتپايتىن تاۋارلار اراسىندا شاڭسورعىش باعاسى 8,2 پايىز، ۇتىك - 7,7 پايىز، سمارتفون - 2,7 پايىز، اۆتوموبيلدەر - 2,3 پايىز، ايەلدەر سومكەسى - 2,1 پايىز تومەندەگەن. باعانىڭ ءوسۋى التىن ساقينا، ءاس ۇي پەشى - 5,5 پايىز، تەلەديدار - 4,1 پايىز، سىمسىز قۇلاققاپتار - 2,2، كورۆالول - 1,7 پايىز، قولعا جاعاتىن كرەم - 1,4 پايىز، سەمەنتكە - 1,3 پايىز بايقالدى. قىزمەتتەر اراسىندا باسسەينگە بارۋ (ابونەمەنت) باعاسى 3,3 پايىز، ەلەكتريك قىزمەتتەرى - 2,1 پايىز، كاريەستى ەمدەۋ - 1,6 پايىز، قالاارالىق اۆتوبۋستا جول ءجۇرۋ - 1,1 پايىز، اۆتومەكتەپتە وقۋ كۋرستارى 0,8 پايىز وسكەن.

جىلدىق ينفلياتسيا ءمانى 2026-جىلدىڭ ناۋرىزىندا 11 پايىز قۇرادى جانە اقپانمەن سالىستىرعاندا 0,7 پايىزدىق تارماققا باياۋلادى. ازىق- تۇلىك تاۋارلارىنىڭ باعاسى 11,7 پايىز، ازىق-تۇلىك ەمەس تاۋارلار - 11,3 پايىز، اقىلى قىزمەتتەر - 10 پايىز وسكەن. جىلدىق ماندە قيار باعاسى 40,9 پايىز، قىزاناق 16,5 پايىز، باكلاجان 14,8 پايىز، كۇرىش 5 پايىز ارزانداعان. كەرىسىنشە ءبىر جىل ىشىندە الما 13,5 پايىز، سۇلى 12,9 پايىز، كەسپە 12 پايىز، قارا شاي 6,7 پايىز قىمباتتاعان.

2025-جىلدىڭ ناۋرىزىمەن سالىستىرعاندا سۋسابىننىڭ باعاسى 13,9 پايىز، كىر سابىن - 7,3 پايىز، جايما داستارحان - 6,5 پايىز، تۇسقاعاز - 3,3 پايىز، بولمە وسىمدىكتەرى - 3,2 پايىز وسكەن. قىزمەتتەر اراسىندا سالەمدەمەلەردى جەتكىزۋ بويىنشا كۋرەر قىزمەتىنىڭ باعاسى 14,3 پايىز، مەرەكەلەردى ۇيىمداستىرۋ بويىنشا قىزمەتتەر - 10,8 پايىز، تەلەديداردى جوندەۋ - 7 پايىز، بالالاردى دامىتۋ ورتالىقتارىنىڭ قىزمەتتەرى - 6,9 پايىز قىمباتتاعان.

- ينفلياتسيا دەڭگەيىن سيپاتتايتىن تۇتىنۋ باعالارى يندەكسىنىڭ كورسەتكىشى اي سايىن ەسەپتەلەدى. باقىلاۋلار قىزمەتتەر مەن تاۋارلاردىڭ تاريفتەرى مەن باعالارى - بارلىعى 537 پوزيتسيا بويىنشا جۇرگىزىلەدى. ينفلياتسيا بويىنشا ديناميكالىق وزگەرىستەردى 2018-جىلدان باستاپ كورسەتكىشتەر قامتىلعان ارنايى ازىرلەنگەن ينتەراكتيۆتى داشبوردتا كورۋگە بولادى، - دەلىنگەن حابارلامادا.

2026-جىلعى قاڭتاردان باستاپ تۇتىنۋ باعالارىنىڭ يندەكسىن ەسەپتەگەندە ازىق-تۇلىك تاۋارلارىنىڭ ۇلەسى - 41,1 پايىز، ازىق-تۇلىك ەمەس تاۋارلار - 28,4 پايىز، اقىلى قىزمەتتەر 30,5 پايىز قۇرادى.

بۇعان دەيىن قازاقستاندا ازىق-تۇلىك ينفلياتسياسى 12,7 پايىزعا دەيىن تومەندەگەنىن جازدىق.