قازاقستاندا پويىزدا نە ىستەۋگە بولمايدى؟
استانا. KAZINFORM - بارلىق جولاۋشىنىڭ قاۋىپسىزدىگى مەن جايلىلىعى ءۇشىن پويىزدا ساقتاۋ كەرەك جالپىعا ورتاق ەرەجەلەر بار.
«جولاۋشىلار تاسىمالى» كومپانياسىنىڭ باسپا ءسوز قىزمەتى Tengri Travel-گە پويىزداردا نە ىستەۋگە بولمايتىنىن ايتتى.
بيلەتسىز ءجۇرۋ
جولاۋشىلارعا ۆاگوندا بيلەتسىز جۇرۋگە تىيىم سالىنادى. جولسەرىكتەر مەن تەكسەرۋشىلەر كەز كەلگەن ۋاقىتتا سىزدەن بيلەت تالاپ ەتۋگە قۇقىلى.
بالالاردى راستايتىن قۇجاتتارسىز تاسىمالداۋ
بالانىڭ جەكە باسىن كۋالاندىراتىن، تۋىستىعىن (نەمەسە زاڭدى قامقورشىلىعىن) راستايتىن قۇجاتتارسىز، سونداي-اق ەگەر بالا ءۇشىنشى تۇلعالارمەن ساياحاتتاسا، نوتاريالدى كۋالاندىرىلعان سەنىمحاتسىز تاسىمالداۋعا قاتاڭ تىيىم سالىنادى.
راسىمدەلمەگەن باگاجدى الدىن الا تولەمسىز الىپ ءجۇرۋ
الدىن الا تولەمسىز جانە راسىمدەلگەن قۇجاتسىز بەلگىلەنگەن نورمادان اساتىن (ءبىر جولاۋشىعا 35 كيلوگرامنان استام) باگاجدى تاسىمالداۋعا تىيىم سالىنادى.
جانۋارلاردى ءتيىستى قۇجاتتارسىز تاسىمالداۋ
جانۋارلاردى ۆەتەرينارلىق قۇجاتتارسىز تاسىمالداۋعا تىيىم سالىنادى. قاجەتتى قۇجاتتار بولماعان جاعدايدا جولاۋشىنى پويىزعا وتىرعىزبايدى.
پويىزدا تەمەكى شەگۋ
پويىزداردا تەمەكى شەگۋگە قاتاڭ تىيىم سالىنادى، ونىڭ ىشىنە كادىمگى تەمەكى مەن ەلەكتروندى تەمەكى دە كىرەدى. جولاۋشى بۇل تىيىمدى بۇزسا، ول اكىمشىلىك جاۋاپكەرشىلىككە تارتىلۋى جانە ونىڭ جاقىن ماڭداعى ستانسيادان ءتۇسىپ قالۋىنا اكەلۋى مۇمكىن.
توقتاتۋ كرانىن قاجەتسىز پايدالانۋ
توقتاتۋ كرانىن نەگىزسىز پايدالانۋعا قاتاڭ تىيىم سالىنادى. بۇل پويىزدىڭ ءجۇرۋ كەستەسىن بۇزۋى، باسقا جولاۋشىلارعا قولايسىزدىق تۋدىرۋى جانە اكىمشىلىك جاۋاپكەرشىلىككە اكەلۋى مۇمكىن.
تىيىم سالىنعان زاتتاردى تاسىمالداۋ
پويىزدا ەسىرتكى، جارىلىس قاۋپى بار زاتتاردى تاسىمالداۋعا قاتاڭ تىيىم سالىنادى. مۇنداي بۇزۋشىلىقتار انىقتالعان جاعدايدا جولاۋشى قۇقىق قورعاۋ ورگاندارىنا جىبەرىلەدى.
اگرەسسيا كورسەتۋ نەمەسە جانجال تۋدىرۋ
فيزيكالىق نەمەسە پسيحولوگيالىق زورلىق-زومبىلىقتىڭ كەز كەلگەن تۇرىنە، سونىڭ ىشىندە اۋىزشا قورلاۋعا قاتاڭ تىيىم سالىنادى. جولاۋشىلار بۇل ەرەجەنى بۇزسا، ولاردى جاقىن ماڭداعى ستانسيادان شىعارىپ جىبەرۋى مۇمكىن.
ءجۇرىپ بارا جاتقان پويىزدان شىعۋ
مۇنداي ارەكەتتەر ادام ءومىرى مەن دەنساۋلىعىنا وتە قاۋىپتى، سونىمەن قاتار ول ەرەجەلەردى بۇزۋ بولىپ سانالادى. پويىزدان تەك ستانسيالاردا جانە وعان ارنالعان ەسىكتەر ارقىلى شىعۋعا بولادى.
ۆاگوندى لاستاۋ نەمەسە مۇلىكتى بۇزۋ
ۆانداليزمگە، ۆاگونداردى لاستاۋعا جانە «جولاۋشىلار تاسىمالى» كومپانياسىنىڭ مۇلكىنە زاقىم كەلتىرۋگە تىيىم سالىنادى.
الكوگول ءىشۋ
مەيرامحانا ۆاگوندارىن قوسپاعاندا بارلىق پويىز ۆاگونىندا الكوگول ىشۋگە تىيىم سالىنادى.
باسپا ءسوز قىزمەتى بۇل تالاپتار جولاۋشىلاردى، باگاجدى جانە جۇك-باگاجدى تەمىرجول كولىگىمەن تاسىمالداۋ ەرەجەلەرىنە سايكەس بەلگىلەنگەنىن اتاپ ءوتتى.
