قازاقستاندا تۇلەكتەر كەشىنە قانشا قارجى جۇمسالادى
استانا. KAZINFORM - قازاقستاندا مەكتەپ تۇلەكتەرى كەشكە دايىندالىپ جاتىر. كەشە عانا مەكتەپتە ساباق وقىپ جۇرگەن بوزبالا مەن بويجەتكەن بۇگىن ءساندى كيىم ىزدەپ جۇرسە، اتا-انالار سالتاناتتى شارا وتكىزبەك. Kazinform اگەنتتىگى ەلىمىزدىڭ ءار وڭىرىندەگى باعانى سالىستىردى.
مەكتەپ ءبىتىرۋ كەشىنە كەتەر شىعىندى ەسەپتەۋ ءۇشىن ەكى ادامعا (بالا مەن اتا-انانىڭ ءبىرى) قاجەتتى قارجى ەسەپتەلدى.
مەيرامحانا
ەڭ نەگىزگى شىعىن - مەرەكەلىك داستارقان. مەيرامحانالاردا ەكى ادامعا 40000 - 150000 تەڭگە قاجەت. بۇل قارجىعا تىسكەباسار، سالات، ىستىق تاماق پەن شاي داستارحانى، سونىمەن بىرگە اسابا، ۆيدەوگراف قىزمەتى كىرەدى. ليمۋزين مەن LED- ەكراندى جالعا الادى. ەلىمىز بويىنشا ەڭ تومەن باعا پەتروپاۆل، تۇركىستان مەن تارازدا. بۇل قالالاردا بانكەت قۇنى ەكى ادامعا 40000 - 45000 تەڭگە.
اقتوبە، ورال، پاۆلودار، كوكشەتاۋ، قونايەۆ، پاۆلودار، كوكشەتاۋ، قونايەۆ، تالدىقورعان مەن جەزقازعاندا باعا ودان ءسال جوعارى. ەكى ادامعا 50000 - 60000 تەڭگە.
ال استانا، الماتى، اقتاۋ، قاراعاندى، قوستاناي، شىمكەنت پەن قىزىلوردادا مەيرامحانالاردىڭ باعاسى ەكى ادامعا 70000 تەڭگەدەن باستالىپ، 100000 تەڭگەگە دەيىن جەتەدى.
وسكەمەن مەن سەمەيدە مەيرامحانا باعاسى قىمبات. ەكى ادامعا - 118000 تەڭگە.
ەڭ قىمباتى - اتىراۋ قالاسىندا. مۇندا ەكى ادامعا 150000 تەڭگە كەرەك.
تاعى ءبىر قاجەتتى دۇنيە - ەستەلىك فوتو.
فوتوستۋديالار فوتوالبومنىڭ بىرنەشە ءتۇرىن ۇسىنادى. كەيبىر تۇلەكتەر قاراپايىم عانا ەستەلىك فوتونى ءجون كورەدى. ولار 4-5 بەتتەن تۇراتىن فوتتالبومدى تاڭدايدى. كەيبىرى فوتوسەسسيا ۇيىمداستىرىپ، 100 بەتتىك البومعا تاپسىرىس بەرەدى. ەستەلىك البومنىڭ ورتاشا باعاسى - 10000 تەڭگە.
ەڭ ارزان فوتوالبوم پەتروپاۆل، سەمەي، وسكەمەندە جاسالادى. بۇل قالالاردا باعا - 8000 - 8500 تەڭگە.
اقتوبە، قاراعاندى، جەزقازعان، قىزىلوردا، قونايەۆ پەن تارازدا باعا ءسال جوعارى. مۇندا ەستەلىك البوم 9000 - 12000 تەڭگە ارالىعىندا.
استانا، الماتى، ورال، پاۆلودار، تۇركىستان مەن تالدىقورعاندا فوتوالبوم باعاسى - 15000 - 17000 تەڭگە.
اتىراۋ، قوستاناي مەن شىمكەنتتە باعا - 20000 تەڭگە.
تۇلەكتەردىڭ فوتوالبومى اقتاۋدا قىمبات. مۇندا باعا - 30000 تەڭگە.
ءساندى كيىم
ءبىتىرۋشى تۇلەكتەردىڭ كيىم ۇلگىسى دە، ونىڭ باعاسى دا ءارتۇرلى. ەر بالالارعا قاراعاندا قىزداردىڭ اتا-انالارى كوپ شىعىندالادى.
ەلىمىزدە سالتاناتتى كەشكە ارنالعان كويلەكتىڭ ورتاشا قۇنى تاۋلىگىنە 10000 - 150000 تەڭگە. ال ەگەر ساتىپ السا، باعا بىرنەشە ەسە قىمبات بولادى. ەر بالالارعا ارنالعان كوستيۋم- شالبار ورتا ەسەپپەن 50000 تەڭگە بولىپ تۇر.
سونىمەن بىرگە تىزىمگە قىزداردىڭ شاش ۇلگىسى مەن بەت ارلەۋدى قوسۋعا بولادى. ورتاشا باعاسى - 20000 تەڭگە جانە ودان جوعارى.
اۆتور
التىناي ساعىندىقوۆا
