قازاقستاندا تالاپكەرلەردى باعالاۋدىڭ جاڭا جۇيەسى ەنگىزىلەدى

استانا. KAZINFORM - قازاقستاندا تالاپكەرلەردى ىرىكتەۋ ءتاسىلى وزگەرىپ، جاڭا فورماتتاعى تەست ەنگىزىلەدى. بۇل تۋرالى ۇكىمەت وتىرىسىنان كەيىنگى باسپا ءسوز ءماسليحاتىندا ساياسات نۇربەك ءمالىم ەتتى.

باسپا ءسوز ءماسليحاتى بارىسىندا جۋرناليستەر جوعارى وقۋ ورىندارىنداعى ءبىلىمنىڭ فورمالدى سيپاتى تۋرالى سىنعا قاتىستى سۇراق قويدى.

ءمينيستردىڭ ايتۋىنشا، بۇل ماسەلەنى شەشۋ ءۇشىن تالاپكەرلەردى ىرىكتەۋ جۇيەسى جاڭارتىلىپ جاتىر.

- وتكەن جىلى مەملەكەت باسشىسىنىڭ ساپارى اياسىندا ا ق ش- قا بارىپ، تەست ازىرلەۋ بويىنشا الەمدەگى جەتەكشى ITS كومپانياسىمەن كەلىسىمگە قول قويدىق. قازىر جاڭا فورماتتاعى تەست ازىرلەنىپ جاتىر، - دەدى ول.

ونىڭ سوزىنشە، Admissions Insight Test دەپ اتالاتىن جاڭا تەست تالاپكەرلەردى نەعۇرلىم ناقتى ىرىكتەۋگە، ولاردىڭ ءبىلىمىن جان-جاقتى باعالاۋعا جانە ناتيجەلەرىن تەرەڭىرەك تۇسىنۋگە مۇمكىندىك بەرەدى.

- بۇرىنعىداي تەك ءبىر عانا جالپى بال بولمايدى. ناتيجە بىرنەشە مودۋل بويىنشا كورسەتىلەدى. جوبانى كەلەسى جىلى پيلوتتىق رەجيمدە ىسكە قوسۋدى جوسپارلاپ وتىرمىز، - دەدى مينيستر.

ساياسات نۇربەك وزگەرىستەر كەزەڭ-كەزەڭىمەن ەنگىزىلەتىنىن اتاپ ءوتتى.

- ەشقانداي كۇرت وزگەرىس بولمايدى. تالاپكەرلەر ءۇشىن توسىن نەمەسە شۇعىل جاڭالىقتار بولمايدى، - دەدى ول.

ايتا كەتەيىك، بۇعان دەيىن ۇكىمەت وتىرىسىندا عىلىمي جەتىستىكتەر كورسەتكىشىن ءوڭىر اكىمدەرىنىڭ رەيتينگىنە قوسۋ قاجەتتىگى ايتىلعان ەدى.