قازاقستاندا تاعى 1000 اۋىل مەكتەبى جاڭعىرتىلادى
استانا. KAZINFORM - قازاقستاننىڭ شاعىن قالالارى مەن اۋىلدارىنداعى تاعى 1000 مەكتەپ جاڭا وقۋ جىلىندا جاڭعىرتۋدان وتەدى، دەپ حابارلايدى وقۋ-اعارتۋ مينيسترلىگى.
مەملەكەت باسشىسىنىڭ تاپسىرماسى بويىنشا شاعىن قالالاردا، اۋدان ورتالىقتارىندا جانە اۋىلداردا مەكتەپتەردى جاڭعىرتۋ جۇمىستارى جالعاسىپ جاتىر. جىل سايىن كەمىندە 1000 مەكتەپ جەتى باعىت بويىنشا جاڭعىرتۋدان وتەدى.
جاڭعىرتۋدىڭ ماقساتى - بالالاردىڭ ءبىلىم الۋى مەن تاربيەلەنۋى ءۇشىن قولايلى جاعداي جاساۋ، ماتەريالدىق- تەحنيكالىق بازانى نىعايتۋ ارقىلى قالالىق جانە اۋىلدىق مەكتەپتەر اراسىنداعى ءبىلىم ساپاسىنداعى الشاقتىقتى ازايتۋ.
جاڭعىرتۋ اياسىندا كۇردەلى جانە اعىمداعى جوندەۋ جۇمىستارى، پاندىك كابينەتتەرمەن جابدىقتاۋ، مەكتەپ جيھازدارىن جاڭارتۋ، كىتاپحانالار مەن اسحانالاردى، قاۋىپسىزدىك جاعدايلارىن جاقسارتۋ قاراستىرىلعان.
- وسىلايشا، 2025- 2026 وقۋ جىلىندا روبوتوتەحنيكا، حيميا، بيولوگيا، فيزيكا جانە STEM باعىتتارى بويىنشا 1000 عا جۋىق زاماناۋي پاندىك كابينەت ساتىپ الۋ جوسپارلانىپ وتىر. 509 مەكتەپتىڭ كىتاپحاناسىن، 375 مەكتەپتىڭ اسحاناسىن جاڭعىرتۋ، 598 مەكتەپكە كۇردەلى جانە اعىمداعى جوندەۋ جۇرگىزۋ، 409 مەكتەپتىڭ جيھازدارىن جاڭارتۋ جوسپارلانعان. جۇرگىزىلگەن جۇمىستاردىڭ ناتيجەسىندە 369 مىڭ وقۋشىنىڭ وقۋ جاعدايىن جاقسارتۋ كوزدەلۋدە، - دەلىنگەن حابارلامادا.
بۇدان بۇرىن «كەلەشەك مەكتەپتەرى» ۇلتتىق جوباسى اياسىندا بارلىعى 460 مىڭ وقۋشى ورنى اشىلاتىنى انىقتالدى.
