قازاقستاندا سەيسمولوگيا سالاسىن دامىتۋدىڭ كەشەندى جوسپارى قابىلداندى

استانا. KAZINFORM - مەملەكەت باسشىسىنىڭ تاپسىرماسىن ورىنداۋ ماقساتىندا سەيسمولوگيا سالاسىن دامىتۋدىڭ 2024-2028 -جىلدارعا ارنالعان كەشەندى جوسپارى بەكىتىلدى.

ۇكىمەتتىڭ ءتيىستى قاۋلىسىنا ق ر پرەمەر-ءمينيسترى ولجاس بەكتەنوۆ قول قويدى، دەپ حابارلايدى ۇكىمەتتىڭ رەسمي سايتى.

قۇجات ەلىمىزدىڭ سەيسمولوگيالىق قاۋىپسىزدىگىن نىعايتۋ بويىنشا اۋقىمدى شارالاردى ىسكە اسىرۋدى كوزدەيدى. ولاردىڭ ىشىندە مونيتورينگتى ايتارلىقتاي كۇشەيتۋ، عيماراتتار مەن قۇرىلىستاردىڭ سەيسميكالىق توزىمدىلىگىن قامتاماسىز ەتۋ، جاڭا سيفرلىق تەحنولوگيالاردى ەنگىزۋ، كادرلاردى دايارلاۋ دەڭگەيىن ارتتىرۋ جانە ت. ب. بار.

وسىلايشا، 15 سەيسميكالىق اۋدانداستىرۋ كارتاسى ازىرلەنەتىن بولادى، بۇل ەلىمىزدىڭ سەيسميكالىق قاۋىپتى وڭىرلەرىندەگى جەر سىلكىنىسى وشاقتارىنىڭ %70 ىن بولجاۋعا مۇمكىندىك بەرەدى. سونداي-اق ولار اتالعان اۋماقتارداعى عيماراتتار مەن قۇرىلىستاردى پاسپورتتاۋعا جانە جاڭا قۇرىلىس نورمالارىن ازىرلەۋگە نەگىز بولادى.

پاسپورتتاۋ ەڭ وسال قۇرىلىس وبەكتىلەرىن انىقتاۋعا مۇمكىندىك بەرەدى، ولارعا قاتىستى ءبىرىنشى كەزەكتە سەيسميكالىق قاۋىپتىلىگىن تومەندەتۋ شارالارى قولدانىلادى. ونىڭ ىشىندە: سەيسميكالىق كۇشەيتۋ، قۇندى جابدىقتاردى قورعاۋ نەمەسە شىعارۋ، ماقساتىن وزگەرتۋ جانە باسقالارى بار.

سونىمەن قاتار 285 سەيسميكالىق ستانسانى ورناتۋ، سونداي-اق قولدا بار 70 ستانسانى جوندەۋ جانە جاراقتاندىرۋ كوزدەلگەن. بۇل الماتى وبلىسىندا جانە ەلىمىزدىڭ باسقا دا سەيسموقاۋىپتى وڭىرلەرىندە سەيسميكالىق قاۋىپتى ساپالى بولجاۋعا مۇمكىندىك بەرەدى. ءوز كەزەگىندە قاجەتتى ارەكەت ەتۋ شارالارى جەدەل قابىلداناتىن بولادى.

بۇدان باسقا، عيماراتتاردىڭ قۇرىلىسى مەن جۇمىس ىستەۋىنە باقىلاۋدى كۇشەيتۋ، مونيتورينگ ادىستەرىن جاقسارتۋ، سەيسمولوگيا سالاسىنداعى مامانداردى زاماناۋي جابدىقتارمەن جانە تەحنيكالىق قۇرالدارمەن قامتاماسىز ەتۋ جوسپارلانۋدا.

جالپى العاندا، كەشەندى جوسپاردى ىسكە اسىرۋ ناتيجەسىندە سەيسميكالىق قاۋىپتى اۋماقتارداعى ازاماتتاردىڭ، قۇرىلىستار مەن ينفراقۇرىلىمنىڭ قورعالۋ دەڭگەيى ايتارلىقتاي كۇشەيۋى ءتيىس. سونداي- اق جەر سىلكىنىسى بولعان كەزدە مەملەكەتتىك ورگاندار مەن بەيىندى ۇيىمدار تاراپىنان دەن قويۋ جۇيەسى جەتىلدىرىلەتىن بولادى.

سەيسميكالىق قاۋىپسىزدىكتى قامتاماسىز ەتۋ - ۇكىمەتتىڭ باسىم باعىتتارىنىڭ ءبىرى، ويتكەنى قازاقستاننىڭ سەيسميكالىق ايماقتارى رەسپۋبليكانىڭ جالپى اۋدانىنىڭ شامامەن %40 ىن الادى. ەلىمىزدەگى سەيسميكالىق قاۋپى جوعارى وڭىرلەر - الماتى جانە شىمكەنت قالالارىنىڭ، الماتى، جامبىل، قىزىلوردا، تۇركىستان، شىعىس قازاقستان، اباي جانە جەتىسۋ وبلىستارىنىڭ اۋماقتارى.