قازاقستاندا سيرەك مەتالدار كەن ورىندارى اۋكسيونعا شىعارىلادى
استانا. KAZINFORM - ەلىمىزدە كۇمىس، كومىر جانە سيرەك كەزدەسەتىن مەتالداردىڭ 50 كەن ورنى بويىنشا ەلەكتروندىق اۋكسيون ۇيىمداستىرىلادى.
بۇل تۋرالى ونەركاسىپ جانە قۇرىلىس ۆيتسە-ءمينيسترى يران شارحان ءمالىم ەتتى.
- الداعى ۋاقىتتا التىن، كۇمىس، كومىر جانە سيرەك كەزدەسەتىن مەتالداردىڭ 50 كەن ورنى بويىنشا ەلەكتروندىق اۋكتسيون وتكىزۋ جوسپاردا بار. بۇل پەرسپەكتيۆالى نىساندارعا قولجەتىمدىلىكتى ودان ءارى كەڭەيتەدى. سونىمەن قاتار، ءبىز تەك قانا مينەرالدىق-شيكىزات بازاسىن كەڭەيتىپ قويماي، جەر قويناۋىن پايدالانۋ مودەلىن قايتا قاراۋىمىز قاجەت. قازاقستان «ءوندىرۋ- وڭدەۋ- قالدىقتار» سياقتى سىزىقتىق ۇلگىدەن بىرتىندەپ باس تارتىپ، اينالمالى (سيركۋليارلىق) ەكونوميكاعا بەت بۇرىپ كەلەدى. ەلدە 55 ميلليارد توننادان استام تەحنوگەندىك مينەرالدىق تۇزىلىمدەر شوعىرلانعان، قازىر ولاردى تۇگەندەۋ جانە وندىرىستىك اينالىمعا تارتۋعا دايىندىق جۇمىستارى ءجۇرىپ جاتىر، - دەدى يران شارحان ەلوردادا ءوتىپ جاتقان 15- حالىقارالىق تاۋ- كەن مەتاللۋرگيا كونگرەسىندە.
سونداي- اق ۆيتسە-مينيستر جاسىل ەكونوميكاعا كوشۋ، سيفرلاندىرۋ جانە ەلەكتروموبيلدەردىڭ دامۋى مەتالدارعا دەگەن سۇرانىس قۇرىلىمىن تۇبەگەيلى وزگەرتىپ جاتقانىن ايتتى.
بۇعان دەيىن حابارلاعانىمىزداي قازاقستان التىن قورى بويىنشا توپ-20 ەلدىڭ قاتارىنا كىردى.
سونداي- اق جاقىن ارادا تاۋ-كەن كەشەنى سالاسىندا 3,5 تريلليون تەڭگەگە 5 ينۆەستيتسيالىق جوبا ىسكە قوسىلادى دەپ كۇتىلىپ وتىر.
ايتا كەتەيىك، ەلوردادا حالىقارالىق تاۋ-كەن مەتاللۋرگيا كونگرەسى ءوتىپ جاتىر. وعان الەمنىڭ 20 ەلىنەن 1300 دەلەگات قاتىستى.
