قازاقستاندا سۋدا جۇزەتىن امبەباپ جاۋىنگەرلىك كولىك قۇراستىرىلاتىن بولدى
استانا. KAZINFORM - ەلوردادا «قازاقستان پاراماۋنت ينجينيرينگ» كومپانياسى سۋدا جۇزە الاتىن «Terrex Barys-A 8x8» جاۋىنگەرلىك كولىگىن تانىستىردى.
بۇل بروندالعان كوپماقساتتى امفيبيالىق جاۋىنگەرلىك كولىك - سينگاپۋرلىق «Singapore Technologies Engineering» كومپانياسىنىڭ ءونىمى. ونى قۇراستىرۋعا، جەتىلدىرۋگە قۇقىق بەرەتىن بارلىق قۇجاتتاردى قازاقستان تاراپى ساتىپ العان. الداعى ۋاقىتتا اسكەري ماشينا ءتۇرلى اۋا رايى جانە تابيعي جاعدايدا اۋىر سىناقتاردان ءوتۋى ءتيىس. اپتاپ ىستىق پەن سارى ايازدا، باتپاق پەن قۇمدا ءوزىنىڭ مىنسىزدىگىن دالەلدەي السا عانا، جاپپاي قۇراستىرۋعا جولداما الادى.
- Terrex Barys-A - قازىرگى ۋاقىتتىڭ تەحنولوگيالارىنا ساي اسكەري كولىك. قازاقستاندا جاسالعان، قازاقتىڭ قولىمەن جاسالعان، قازاقتىڭ ساربازىنا جاسالعان. ءبىزدىڭ ازامات رەتىندە عانا ەمەس، كاسىپكەر جانە ءوندىرۋشى رەتىندەگى مىندەتىمىز - جاۋىنگەرلەرىمىزدىڭ ءومىرىن ساقتاۋ، - دەيدى قورعانىس- ونەركاسىپ كەشەنى كاسىپورىندارى قاۋىمداستىعىنىڭ ءتوراعاسى ايبەك بارىسوۆ.
وتاندىق اسكەري كولىك ىشىندەگى جاۋىنگەردى 10 كەلى تروتيلدىڭ جارىلىسىنان قورعاي الادى. تانكىگە قارسى مينانىڭ وزىندە 7 كەلى تروتيل بولاتىنىن ەسكەرسەك، كوپماقساتتى جاۋىنگەرلىك كولىكتىڭ قورعانىش دەڭگەيىن جوعارى ساناتقا جاتاتىنىن تۇسىنەمىز.
- ارميا موبيلدى، كاسىبي جانە زاماناۋي قارۋ- جاراقپەن قامتىلعان بولۋى كەرەك. سەبەبى ءبىزدىڭ باستى ماقسات - مەملەكەتىمىزدىڭ كونستيتۋتسيالىق قۇرىلىمىن، تەرريتوريالىق تۇتاستىعىن ساقتاۋ. وسىنداي ونىمدەر اسكەرىمىزدىڭ قۋاتىن ارتتىرادى، - دەدى ق ر قورعانىس ءمينيسترى رۋسلان جاقسىلىقوۆ.
«Terrex بارىس- ا 8*8» بروندالعان دوڭعالاقتى ماشيناسى امبەباپ پلاتفورماعا ورنالاستىرىلعان. ونداي پلاتفورمانى ب ت ر، بروندى اسكەر تاسىمالداۋشى كولىك، دوڭعالاقتى تانك، 120 م م جىلجىمالى مينومەت، كوماندالىق- شتابتىق ماشينا، اسكەري- بارلاۋشى ماشينا، جاقىن قاشىقتىقتاعى زەنيتتىك-راكەتالىق كەشەن جاساۋدا قولدانۋعا بولادى. وسىلايشا قازاقستاننىڭ بروندى اسكەري كولىكتەرىنىڭ امبەباپ تۇتاس تىزبەگىن قالىپتاستىرىپ، ونى ۇستاۋ مەن جوندەۋ شىعىندارىن ازايتۋعا بولادى.
Terrex بارىس- ا 12 جاۋىنگەردى تاسىمالداي الادى، ەكيپاجى - 2 ادام. بويىندا 600 اتتىڭ كۇشى بار.
