قازاقستاندا سۋ تاسقىنىن بولجاۋ جانە الدىن الۋ شارالارى كۇشەيتىلەدى

استانا. KAZINFORM - جاڭا سۋ كودەكسى جانە باسقا دا ءبىرقاتار ستراتەگيالىق مەملەكەتتىك باعدارلامالار سۋ تاسقىنىن بولجاۋ جانە الدىن الۋ جونىندەگى شارالاردى كۇشەيتۋ ماقساتىندا قايتا قارالادى.

بۇل تۋرالى ۆيتسە- پرەمەر قانات بوزىمبايەۆتىڭ توراعالىعىمەن وتكەن كەڭەستە بەلگىلى بولدى.

قازاقستاندا بىرنەشە ءتيىستى IT شەشىمدەر جاسالماق: جەدەل حابارلاۋ جانە قۇتقارۋ قىزمەتتەرىن ت ج ايماعىنا جونەلتۋ ءۇشىن SKYMAX سۋ تاسقىنىنىڭ الدىن الۋ جۇيەسى جانە تاسقىن سۋلاردىڭ ءوتۋىنىڭ سيفرلىق كارتا- سحەماسى.

سونىمەن قاتار سۋ قورعاۋ ايماقتارىندا جەر ۋچاسكەلەرىنىڭ ءبولىنۋىن باقىلاۋ ءۇشىن سۋ وبەكتىلەرى مەن كاداستر بويىنشا دەرەكتەردى قامتيتىن hydro.gov.kz پلاتفورماسى ازىرلەنۋدە. اكىمدىكتەر سۋ قورعاۋ ايماقتارىندا ورنالاسقان قۇرىلىستارعا تەكسەرۋ جۇرگىزىپ، ولاردى جويۋ نەمەسە كوشىرۋدى قامتاماسىز ەتۋى قاجەت.

وسى رەتتە قانات بوزىمبايەۆ جەرگىلىكتى اتقارۋشى ورگاندارعا سۋ قورعاۋ ايماقتارى مەن بەلدەۋلەرى بەلگىلەنبەگەن سۋ وبەكتىسىنىڭ جاعالاۋ ايماعىنان 500 مەتر اياسىندا جەر ۋچاسكەلەرىن بەرۋگە جول بەرمەۋدى تاپسىردى.

ءتيىمدى گيدرومونيتورينگ ءۇشىن ەلىمىزدە گيدروپوستتار سانى ارتادى. قولدانىستاعى 377 گيدروپوستقا تاعى جاڭا 139 نىسان قوسىلادى، ولار سۋ تاسقىنى قاۋپى بار اۋماقتار مەن ترانسشەكارالىق وزەندەردە ورناتىلادى.

« قازگيدرومەت» ر م ك جانىنداعى گيدرولوگيالىق قىزمەتتى پرەزيدەنت تاپسىرماسى بويىنشا جاڭادان قۇرىلعان « قازگيدروگەولوگيا» ۇلتتىق گيدروگەولوگيالىق قىزمەتىنە تاپسىرۋ ءۇسىنىلدى. قازىرگى ۋاقىتتا بۇل ماسەلە تالقىلاۋ ساتىسىندا.

سۋ تاسقىنىن بولجاۋ ءۇشىن حالىقارالىق ساراپتامالىق قولداۋ ماڭىزدى. اپاتتىڭ العاشقى كۇندەرىنەن باستاپ ەلىمىزدە نيدەرلاندىدان كەلگەن عالىمدار توبى جۇمىس ىستەپ جاتىر، ولار جاقىن ارادا سۋ تاسقىنى قاۋپىن باسقارۋدىڭ بىرلەسكەن جوسپارىن ۇسىنادى.

كەڭەس بارىسىندا ۆيتسە-پرەمەر اكىمدىكتەردىڭ گيدروقۇرىلىستاردى پايدالانۋدىڭ مامانداندىرىلعان ۇيىمدارىن قۇرۋ تۋرالى باياندامالارىن تىڭداپ، بەيىندى مينيسترلىكتەرگە ءبىرقاتار تاپسىرمالار بەردى.