قازاقستاندا قىزىلشاعا قارسى مىندەتتى جاپپاي يممۋنداۋ باستالدى - اجار عينيات

الماتىعا ءىس-ساپارمەن دەنساۋلىق ساقتاۋ ءمينيسترى اجار عينيات كەلدى. ساپار بارىسىندا مينيستر جۋرناليستەرمەن باسپا ءسوز ءماسليحاتىن وتكىزدى، دەپ حابارلايدى Kazinform.

دەنساۋلىق ساقتاۋ ءمينيسترى جۋرناليستەرمەن الماتى قالالىق 5N ەمحانادا كەزدەستى.

ءمينيستردىڭ سوزىنشە، بۇگىندە ەل بويىنشا، ونىڭ ىشىندە الماتى قالاسىندا قىزىلشا اۋرۋى بويىنشا جاعداي تۇراقتى ەمەس.

«بۇگىنگى كۇنى نەگىزىنەن 5 جاسقا دەيىنگى بالالار، ونىڭ ىشىندە 1 جاسقا دەيىنگى بالالار قىزىلشامەن اۋىرىپ جاتىر. ءبىز ولاردى اۋرۋحاناعا جاتقىزىپ، اۋرۋى اسقىنىپ كەتپەۋى ءۇشىن 3-4 كۇن بويى باقىلايمىز. ءبىزدىڭ بۇگىنگى باستى مىندەتىمىز - قىزىلشادان قانداي دا ءبىر ءولىم-ءجىتىمدى بولدىرماۋ جانە اۋرۋدىڭ اسقىنۋىن الدىن الۋ. سوندىقتان ءبىز كىشكەنتاي بالالاردى ينفەكتسيالىق ستاتسيونارلارعا جاتقىزامىز»، - دەدى ول.

ونىڭ ايتۋىنشا، بۇگىندە ەل بويىنشا ستاتسيونارلاردا توسەك-ورىنداردىڭ %52 بوس ەمەس.

«قىزىلشا اۋرۋى اۋا تامشىلارى ارقىلى بەرىلەدى. بۇگىندە ناۋقاستاردىڭ كوبەيۋ سەبەبى، سوڭعى 5 جىلدا ەكپە الماعان ادامدار كوبەيگەن، تيىسىنشە ولاردا يممۋنيتەت جوق. سول سەبەپتى ولار بۇل اۋرۋمەن اۋىرادى»، - دەدى مينيستر.

ول قازىر جاعداي باقىلاۋدا ەكەنىن ايتتى. 6- قاراشادان باستاپ ەل بويىنشا قىزىلشا، قىزامىق پەن پاروتيتكە قارسى بالالاردى قوسىمشا جاپپاي يممۋنداۋ باستالدى.

«قوسىمشا يممۋنداۋ اتا- انالارىنىڭ رۇقساتىمەن ەكپە الماعان بالالارعا جۇرگىزىلدى، ال قازىرگى ۋاقىتتا ينفەكتسيانى توقتاتۋ ءۇشىن مىندەتتى جاپپاي يممۋنداۋ باستالدى»، - دەدى اجار عينيات.

ەسكە سالايىق، اجار عينيات وسىعان دەيىن قىزىلشا اۋرۋى ورشىگەن وڭىرلەردى ايتقان ەدى. ونىڭ ىشىندە شىمكەنت، الماتى قالالارىندا، جامبىل، الماتى، ماڭعىستاۋ، اقتوبە، قىزىلوردا جانە اتىراۋ وبلىستارى بار.

سونداي-اق ۇكىمەت وتىرىسىندا پرەمەر-مينيستر ءاليحان سمايىلوۆ قىزىلشامەن كۇرەسكە جەرگىلىكتى اكىمدەر بەلسەندى اتسالىسۋى كەرەكتىگىن ايتتى.

«اۋرۋدىڭ تارالۋىن توقتاتۋ كەرەك. قىزىلشا اسقىنىپ كەتسە، بالالاردىڭ دەنساۋلىعىنا اسا ءقاۋىپ توندىرەدى. سوندىقتان ونىمەن تەك دەنساۋلىق ساقتاۋ جۇيەسى عانا ەمەس، بۇكىل قوعام بولىپ كۇرەسۋىمىز قاجەت»، - دەدى پرەمەر.