قازاقستاندا قىزىلشا اۋرۋىنان قانشا بالا قايتىس بولدى؟
قازاقستاندا قىزىلشادان 2 بالا قايتىس بولدى. بۇل تۋرالى دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتار دارىگەر ايجان ەسماعامبەتوۆا ايتتى.
«قىزىلشا اۋرۋىنان 2 بالا ءولىمى تىركەلدى. ولار - 1 جاسقا دەيىنگى بالالار. ولار قىزىلشاعا قارسى ەكپە الۋ جاسىنا تولماعان.
بۇل وقيعا استانا مەن شىعىس قازاقستاندا بولدى. ءبىر بالا شالا تۋعان. ونىڭ بۇعان دەيىن دە اۋرۋلارى بولعان. سوڭىنا ول قىزىلشا جۇقتىرعان» - دەدى ايجان ەسماعامبەتوۆا سەنات كۋلۋارىندا.
ول ءسوز سوڭىندا قىزىلشاعا قارسى ەكپە الۋ ماڭىزدى ەكەنىن اتاپ ءوتتى.
ەسكە سالايىق، بۇعان دەيىن بىرىككەن ۇلتتار ۇيىمىنىڭ بالالار قورى يۋنيسەف قازاقستان قىزىلشانىڭ تارالۋى بويىنشا الەمدە ءبىرىنشى ورىندا تۇرعانىن حابارلاعان بولاتىن.
كەيىنگى مالىمەتتەر بويىنشا قىزىلشا جۇقتىرعاندار سانى 20 مىڭ 200 ادامعا دەيىن وسكەن. ەلوردانىڭ باس مەملەكەتتىك سانيتاريا دارىگەرى سارحات بەيسەنوۆا استانادا دا جاعداي شيەلەنىسىپ تۇرعانىن ايتتى. تاۋلىگىنە 45 جاعدايعا دەيىن تىركەلەدى ەكەن.
بۇعان دەيىن استانادا كۇن سايىن قىزىلشا جۇقتىرۋ بويىنشا 35 جاعداي تىركەلەتىنى ايتىلعان ەدى. ناۋقاستاردىڭ اراسىندا ەكپە الماعان بالالاردىڭ ۇلەسى جوعارى، ياعني 67 پايىز نەمەسە 725 جاعداي. ال 27 پايىزى - ەكپە العانى نەمەسە الماعانى بەلگىسىز ەرەسەكتەر. باس دارىگەردىڭ ايتۋىنشا، ەكپە العان بالالاردىڭ التى پايىزى عانا اۋىرعان.
