قازاقستاندا قىستا دەمالۋعا ارنالعان ۇزدىك 5 ورىن انىقتالدى
استانا. قازاقپارات - ەلىمىزدە 2024-2025 قىسقى ماۋسىمدا دەمالۋعا بولاتىن ۇزدىك 5 ورىن انىقتالدى. تۋريزم جانە سپورت مينيسترلىگى ءتىزىمدى ۇسىندى.
1. شۋچە- بۋراباي كۋرورتتىق ايماعى
شۋچە- بۋراباي كۋرورتتىق ايماعى قازاقستانداعى قىسقى دەمالىستىڭ نەگىزگى باعىتتارىنىڭ ءبىرى سانالادى. ءوڭىر تۇمسا تابيعاتىمەن، تازا اۋاسىمەن جانە جوعارى دەڭگەيدەگى جايلىلىعىمەن تۋريستەردى بىردەن باۋراپ الادى. 2024 -جىلعى قاڭتار- ماۋسىم ارالىعىندا وڭىردە تۋريستىك اعىننىڭ ايتارلىقتاي ارتقانى بايقالدى. ورنالاستىرۋ ورىندارىنىڭ سانى 203 كە جەتىپ، قىزمەت كورسەتىلگەن قوناقتار سانى 143629 ادامعا جەتتى. بۇل وتكەن جىلدىڭ سايكەس كەزەڭىمەن سالىستىرعاندا 10949 ادامعا كوپ. ينفراقۇرىلىمنىڭ دامۋى مەن قىزمەت كورسەتۋ ساپاسىنىڭ جاقسارۋى ايماقتىڭ تارتىمدىلىعىن ارتتىرۋدا ماڭىزدى ءرول اتقارادى.
2. الماتى تاۋ كلاستەرى
الماتى تاۋ كلاستەرى تاۋلى جانە قىسقى سپورتتى ۇناتاتىندارعا بەلسەندى دەمالىستىڭ الۋان ءتۇرىن ۇسىنادى. 2024 -جىلدىڭ ءبىرىنشى جارتىجىلدىعىندا كۋرورت 1,2 ميلليوننان استام قوناقتى قابىلداپ، ورنالاستىرۋ ورىندارىنىڭ سانى 518 گە جەتكەن. الماتى تاۋ كلاستەرى ينفراقۇرىلىم مەن قىزمەت كورسەتۋ دەڭگەيىن ۇدايى جەتىلدىرىپ، وتاندىق جانە شەتەلدىك تۋريستەر ءۇشىن ودان دا تارتىمدى ەتەدى.
3. كاتونقاراعاي كۋرورتتىق ايماعى
كاتونقاراعاي كۋرورتتىق ايماعىنىڭ تابيعاتى - تىنىش ءارى وڭاشا دەمالىستى سۇيەتىندەر ءۇشىن تاپتىرماس ورىنداردىڭ ءبىرى. 2024 -جىلدىڭ العاشقى التى ايىندا كۋرورتتىق ايماق وتكەن جىلدىڭ وسى كەزەڭىمەن سالىستىرعاندا ەكى ەسە كوپ قوناق قابىلداپ، ۇسىنىلعان قىزمەتتەردىڭ كولەمى 17,7 ميلليون تەڭگەگە وسكەن.
4. شارىن شاتقالى
شارىن شاتقالى - قىس مەزگىلىندە ەرەكشە اتموسفەراعا بولەنىپ، تابيعات سۇلۋلىعىن باعالايتىن تۋريستەرگە شابىت سىيلايتىن مەكەن. كەڭەيتىلگەن ينفراقۇرىلىم مەن جاڭا دەمالىس ورىندارى ايماقتىڭ تۋريستىك تارتىمدىلىعىن ارتتىرۋدا ماڭىزدى ءرول اتقارۋدا. شارىن شاتقالى كەلۋشىلەرگە تاڭعاجايىپ تابيعات كورىنىستەرىمەن دەمالۋعا ىڭعايلى مۇمكىندىكتەر ۇسىنادى.
5. كوكشەتاۋ جانە ونىڭ اينالاسىنداعى كولدەر
كوكشەتاۋ جانە اينالاسىنداعى كولدەر شاڭعى ءارى سنوۋبورد تەبۋ سياقتى تىنىش دەمالىس پەن بەلسەندى كوڭىل كوتەرۋدى بىرىكتىرەتىن تاماشا ورىنداردى ۇسىنادى. قازىرگى تاڭدا ايماقتىڭ تۋريستىك ينفراقۇرىلىمى قارقىندى دامىپ كەلەدى. بۇل ءوز كەزەگىندە ءوڭىردى وتباسى مۇشەلەرى ءۇشىن قىسقى دەمالىس ورنى رەتىندە تارتىمدى ەتەدى.
