قازاقستاندا قىمىز بەن شۇبات باعاسى قانشا تۇرادى

Kazinform اگەنتتىگى ەلىمىزدە كوپشىلىك ءسۇيىپ ءارى تاڭداپ ىشەتىن سۋسىن باعاسىن سالىستىرىپ كوردى.

قازاقستاندا قىمىزدىڭ ليترى ورتا ەسەپپەن 1000 تەڭگەدەن باستالادى. ال الماتىدا بۇل سۋسىندا كوپ مولشەردە (شامامەن 50 ليتر) ساتىپ الساڭىز، ليترىن 500 تەڭگەگە بەرەدى. جالپى الماتىدا قىمىزدىڭ ورتاشا باعاسى 1000-1200 تەڭگە.

سونىمەن بىرگە كوتەرمە باعا قىزىلوردادا دا تومەن. مۇندا ءبىر ليتر قىمىزدى 800 تەڭگەگە تابۋعا بولادى. ال بوتەلكەدەگى قىمىز قۇنى 1000-2000 تەڭگە ارالىعىندا. كوكشەتاۋدا باشقۇرتستاننان اكەلىنگەن سۋسىننىڭ بوتەلكەسى 800 تەڭگە تۇرادى. ال 1,5 ليترلىك جەرگىلىكتى سۋسىن قۇنى 1700-2000 تەڭگەدەن ساتىلىپ جاتىر.

شىمكەنتتىكتەر قىمىزدىڭ ليترىن 1000 تەڭگەگە ساتىپ الادى. تۇركىستان دۇكەندەرىندە بوتەلكەدەگى قىمىز باعاسى 1100 تەڭگەدەن باستالادى.

تاراز جانە اتىراۋ تۇرعىندارى ءشول باساتىن ءارى ەمدىك قاسيەتى بار سۋسىندى 1200 تەڭگەگە (جازدا باعا 1000-1100 تەڭگە بولادى) ساتىپ الادى.

استانادا قىمىزدىڭ ليترى ورتا ەسەپپەن 1200-1500 تەڭگە تۇرادى. قىمىزدى تالعاپ ىشەتىندەر ءتاتتىسىن، ىستالعانىن تاڭداپ قالاۋىن الا الادى.

قوستاناي دۇكەندەرىندە قىمىز قۇنى 1300-1400 تەڭگە تۇرادى. ال اقتوبەلىكتەر ورتا ەسەپپەن 1419 تەڭگەدەن (0,5 ليترى 600-800 تەڭگە) ساتىپ الادى.

تالدىقورعان، قونايەۆ، ورال، پەتروپاۆلدا قىمىز قۇنى 1500 تەڭگەدەن باستالادى.

پاۆلوداردا ءبىر ليترى 1500-1700 تەڭگە، جاز ايلارىندا 1000-1200 تەڭگە تۇرادى.

وسكەمەن مەن سەمەيدە ليترى 1700-2400 تەڭگەدەن ساتىلادى.

قىمىز قۇنى باتىس پەن ەلىمىزدىڭ ورتالىعىنداعى كەيبىر قالادا قىمبات. ماسەلەن اقتاۋدا 1800، قاراعاندىدا 1800-2000، ال جەزقازعاندا 2000-2400 تەڭگە تۇرادى.

شۇبات

شۇبات باعاسى قىمىزدان كەم تۇسپەيدى. ءبىراق كەيبىر قالادا باعا جوعارى.

تۇركىستان، اقتاۋ مەن الماتىدا شۇباتتىڭ ءليترى 1000 تەڭگەدەن باستالادى. تالدىقورعان مەن قىزىلوردادا ودان 100 تەڭگەگە قىمبات.

تاراز، شىمكەنت، اتىراۋدا شۇباتتىڭ ءليترى 1200 تەڭگە. ال جاز ايلارىندا باعا ءسال ءتۇسىپ، 1000-1100 تەڭگە بولادى.

ەلوردادا شۇبات باعاسى - 1300 تەڭگە.

قوستاناي، پاۆلودار، اقتوبە مەن ورالدا شۇبات باعاسى 1500 تەڭگەدەن باستالادى. كوبىنە سۋسىننىڭ بۇل ءتۇرى دۇكەندە ساتىلادى.

پەتروپاۆل تۇرعىندارى شۇباتتىڭ ليترىن 1600 تەڭگەگە ساتىپ الادى. سونىمەن بىرگە قونايەۆتا باعا 1600-1700 تەڭگە تۇرادى. قاراعاندىلىقتار شۇباتتىڭ ليترىن 1600-2000 تەڭگەگە الىپ ءجۇر.

وسكەمەن، سەمەي، جەزقازعاندا باعا جوعارى. مۇندا شۇباتتىڭ ليترى 2000-2600 تەڭگە تۇرادى.

ەڭ قىمباتى كوكشەتاۋدا بولىپ شىقتى. مۇندا شۇباتتىڭ ليترى 5000 تەڭگە تۇرادى. ال 250 گرامى - 1288 تەڭگە.

اۆتور

التىناي ساعىندىقوۆا