قازاقستاندا قاتەرلى ىسىكتى ەمدەۋگە ارنالعان تاعى ەكى پرەپارات شىعارىلادى
استانا. KAZINFORM – ق ر پرەزيدەنتى ءىس باسقارماسى مەديتسينالىق ورتالىعىنىڭ اۋرۋحاناسى يادرولىق فيزيكا ينستيتۋتىمەن بىرلەسىپ، ونكولوگيالىق اۋرۋلاردى دياگنوستيكالاۋ جانە ەمدەۋ ءۇشىن يادرولىق مەديتسينانىڭ جاڭا تەحنولوگيالارىن ەنگىزۋدى باستادى.
«ءبىزدىڭ قازاقستاندىقتار اتوم ەنەرگەتيكاسى دەسە، بىردەن ا ە س- ءتى ەسكە تۇسىرەدى. ال شىندىعىندا اتوم ەنەرگياسى كۇندەلىكتى قولدانىلاتىن كوپتەگەن سالادا قاجەت. تەلەفونداعى ميكروچيپتەر يادرولىق تەحنولوگياسىز جاسالمايدى، بولمەدە جانىپ تۇرعان جارىقتىڭ توك وتكىزگىشى دە رادياتسيالىق وڭدەۋدەن وتەدى. قازاقستاندا ءار قالادا كارىز سۋى جينالادى، رادياتسيالىق وڭدەۋ ارقىلى سول سۋدى قايتا وڭدەپ شىعارۋعا بولادى. سول سەكىلدى اتوم ەنەرگياسى سالاسىنىڭ تاعى ءبىر ماڭىزدى باعىتى - ونكولوگيالىق اۋرۋلاردى ەمدەۋ جانە دياگنوستيكالاۋ»، - دەدى يادرولىق فيزيكا ينستيتۋتىنىڭ باس ديرەكتورى سايابەك ساحيەۆ ق ر پ ءى ب مەديتسينالىق ورتالىعىنىڭ اۋرۋحاناسىندا وتكەن بريفينگتە.
ءوز كەزەگىندە س. ساحيەۆ بيىل قانداي پرەپاراتتار شىعارۋدى جوسپارلاپ وتىرعانىن حابارلادى.
«ءبىزدىڭ ينستيتۋت تەك ىرگەلى جانە قولدانبالى عىلىممەن اينالىسۋمەن عانا شەكتەلمەيدى. سونىمەن قاتار ونكولوگيالىق دەرتتەردى ەمدەۋگە ارنالعان راديوفارماتسيەۆتيكالىق پرەپاراتتار ءوندىرىسى دە بار. جىل سوڭىنا دەيىن شىعارىلاتىن راديوفارمپرەپاراتتار ءتىزىمىن كەڭەيتىپ، ساماري-225 جانە ليۋتەتسي-177 پرەپاراتتارىن شىعارۋدى كوزدەپ وتىرمىز»، - دەدى س. ساحيەۆ.
ق ر د س م يادرولىق مەديتسينا جونىندەگى شتاتتان تىس باس مامانى، ق ر پ ءى ب مو اۋرۋحاناسىنىڭ يادرولىق مەديتسينا ورتالىعىنىڭ باسشىسى ايگۇل ءسادۋاقاسوۆا الەمدىك مەديتسينا عىلىمى تەرانوستيكا باعىتىنا قادام جاساعانىن، قازاقستان دا باسقا ەلدەردەن قالىسپايتىنىن ايتتى.
«تەرانوستيكا» تەرمينى تەراپيا جانە دياگنوستيكا دەگەن حالىقارالىق ەكى سوزدەن تۇرادى. ياعني، ءبىز يزوتوپپەن دەرتتى ەرتە باستان دياگنوستيكالاپ قانا قويماي، ەمدەي الاتىنىمىزدى بىلدىرەدى. مۇنداي ءدارىنىڭ باستى ەرەكشەلىگى - ءدال جەتكىزۋ مودەلى. ياعني، ول وبىر كلەتكالارىنا ءتان مولەكۋلالاردى تانىپ، ەمدىك جانە دياگنوستيكالىق اگەنتتى زارداپ شەككەن جاسۋشالارعا ءدال جەتكىزە الادى»، - دەپ اتاپ ءوتتى ايگۇل ءسادۋاقاسوۆا.
قازىرگى ۋاقىتتا يادرولىق مەديتسينا ورتالىعى اياسىندا وسىنداي راديوفارماتسيەۆتيكالىق پرەپاراتتاردىڭ كومەگىمەن ونكولوگيالىق اۋرۋلاردىڭ دياگنوستيكاسى عانا ءجۇرىپ جاتىر.
«بۇل تەحنولوگيالار - ونكولوگيانى ەمدەۋدىڭ جاڭا بەلەسى، ول ناۋقاستارعا، جالپى ەلىمىزدىڭ دەنساۋلىق ساقتاۋ سالاسىنا قاجەت. پ ءى ب مەديتسينالىق ورتالىعىنىڭ اۋرۋحاناسىندا قازاقستانداعى ەڭ وزىق يادرولىق مەديتسينا ورتالىعىنا بار، سوندىقتان ءبىز تەرانوستيكا تەحنولوگيالارىن ەنگىزىپ، بەيىمدەي باستايمىز، - دەدى يادرولىق مەديتسينا ورتالىعى باسشىسى.
ا. ءسادۋاقاسوۆانىڭ ايتۋىنشا، تەرانوستيكا تەحنولوگيالارىن دامىتۋ جانە بەيىمدەۋ 2024-2030-جىلدارعا ارنالعان اتوم ەنەرگەتيكاسى مەن يادرولىق مەديتسينانى دامىتۋ جونىندەگى جول كارتاسىنا ەندى. بۇل قۇجات ق ر ۇكىمەتى جانىنان قۇرىلعان يادرولىق فيزيكانى (راديوحيميانى) دامىتۋ جونىندەگى كەڭەس جۇمىسى شەڭبەرىندە ىسكە اسىرىلادى.
«كەلەسى جىلى ءبىز راديوەمبوليزاتسيانى ەنگىزگىمىز كەلەدى. راديوەمبوليزاتسيا - باۋىر ارتەرياسى ارقىلى يزوتوپتاردى باۋىردىڭ ىسىك تىنىنە ونىڭ ساۋ بولىگىنە اسەر ەتپەي، اعزاعا ۋىتتى اسەر جاساماي ەنگىزۋ. بۇل ءادىس يزوتوپتاردى از قولدانۋ ارقىلى ىسىكتىڭ ءوزىن نەكروتيزاتسيالاۋعا مۇمكىندىك بەرەدى. ياعني، ونكولوگيادا حيمياسىز جانە ساۋلەلىك اسەرسىز ەمدەۋدىڭ بالاما جولى پايدا بولادى»، - دەيدى مامان.
اتالعان جول كارتاسى اياسىندا مەدورتالىق اۋرۋحاناسىندا يادرولىق مەديتسينا ماسەلەلەرى بويىنشا قۇزىرەتتەر ورتالىعىن اشۋ جوسپارلانعان. اۋرۋحاناداعى قۇزىرەتتەر ورتالىعى جاڭا راديوفارماتسيەۆتيكالىق دارىلىك پرەپاراتتاردى قولدانىپ، يادرولىق مەديتسينانىڭ (تەرانوستيكانىڭ) زاماناۋي ادىستەرىن ازىرلەۋگە جانە تەستىلەۋگە مۇمكىندىك بەرەدى.
«وسىلايشا، اۋرۋحاناداعى يادرولىق مەديتسينا ورتالىعىنىڭ ونكولوگيالىق اۋرۋلاردى دياگنوستيكالاپ، راديوماركەرلەردى پايدالانىپ، مەتابوليكالىق زەرتتەۋ جۇرگىزۋى ءۇشىن جاڭا ماركەرلەر ەنگىزۋدەگى جەتىستىكتەرىن كەڭەيتۋگە مۇمكىندىك بەرەدى. سونداي-اق اۋرۋدى ەرتە باستان انىقتاۋعا، ونىڭ سيپاتتامالارىن دا ەرتە ءارى ءدال تابۋعا جول اشىلادى. بۇل ناۋقاستاردى ەمدەۋ ىسىندە اسا ماڭىزدى»، - دەيدى ا. ءسادۋاقاسوۆا.
ايتا كەتەيىك، يادرولىق مەديتسينا ونكولوگيادان بولاتىن ءولىم-ءجىتىمدى ايتارلىقتاي ازايتادى.
تەرانوستيكا باعىتى ارقىلى اۋرۋدى جاسۋشا دەڭگەيىندە انىقتاۋعا بولادى.
بيىل 27-قىركۇيەكتە قازاقستاندا يادرولىق فيزيكانى (راديوحيميانى) دامىتۋ جونىندەگى كەڭەس قۇرىلدى.
