قازاقستاندا قاتەرلى ىسىككە قارسى العاشقى ءدارى جىل سوڭىنا دەيىن تىركەلەدى - ساياسات نۇربەك
استانا. KAZINFORM - قازاقستاندا قاتەرلى ىسىككە قارسى العاشقى وتاندىق ءدارىنى تىركەۋ بيىل اياقتالادى دەپ جوسپارلانىپ وتىر. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك مالىمدەدى.
ءمينيستردىڭ ايتۋىنشا، DVC پرەپاراتى نازاربايەۆ ۋنيۆەرسيتەتى جانىنداعى ۇلتتىق زەرتحانادا ازىرلەنىپ جاتىر، قازىر ول كلينيكالىق سىناقتاردىڭ سوڭعى كەزەڭىندە.
- وتكەن جىلى پرەپارات ادامدارعا كلينيكالىق سىناقتان ءوتتى. قازىر سىناقتار استاناداعى ونكولوگيالىق ورتالىق بازاسىندا جالعاسىپ جاتىر. سونىمەن قاتار قاراعاندىداعى جانە باسقا دا وڭىرلەردەگى ونكولوگيالىق ورتالىقتار تارتىلعان، - دەدى ساياسات نۇربەك.
ونىڭ سوزىنشە، جوبانىڭ مەرزىمىنىڭ ۇزارۋىنا حالىقارالىق تالاپتاردى ساقتاۋ قاجەتتىگى سەبەپ بولعان.
- پرەپاراتتى تىركەۋ ءۇشىن ۇلتتىق تالاپتارمەن قاتار حالىقارالىق ستاندارتتاردى دا ورىنداۋ قاجەت بولدى. وسىعان بايلانىستى قوسىمشا كلينيكالىق سىناقتار جۇرگىزىلىپ جاتىر. بۇعان دەيىن ولار الماتىدا ءوتتى، قازىر استانادا جانە وڭىرلەردە جالعاسۋدا. بۇل جۇمىستار دەنساۋلىق ساقتاۋ مينيسترلىگىمەن جانە دارىلىك زاتتاردى تىركەۋ مەن ساراپتاۋ ۇلتتىق ورتالىعىمەن بىرلەسىپ جۇرگىزىلۋدە. ەۋرازيالىق ەكونوميكالىق وداقتىڭ تالاپتارى دا ەسكەرىلىپ وتىر، - دەدى مينيستر.
ءمينيستردىڭ ايتۋىنشا، بارلىق سىناقتار اياقتالعاننان كەيىن پرەپاراتتى تىركەۋگە ۇسىنۋ جوسپارلانىپ وتىر.
- بيىل جىلدىڭ سوڭىنا دەيىن تىركەۋگە قۇجات تاپسىرامىز. تىركەۋ ءراسىمى اياقتالعان سوڭ پرەپاراتتى مەديتسينالىق ۇيىمداردا قولدانۋعا مۇمكىندىك بولادى، - دەدى ول.
ايتا كەتەيىك، بۇعان دەيىن العاشقى وتاندىق قاتەرلى ىسىككە قارسى پرەپاراتتى 2025-جىلدىڭ سوڭىنا دەيىن تىركەۋ جوسپارلانعان بولاتىن.
