قازاقستاندا قانشا رەسمي گيد بار
الماتى. قازاقپارات - 2024-جىلى 78 قازاقستاندىق گيد وزدەرىنىڭ كاسىبي داعدىلارىن راستاپ، سيفرلىق تىزىلىمگە ەندى.

Kazakh tourism مالىمەتىنە سايكەس، 2023-جىلدان باستاپ گيدتەرگە بەيدجدەر بەرىلەدى. بۇل بەيدجدەر ءار گيدتىڭ رەسمي مارتەبەسىن راستايدى جانە توپتار قۇرامىندا 41 تۋريستىك نىسانعا تەگىن نەمەسە جەڭىلدىكپەن كىرۋگە مۇمكىندىك بەرەدى. اتاۋلى بەيدجگە يە بولۋ ءۇشىن گيدتەر guides.kazakhstan.travel سايتىنا تىركەلىپ، تەستىلەۋگە ءوتىنىم بەرۋى قاجەت.
- گيدتەر ارنايى كۋرستاردا وقىتىلادى. گيدتار سيفرلىق تىزىلىمگە ەنۋگە جانە اتاۋلى بەيدج الۋعا ءوتىنىش بەرگەن كەزدە مىندەتتى تۇردە اتالعان كۋرستاردا ءتيىستى ءبىلىم العانى تۋرالى قۇجاتتاردى دا جولدايدى. تەستىلەۋ سۇراقتارى گيدتەردىڭ قىزمەتىنە جانە ءوزى ەڭبەك ەتەتىن ءوڭىردىڭ ەرەكشەلىكتەرىنە بايلانىستى. ەگەر تەستىلەۋدەن ءساتتى وتسە، سيفرلىق تىزىلىمگە ەنگىزىلەدى، - دەپ حابارلادى كومپانيادان.
بۇگىنگى كۇنى بەيدجدەر سانى بويىنشا الماتى قالاسىنىڭ گيدتەرى كوش باستاپ تۇر - 49 ادام. ەلوردادا رەسمي مارتەبەسى بار 15 مامان، الماتى وبلىسىندا 7 مامان بار.
شىمكەنت قالاسىنىڭ، شىعىس قازاقستان جانە جامبىل وبلىستارىنىڭ ءارقايسىسىندا ەكى گيد اتاۋلى بەيدج يەلەندى. ال تۇركىستان وبلىسىندا ءبىر ادام سيفرلىق تىزىلىمگە ەندى.
ءاربىر بەيدج تۋريستەرگە گيد پروفيلىمەن تانىسۋعا مۇمكىندىك بەرەتىن QR كودپەن جابدىقتالعان.
- گيدتەر شەتەلدىك تۋريستەردىڭ قازاقستان تۋرالى پىكىرىن قالىپتاستىرۋدا شەشۋشى ءرول اتقارادى. ولاردىڭ كاسىبيلىگى - تۋريزم يندۋسترياسىن دامىتۋدىڭ جانە قىزمەت كورسەتۋ ستاندارتتارىن ارتتىرۋدىڭ ماڭىزدى قۇرامداس بولىگى. اتاۋلى بەيدج تۋريستەرگە ساپالى قىزمەت كورسەتىلەتىنىنە سەنىمدىلىك بەرەتىن سەنىم سيمۆولىنا اينالادى، - دەدى Kazakh Tourism باسشىسى قايرات ءسادۋاقاسوۆ.
ەسكە سالايىق، بۇعان دەيىن شەتەلدىك تۋريستەرگە قازاقستاننىڭ قانداي وڭىرلەرى تارتىمدى ەكەنىن جازعانبىز.