قازاقستاندا قانشا قار بارىسى بار

استانا. KAZINFORM - ەلىمىزدە قار بارىسىنىڭ سانى 90 جىلدارمەن سالىستىرعاندا 2 ەسەگە ارتتى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى دانيار تۇرعامبايەۆ ايتتى.

- تاۋەلسىزدىك جىلدارى رەسپۋبليكاداعى ەرەكشە قورعالاتىن تابيعي اۋماقتاردى كەڭەيتۋ جانە قۇرۋ جۇمىستارى ناتيجەسىندە ولاردىڭ الاڭى 869 مىڭ گەكتاردان 30,9 ميلليون گەكتارعا دەيىن ۇلعايدى. ەلىمىزدە بيو ارتۇرلىلىكتى ساقتاپ قالۋ بويىنشا قابىلدانعان شارالاردىڭ ناتيجەسىندە، سيرەك كەزدەسەتىن جابايى جانۋارلار پوپۋلياتسياسى ايتارلىقتاي ءوستى.

سونىمەن قاتار قار بارىسىنىڭ سانىن قايتا قالپىنا كەلتىرۋ بويىنشا ءبىرقاتار كەشەندى شارا قابىلداندى. ولاردىڭ نەگىزگى تىرشىلىك ەتۋ ۋچاسكەلەرىندە - 3,6 ميلليون گەكتار اۋماعىندا ەرەكشە قورعالاتىن تابيعي اۋماقتار قۇرىلدى، - دەدى كوميتەت باسشىسى.

ونىڭ دەرەگىنشە، قازىرگى كەزدە قار بارىسى مەكەندەيتىن جەرلەردىڭ 70 پايىزعا جۋىعى ەرەكشە قورعالاتىن اۋماقتارمەن قورعالعان.

- ەسەپكە الۋ جانە مونيتورينگ جۇرگىزۋدىڭ زاماناۋي ادىستەرى، فوتوتۇزاقتار مەن سپۋتنيكتىك تەلەمەتريا بەلسەندى قولدانىلادى. 11 بارىس سپۋتنيكتىك ارنايى مويىن قارعىسىمەن تاڭبالاندى. قار بارىستارىن قورعاۋ جانە مونيتورينگ جۇرگىزۋ بويىنشا قابىلدانعان شارالاردىڭ ناتيجەسىندە، ولاردىڭ سانى 90-جىلدارداعى ەڭ تومەنگى دەڭگەيدەن ەكى ەسەگە ارتىپ، 180 باسقا دەيىن جەتتى، - دەدى دانيار تۇرعامبايەۆ.

ايتا كەتەيىك، جەتىسۋ وبلىسىنىڭ تۇرعىندارى جول بويىندا قار بارىسىن كەزدەستىرگەن.