قازاقستاندا قانشا ءىلبىس مەكەن ەتەدى

ілбіс
فوتو: Pexels

سامارقان. KAZINFORM - بۇگىندە قازاقستان اۋماعىندا تىرشىلىك ەتەتىن ىلبىستەردىڭ سانى جىلىنا 5-6 باسقا كوبەيىپ كەلەدى. مۇنى سامارقاندا ءوتىپ جاتقان ۇنەمى قونىس اۋدارىپ تىرشىلىك ەتەتىن جابايى جانۋار تۇرلەرىن ساقتاۋ كونۆەنتسياسىنىڭ كەزەكتى وتىرىسى (COP 14) اياسىندا زوولوگيا ينستيتۋتىنا قاراستى بارىستى باقىلاۋ ورتالىعىنىڭ باسشىسى الەكسەي گراچيەۆ ايتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

«قازاقستاندا بارىستىڭ(ءىلبىستىڭ - رەد.) سانى تۇراقتى تۇردە ءوسىپ كەلەدى. بۇگىندە ەلىمىزدە شامامەن 190 ءىلبىس بار. ەكولوگيا جانە تابيعي رەسۋرستار مينيسترلىگى، سونىمەن قوسا بارىستى قورعاۋمەن اينالىسىپ جۇرگەن مامانداردىڭ قولداۋىمەن ەلىمىزدەگى 15 ەرەكشە قورعاۋعا الىنعان اۋماقتا بارلىق جاعداي جاسالدى. قازىرگى تاڭدا ۇلتتىق تابيعي پاركتەر مەن قورىقتار اتالعان جانۋارلار ءۇشىن قاۋىپسىز. ءبىز ۇنەمى مونيتورينگ جۇرگىزىپ، ءجيى فوتوتۇزاق اۋماقتارىن ۇيىمداستىرامىز. ونىڭ ناتيجەسىندە ىلبىستەردىڭ ميگراتسياسىن، ءومىر ءسۇرۋ، ورتاعا بەيىمدەلۋ ەرەكشەلىكتەرىنە تالداۋ جاسالادى»، - دەپ ءمالىم ەتتى الەكسەي گراچيەۆ Kazinform ءتىلشىسىنىڭ ساۋالىنا جاۋاپ بەرە وتىرىپ.

قازاقستاندا تۇڭعىش رەت قار بارىسىن ساناۋ جۇمىسى 1978 -جىلى قولعا الىنعان. تيىسىنشە، 1980 -جىلى ەلىمىزدىڭ اۋماعىن 200 گە جۋىق ءىلبىس مەكەن ەتكەنى انىقتالدى.

«سول كەزەڭدە بارىس قازاقستاننىڭ قىزىل كىتابىنا ەنگىزىلدى. 1990-جىلداردان باستاپ ولاردىڭ سانى ايتارلىقتاي قىسقاردى. كەيىنگى ۋاقىتتا ىلبىستەرگە ارنالعان ەكوجۇيەنى جاقسارتۋ ەسەبىنەن ولاردىڭ قاتارى ارتتى. سوڭعى 3-5 جىلداعى قار بارىسىنىڭ ورتاشا جىلدىق ءوسىمى - 5-6 باس»، - دەدى ق ر عىلىم جانە جوعارى ءبىلىم مينيسترلىگىنىڭ زوولوگيا ينستيتۋتىنا قاراستى بارىستى باقىلاۋ ورتالىعىنىڭ باسشىسى الەكسەي گراچيەۆ.

ايتا كەتەيىك، بۇل كۇندەرى سامارقان قالاسىندا ۇنەمى قونىس اۋداراتىن جابايى جانۋار تۇرلەرىن ساقتاۋ كونۆەنسياسىنىڭ كەزەكتى وتىرىسى ءوتىپ جاتىر.

شارا اياسىندا قازاقستان، وزبەكستان جانە قىرعىزستان ەلدەرى افريكا مەن ەۋرازيا اۋماقتارىندا ۇنەمى قونىس اۋدارىپ مەكەن ەتەتىن جىرتقىش قۇستاردى ساقتاۋ جونىندەگى حالىقارالىق مەموراندۋمعا قوسىلدى.

اتالعان قۇجات قۇستاردىڭ تىرشىلىك ەتۋ ورتاسىن ساقتاۋ، ولارعا قولايلى ەكوجۇيە قۇرۋدى قامتيدى.

اۆتور

ءاليحان اسقار

سوڭعى جاڭالىقتار