قازاقستاندا قانداي ۇلت وكىلدەرى تۇرادى جانە ولاردىڭ ۇلەسى قانشا؟
استانا. قازاقپارات – 1-مامىر - قازاقستان حالقىنىڭ بىرلىگى كۇنى. 1995 -جىلدىڭ 18-قازانىندا مەملەكەت باسشىسىنىڭ جارلىعىمەن قازاقستان حالقىنىڭ بىرلىگى كۇنى بەكىتىلدى.
باستاپقىدا بۇل كۇن «قازاقستان حالىقتارىنىڭ بىرلىگى كۇنى» دەپ اتالدى. ول كەزدە قازاقستان حالقى اسسامبلەياسىنىڭ اتاۋىندا دا كوپتىك جالعاۋ بولدى. كەيىنىرەك وزگەرىس ەنگىزىلىپ، كوپتىك جالعاۋ الىندى. ونىڭ ماقساتى - قازاقستان حالقىنىڭ ءبىرتۇتاس ەل ەكەنىن كورسەتۋ.
ەلىمىزدە 1-مامىرعا دەيىن جىل سايىن قازاقستان حالقى اسسامبلەياسىنىڭ وتىرىسى وتەدى. بيىل ۇيىمنىڭ 33- سەسسياسى 25-ساۋىردە ءوتتى. جيىنعا مەملەكەت باسشىسى قاسىم-جومارت توقايەۆ قاتىستى.
مەملەكەت باسشىسى بۇعان دەيىن ۇيىمنىڭ جۇمىسى تۋرالى اتاپ وتكەن بولاتىن.
قازاقستان حالقى اسسامبلەياسى - بىرلىگىمىزدى نىعايتۋعا قىزمەت ەتەتىن بىرەگەي قۇرىلىم. اسسامبلەيا قاسيەتتى قازاق جەرىن مەكەن ەتكەن بارشا ەتنوستى ۇيىستىرىپ وتىر. وندا ەڭبەك ەتىپ جۇرگەن ازاماتتاردى بىرلىكتىڭ ەلشىسى دەۋگە بولادى، - دەدى توقايەۆ.
سونداي-اق ەلىمىزدە ۇلتارالىق بىرلىك پەن دوستىقتى نىعايتۋعا ارنالعان تاعى ءبىر داتا بار. ول - العىس ايتۋ كۇنى. بۇل مەرەكەنى اسسامبلەيا قۇرىلعان كۇنى – 1-ناۋرىزدا مەرەكەلەنەدى.
مەرەكەنىڭ باستى ماقساتىنىڭ ءبىرى - وسكەلەڭ ۇرپاقتى دوستىق، ءبىر-بىرىنە دەگەن قۇرمەت پەن تولەرانتتىلىققا، وتانسۇيگىشتىككە تاربيەلەۋ، قازاقستاندا ەتنيكارالىق كەلىسىم مەن ۇلتارالىق قارىم- قاتىناستى نىعايتۋ.
ۇلتتىق ستاتيستيكا بيۋروسىنىڭ 2024 -جىلدىڭ باسىنداعى ستاتيستيكاسى بويىنشا، قازاقستاندا حالىق سانى 20033842 ادام. ەلىمىزدەگى حالىقتىڭ 70 پايىزدان استامى (14220321) قازاق ۇلتىنان تۇرادى.
قازاقستان حالقىنىڭ جارتىسىنان استامى (12451192 ادام) قالادا تۇرادى، اۋىلداردا تۇراتىن ادامداردىڭ سانى - 7582650.
