قازاقستاندا قانداي دارىگەرلەر جەتپەيتىنى بەلگىلى بولدى
استانا. KAZINFORM - سەنات دەپۋتاتى اينۇر ارعىنبەكوۆا دەنساۋلىق ساقتاۋ سالاسىندا كادر تاپشىلىعى وتە وزەكتى ماسەلە ەكەنىن مالىمدەدى. ول قازاقستاندا قانداي ماماندار جەتپەيتىنىن دە ايتتى.
دەپۋتاتتىڭ سوزىنشە، اۋىلدىق جەرلەردە عانا ەمەس، ەلوردا دا، وبلىستاردا دا ماماندار جەتپەيدى.
«بۇگىنگى تاڭدا دەنساۋلىق ساقتاۋ سالاسىنا وراسان زور قارجى ءبولىنىپ جاتىر، ءبىراق ازىرگە حالىقتىڭ تولىق سۇرانىسىنا قولجەتكىزۋ مۇمكىن بولماي وتىر. ەلىمىزدەگى كوپتەگەن مەديتسينالىق ۇيىمدا ماتەريالدىق-تەحنيكالىق قامتاماسىز ەتۋ جەتكىلىكتى بولسا دا «ءبارىن كادر شەشەدى» ماتەلى ماڭىزىن جويعان جوق»، - دەدى دەپۋتات.
دەنساۋلىق ساقتاۋ مينيسترلىگىنىڭ مالىمەتىنشە، 2023-جىلدىڭ سوڭىندا 4864 دارىگەر جەتپەيتىنى انىقتالعان. اسىرەسە استانا، الماتى جانە شىمكەنت قالالارىندا دارىگەر تاپشىلىعى، سونداي-اق ءبىرقاتار اۋىل، اۋداندا دا مامان جەتىسپەۋشىلىگى بايقالادى.
سۇرانىسقا يە ماماندىقتار قاتارىنا تەراپيەۆتەر، انەستەزيولوگتار جانە اكۋشەر-گينەكولوگتار جاتادى. سەناتور دەنساۋلىق ساقتاۋ مينيسترلىگىنە ماسەلەنى شەشۋ ءۇشىن ءبىرقاتار ناقتى شارانى ۇسىندى.
«دەنساۋلىق ساقتاۋ مينيسترلىگى دەنساۋلىق ساقتاۋ سالاسىنداعى كادر رەسۋرسى ماسەلەسى بويىنشا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە وزگەرىستەر ەنگىزۋ جونىندەگى زاڭنامالىق اكتى جوباسىن پارلامەنتتىڭ قاراۋىنا ەنگىزۋ جونىندەگى جۇمىستى جەدەلدەتۋى قاجەت. دەنساۋلىق ساقتاۋدىڭ ءتيىمدى كادر ساياساتىن قامتاماسىز ەتۋ جونىندەگى جول كارتاسىن ازىرلەۋ مەن بەكىتۋدى قاراستىرۋ كەرەك. قولدانىستاعى زاڭناما بويىنشا كوپسالالى ۋنيۆەرسيتەت كلينيكالارىن قۇرۋ ماسەلەسى بويىنشا جۇمىستى اياقتاۋ كەرەك»، - دەدى سەناتور.
ەسكە سالايىق، بۇعان دەيىن ۇكىمەتتەن اۋىلدىق جەردەگى مەديتسينانى دامىتۋعا 60 ميلليارد بولىنگەنى حابارلاندى.
