قازاقستاندا نەسيە بەرۋدىڭ جاڭا ەرەجەلەرى قاشان ەنگىزىلەدى

الماتى. KAZINFORM – ق ر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا تۇتىنۋشىلىق نەسيەلەر ءۇشىن جىلدىق ءتيىمدى سىياقى مولشەرلەمەسى قاشان جانە قانداي مولشەردە بەلگىلەۋدى جوسپارلاپ وتىرعانىن ايتتى.

اگەنتتىك باسشىسى 19-ماۋسىم كۇنى مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى بارىنشا ازايتۋ، قارىز الۋشىلاردىڭ قۇقىقتارىن قورعاۋ، قارجى نارىعىن رەتتەۋدى جانە اتقارۋشىلىق ءىس جۇرگىزۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعانىن اتاپ ءوتتى.

«زاڭ قابىلدانعاننان كەيىن زاڭعا تاۋەلدى نورماتيۆتىك قۇقىقتىق اكتىلەردى ەكى اي ىشىندە ازىرلەپ ۇلگەرۋىمىز كەرەك. قازىر ۇلتتىق بانكپەن بىرلەسىپ جىلدىق ءتيىمدى سىياقى مولشەرلەمەسى بويىنشا تۇزەتۋلەردى رەتتەپ جاتىرمىز، الداعى ەكى اپتادا تولىق اياقتايمىز دەپ جوسپارلاپ وتىرمىز. پايىزدىق مولشەرلەمە بانكتەر مەن ميكروقارجى ۇيىمدارى ءۇشىن ەكى ءتۇرلى بولۋى مۇمكىن. اگەنتتىككە ونلاين نەسيە بەرەتىن ۇيىمدار ءوز تاۋەكەلدەرىن ايتىپ، پايىزدىڭ جوعارى بولعانىن سۇراپ وتىر»، - دەيدى ول.

ق ر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆانىڭ سوزىنشە، ەكى اپتادان كەيىن كرەديتتەردىڭ جىلدىق ءتيىمدى سىياقى مولشەرلەمەسى بەلگىلى بولادى. ايتۋىنشا، قازىرگىدەي 56 پايىز ەمەس، جاڭا جىلدىق ءتيىمدى سىياقى مولشەرلەمەسى 44 پروتسەنت بولۋى مۇمكىن.

بانكتەردىڭ كەپىلسىز بەرەتىن تۇتىنۋشىلىق نەسيە سوماسى دا وزگەرۋى مۇمكىن. ياعني، كرەديت كولەمى - 8 ميلليون 122 مىڭ تەڭگەدەن اسپاۋى ىقتيمال. ال شاعىن كرەديتتىك ۇيىمدار ءۇشىن قارىزدىڭ شەگى - 4 ميلليون 61 مىڭ تەڭگەدەن كوپ بولماۋى ءتيىس. بۇل جىل سايىن وزگەرەتىن ايلىق ەسەپتىك كورسەتكىشكە تىكەلەي بايلانىستى.

اۆتور

الما مۇقانوۆا