قازاقستاندا نەسيە بەرۋ ءتارتىبى قاتاڭداتىلادى

قارجى نارىعىن رەتتەۋ جانە دامىتۋ اگەنتتىگى بانك جانە ميكروقارجىلىق قىزمەتكە قاتىستى نورماتيۆتىك قۇقىقتىق اكتىلەرگە وزگەرىستەر ەنگىزىپ جاتىر، دەپ حابارلايدى Kazinform.

بۇل شارالار نەسيە الۋشىلاردىڭ قۇقىقتارىن قورعاۋعا، الاياقتىققا قارسى تۇرۋعا جانە بانكتەر مەن ميكروقارجى ۇيىمدارىنىڭ (م ق ۇ) جاۋاپكەرشىلىگىن كۇشەيتۋگە باعىتتالعان.

تۇتىنۋشىلىق نەسيەلەر مەن ميكروكرەديتتەرگە شەكتەۋلەر ەنگىزىلەدى

ونلاين نەسيە العاننان كەيىن - 24 ساعات ويلانىپ كورۋگە مۇمكىندىك

ينتەرنەت ارقىلى راسىمدەلگەن، سوماسى 150 ايلىق ەسەپتىك كورسەتكىشتەن (ا ە ك) (589800 تەڭگەدەن) اساتىن كەپىلسىز تۇتىنۋشىلىق بانكتىك نەسيەلەر ءۇشىن قاراجاتتى اۋدارۋعا كىدىرىس ەنگىزىلەدى.

بانك قاراجاتتى زاەمشى كەلىسىمشارتقا قول قويعان سوڭ، كەمىندە 24 ساعات وتكەننەن كەيىن جانە تەك قارىز الۋشىنىڭ كەلىسىمىمەن عانا اۋدارا الادى. بۇل كەلىسىمدى ەلەكتروندىق ۇكىمەت پورتالى ارقىلى دا راستاۋعا بولادى.

كۇنىنە بىرنەشە ميكروكرەديت العاندارعا - كىدىرتۋ كەزەڭى

ەگەر ازامات ءبىر كۇندە بىرنەشە ميكروكرەديت الىپ، ولاردىڭ جالپى سوماسى 150 ا ە ك- تەن اسسا، بانك نەمەسە م ق ۇ كەلەسى قارىزدى بەرۋدى كىدىرتۋ نەمەسە كەيىنگە قالدىرۋ ءتارتىبىن ەنگىزۋگە مىندەتتى بولادى.

150 ا ە ك- تەن جوعارى نەسيە - تەك جەكە بارعاندا بەرىلەدى

ەگەر ازامات العاش رەت 150 ا ە ك نەمەسە ودان جوعارى سوماعا نەسيە نەمەسە ميكروكرەديت راسىمدەگىسى كەلسە، كەلىسىمشارتتى بانك نە مقۇ بولىمشەسىنە جەكە ءوزى بارىپ قانا جاساي الادى.

جاس جانە ەگدە جاستاعى ازاماتتارعا - ەرەكشە ءتارتىپ

21 جاسقا تولماعان جانە 55 جاستان اسقان ازاماتتارعا تۇتىنۋشىلىق نەسيە نەمەسە ميكروكرەديت بەرۋ ءۇشىن بانك پەن م ق ۇ ولاردىڭ كەلىسىمىن ناقتى جانە اشىق تۇردە العاننان كەيىن عانا راسىمدەي الادى.

بانكتىك جانە ميكروقارجىلىق ومبۋدسمەنگە - مەملەكەتتىك ءتىلدى ءبىلۋ تالابى

جوبا اياسىندا بانكتىك جانە ميكروقارجىلىق ومبۋدسمەن لاۋازىمىنا ۇمىتكەرلەرگە جاڭا تالاپ ەنگىزىلمەك. بۇل لاۋازىمدا جۇمىس ىستەۋ ءۇشىن ۇمىتكەر كازتەست جۇيەسى بويىنشا مەملەكەتتىك ءتىلدى ۆ2 دەڭگەيىنەن تومەن ەمەس دەڭگەيدە مەڭگەرگەنىن راستاۋى ءتيىس. بۇل قارىز الۋشىلارمەن تولىققاندى قارىم- قاتىناس جاساۋعا مۇمكىندىك بەرەدى.

جاڭا ەرەجەلەر نە ءۇشىن قاجەت؟

تۇسىندىرمە جازبادا كورسەتىلگەندەي، بۇل وزگەرىستەر:

نەسيە الاياقتىعىنىڭ الدىن الۋ؛

بانك پەن م ق ۇ- لاردىڭ جاۋاپكەرشىلىگىن ارتتىرۋ؛

ونلاين نەسيەلەر مەن ميكروكرەديتتەر راسىمدەگەندە قارىز الۋشىلاردىڭ قۇقىقتارىن قورعاۋ ماقساتىندا ازىرلەنگەن.

ەسكە سالساق، بۇعان دەيىن ەلىمىزدە ساربازدارعا كرەديت بەرۋگە تىيىم سالۋ مەحانيزمى ازىرلەنگەنى تۋرالى جازعان ەدىك.