قازاقستاندا نەسيە الۋدىڭ جاڭا ەرەجەسى ەنگىزىلدى

استانا. KAZINFORM - قازاقستاندا ءىرى سوماداعى نەسيەگە ءوتىنىش جازعاننان كەيىن، قارىز الۋشىعا تاعى ءبىر ويلانۋعا قوسىمشا ۋاقىت بەرىلەدى. بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ايتتى.

اتاپ ايتقاندا، نەسيە تۋرالى شارتقا قول قويعاننان كەيىن، بانك بەلگىلى ءبىر ۋاقىت ارالىعىندا كليەنتكە قاراجاتتى اۋدارمايدى. بۇل تۇرعىدا قارىز الۋشىعا تاعى دا ويلانۋعا مۇمكىندىك بەرىلەدى، ياعني وسى ۋاقىت ارالىعىندا ول نەسيەدەن باس تارتا الادى.

اگەنتتىك باسشىسىنىڭ ايتۋىنشا، ەگەر نەسيە سوماسى 1 ميلليون تەڭگەدەن اسسا، قارىز الۋشىعا 24 ساعاتقا قوسىمشا ۋاقىت بەرىلەدى. وسى ۋاقىت ارالىعىندا كليەنتتەر الاياقتاردىڭ قۇربانى بولماس ءۇشىن ءتيىستى تەكسەرىس جاسالادى.

- سونىمەن قاتار قارىز الۋشى الاياقتاردىڭ ىقپالىندا بولسا، ەسىن جيىپ، ءبارىن ويلانىپ، نەسيە الۋدان باس تارتۋعا مۇمكىندىگى بار. نەسيە ميلليون تەڭگەدەن اسقان جاعدايدا، 24 ساعاتتىق مەرزىم بەرىلەدى. بۇدان بولەك، 150-دەن 250 ا ە ك- كە دەيىنگى (600 مىڭ تەڭگەدەن 1 ملن تەڭگەگە دەيىن) نەسيەگە 8 ساعاتتىق ۋاقىت بەلگىلەندى. بۇعان دەيىن وسىنداي نەسيەنى بىرنەشە مينۋتتا الۋعا مۇمكىن بولاتىن، - دەدى ءمادينا ءابىلقاسىموۆا.

بۇعان دەيىن حابارلانعانداي، ەلىمىزدە جارتى ميلليون ادامنىڭ بانكتەردە پروبلەمالى نەسيەسى بار.

اۆتور

رۋسلان عابباسوۆ