قازاقستاندا ەندى رەكتورلار جىلدار بويى جىلى ورنىندا وتىرا بەرمەيدى

استانا. KAZINFORM - ەلىمىزدە رەكتورلاردىڭ قىزمەت مەرزىمىنە قاتىستى وزگەرىس بولادى. بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ايتتى.

بۇگىن پارلامەنت ماجىلىسىندە وتكەن باسپا ءسوز ءماسليحاتىندا تىلشىلەر مينيستردەن كەيبىر جوعارى وقۋ ورىندارىنىڭ رەكتورلارى تىم ۇزاق مەرزىم باسقارىپ كەلە جاتقانى تۋرالى سۇراق قويدى.

«ماسەلەن، ەرلان سىدىقوۆتىڭ ەۋرازيا ۇلتتىق ۋنيۆەرسيتەتىنە رەكتور بولعانىنا بيىل 13 جىل تولادى ەكەن. بۇل مەرزىم تىم ۇزاق ەمەس پە؟» دەپ سۇرادى ءتىلشى.

ءوز كەزەگىندە س. نۇربەك ەندى رەكتورلارلى تاعايىنداۋ قاعيداتى وزگەرەتىنىن ايتتى.

«جالپى، بىزدەگى ۇلتتىق ۋنيۆەرسيتەتتەر رەكتورلارىنىڭ مەرزىمىن ءۇش جىلعا بازالىق كەلىسىمشارت بويىنشا ۇزارتۋ مۇمكىندىگى بار. شىن مانىندە، 13 جىل مەرزىم - ۇزاق. سوندىقتان قازىر رەكتورلاردى تاعايىنداۋ ەرەجەلەرىن پىسىقتاپ جاتىرمىز. 14-15-ناۋرىزدا ارنايى رەسپۋبليكالىق كوميسسيانىڭ وتىرىسى وتەدى. سول جەردە جاڭا قاعيداتتار قابىلدانباق»، - دەدى س. نۇربەك.

بۇل تۇرعىدا ول رەكتورلاردىڭ قىزمەتىن ەكى مەرزىمنەن ارتىق ۇزارتپاۋ ۇسىنىسى بەكىتىلەتىنىن ايتتى.

«كەيىنگى 10 جىلدا مينيسترلىك ارنايى اكادەميالىق اۆتونوميا پرينتسيپتەرىنە كوشىپ جاتىر. بۇرىنعىداي ءمينيستردىڭ تىكەلەي رەكتوردى تاعايىنداپ، ونى ۇستىنەن باقىلاپ وتىرۋى پرينتسيپتەرىنەن باس تارتتىق. قازىر شەتەلدىك فورماتقا كوشىپ جاتىرمىز. ەندى رەكتورلارمەن ديرەكتورلار كەڭەسى نەمەسە قامقورشى كەڭەسى ارقىلى جۇمىس ىستەيمىز»، - دەدى مينيستر.

اۆتور

رۋسلان عابباسوۆ