قازاقستاندا «ميگرانت» وپەراتسياسى: 7 مىڭنان استام قۇقىق بۇزۋشىلىق انىقتالدى

استانا. KAZINFORM - قازاقستاندا «ميگرانت» جەدەل-پروفيلاكتيكالىق ءىس-شاراسىنىڭ قورىتىندىسى شىعارىلدى، دەپ حابارلايدى Polisia.kz.

ىشكى ىستەر مينيسترلىگىنىڭ مالىمەتىنشە، قوعامدىق ءتارتىپتى قامتاماسىز ەتۋ جانە كوشى-قون زاڭناماسىن بۇزۋدىڭ الدىن الۋ ماقساتىندا رەسپۋبليكا كولەمىندە وتكىزىلگەن شارا بارىسىندا 7 مىڭنان استام قۇقىق بۇزۋشىلىق انىقتالعان.

اتاپ ايتقاندا، 4,1 مىڭ شەتەل ازاماتى ەلدە بولۋ قاعيدالارىن بۇزعانى ءۇشىن اكىمشىلىك جاۋاپكەرشىلىككە تارتىلعان. سونىمەن قاتار 2,7 مىڭ شەتەل ازاماتى زاڭسىز ەڭبەك قىزمەتىن جۇزەگە اسىرعانى ءۇشىن جاۋاپقا تارتىلدى.

بۇدان بولەك، 2,2 مىڭ قازاقستاندىق پەن زاڭدى تۇلعا شەتەلدىكتەر تۋرالى پوليتسيانى ۋاقىتىلى حاباردار ەتپەگەنى ءۇشىن جاۋاپكەرشىلىككە تارتىلدى. ال 500 دەن استام جۇمىس بەرۋشى شەتەلدىك جۇمىس كۇشىن زاڭسىز پايدالانعانى ءۇشىن جازالانعان.

سالىنعان ايىپپۇلداردىڭ جالپى سوماسى 200 ميلليون تەڭگەدەن استى.

ۆەدومستۆو دەرەگىنشە، كوشى-قون زاڭناماسىن بۇزعان نەمەسە قازاقستان اۋماعىندا بولۋ نەگىزدەرى جويىلعان 1,5 مىڭ شەتەل ازاماتىنىڭ ەلدە بولۋ مەرزىمى قىسقارتىلدى. سونداي-اق 1,2 مىڭ ادامدى ەلدەن شىعارۋ تۋرالى سوت شەشىمى قابىلدانعان.

121 شەتەل ازاماتى ءماجبۇرلى تۇردە ەلدەن شىعارىلدى. ولاردىڭ ىشىندە 8 ى دەسترۋكتيۆتى-راديكالدى اعىم وكىلدەرى ەكەنى انىقتالعان. ەلدەن شىعارىلعان بارلىق ازاماتقا قازاقستانعا 5 جىلعا كىرۋگە تىيىم سالىندى.

ءىس-شارا بارىسىندا بارلىعى 24 قىلمىستىق ءىس قوزعالدى. ونىڭ ىشىندە 9 ءىس مەملەكەتتىك شەكارانى زاڭسىز كەسىپ ءوتۋ فاكتىسى بويىنشا، 9 ءىس زاڭسىز كوشى-قوندى ۇيىمداستىرۋ بويىنشا جانە 6 ءىس شەتەلدىك جۇمىس كۇشىن تارتۋ قاعيدالارىن بۇزۋ بويىنشا تىركەلگەن.

ءى ءى م قۇقىق بۇزۋشىلىقتاردى تالداۋ ناتيجەسىندە كوپ جاعدايدا زاڭ بۇزۋعا قازاقستان ازاماتتارىنىڭ وزدەرى ىقپال ەتەتىنىن اتاپ ءوتتى. نەگىزگى سەبەپ - زاڭسىز ءارى جىلدام پايدا تابۋعا ۇمتىلۋ.

ماسەلەن، شىمكەنت قالاسىندا، الماتى، جامبىل جانە شىعىس قازاقستان وبلىستارىندا شەتەلدىك جۇمىس كۇشىن زاڭسىز تارتۋ دەرەكتەرى بىرنەشە رەت تىركەلگەن. وسى فاكتىلەر بويىنشا قىلمىستىق كودەكستىڭ 395-بابى 1-بولىگى بويىنشا سوتقا دەيىنگى تەرگەپ-تەكسەرۋ باستالدى.

سونىمەن قاتار وڭىرلەردىڭ بىرىندە قازاقستان ازاماتى جالعان قۇجاتتار ارقىلى شەتەل ازاماتتارىن زاڭداستىرعانى انىقتالدى. بۇل دەرەك بويىنشا قىلمىستىق كودەكستىڭ 394-بابى نەگىزىندە تەرگەۋ جۇرگىزىلۋدە.

ءىس- شارا بارىسىندا ىزدەۋدە جۇرگەن 22 شەتەل ازاماتى ۇستالدى. اتاپ ايتقاندا، الماتى قالاسىندا، ماڭعىستاۋ، تۇركىستان جانە جامبىل وبلىستارىندا كورشى مەملەكەتتەر ىزدەستىرگەن ءتۇرلى قىلمىسقا قاتىسى بار ازاماتتار قولعا تۇسكەن.

قۇقىق قورعاۋ ورگاندارى كوشى-قون زاڭناماسىنىڭ بۇزىلۋىن انىقتاۋ جانە الدىن الۋ بويىنشا جۇمىستاردى جالعاستىرىپ جاتىر.