قازاقستاندا مۇگەدەكتىگى بار بالالارعا قانداي جاعداي جاسالعان
استانا. KAZINFORM - ەلىمىزدە 740 مىڭعا جۋىق مۇگەدەكتىگى بار ادامدار تۇرادى. ولاردىڭ 16 پايىزى - بالالار. «بۇگىن LIVE» باعدارلاماسىنىڭ بۇگىنگى سانىندا ەرەكشە ءبىلىم بەرۋدى قاجەت ەتەتىن بالالاردىڭ ماسەلەسى تالقىلاندى.
- وسىدان 3 جىل بۇرىن قالامىزدا ەرەكشە ءبىلىم بەرۋدى قاجەت ەتەتىن بالالارعا ارنالعان تەك 6 پسيحولوگيالىق-مەديتسينالىق-پەداگوگيكالىق كەڭەس بەرۋ ۇيىمى (پ م پ ك) جۇمىس ىستەسە، قازىر مۇنداي ورتالىقتار سانى ونعا دەيىن جەتتى. قازىر استانادا 18 جاسقا دەيىنگى ەرەكشە ءبىلىم بەرۋدى قاجەت ەتەتىن 500 مىڭنان استام بالا بار. سول بالالارعا 10 پ م پ ك جۇمىس ىستەيدى. بۇگىنگە دەيىن وسى پ م پ ك- لارعا 3 ايدان جارتى جىلعا دەيىن كەزەكتە تۇراتىن بولسا، قازىر ول كەزەك 1 كۇننەن ارى كەتسە، 1 ايعا دەيىن قىسقاردى، - دەيدى استانا قالالىق ءبىلىم باسقارماسىنىڭ باسشىسى.
قالالىق ءبىلىم باسقارماسى الداعى ۋاقىتتا ينكليۋزيانى قولداۋ كابينەتتەرىنىڭ سانىن كوبەيتۋدى جوسپارلاپ وتىر.
- ءبىزدىڭ كەلەسى قادامىمىز - ينكليۋزيانى قولداۋ كابينەتتەرىنىڭ سانىن كوبەيتۋ. وعان قوسا، ەڭ باستى ماقساتىمىز - شاعىن اۋدانداردا تۇراتىن بالالار ءۇشىن ءوزى تۇراتىن شاعىن اۋدانداعى مەكتەپتەردە دە جاعداي جاساۋ. قازىر قالامىزداعى 100 دەن استام مەكتەپ بولسا، ونىڭ 60 تان استامىندا وسىنداي ينكليۋزيانى قولداۋ كابينەتتەرى اشىلدى. جالپى قالاداعى ءبىلىم وشاقتارىنىڭ 95 پايىزىندا ينكليۋزياعا جاعداي جاسالعان. ءبىز بۇل جۇمىستاردى ءارى قاراي دا جالعاستىرامىز، - دەيدى قاسىمحان سەنعازىيەۆ.
باسقارما باسشىسى ءدال وسى سالادا مامان تاپشىلىعى بار ەكەنىن دە جاسىرمادى.
- ەندىگى ماسەلە - مامانداردى دايىنداۋ. قانداي ماماندار قاجەت؟ بىلىكتىلىگى قانداي؟ ولاردىڭ بىلىكتىلىگىن قالاي ارتتىرۋ كەرەك؟ دەگەن سياقتى ماسەلەلەردى قازىر قولعا الىپ، جۇمىس ىستەپ جاتىرمىز. ەڭ كوپ جەتىسپەيتىن ماماندار - دەفەكتولوگ، لوگوپەد، تيفلوپەداگوگتار. قالامىزعا ءدال وسىنداي 30 عا جۋىق مامان جەتىسپەيدى، - دەيدى ول.
ودان بولەك، ەلىمىزدە ەرەكشە بالالارعا كومەكتەسەتىن بالالاردى وڭالتۋ ورتالىقتارى دا جۇمىس ىستەيدى. ولار مۇگەدەكتىگى بار بالالارعا مەديتسينالىق قانا ەمەس، جان-جاقتى قولداۋ كورسەتەدى.
- ءبىزدىڭ ورتالىق تىكەلەي ەرەكشە بالالارمەن جۇمىس ىستەيدى. بىزدەن جىلىنا 4200 دەي ناۋقاس ەم الادى. ايىنا 300 دەي بالا ەمدەلەدى. ءبىز 3 باعىتتا جۇمىس ىستەيمىز. ول - پەداگوگيكالىق تۇزەتۋلەر، مەديتسينالىق كومەك. ونىڭ ىشىنە ءارتۇرلى فيزيوتەراپيا، دەنە شىنىقتىرۋ، مەديكامەنتوزدى تەراپيالار بار. جانە الەۋمەتتىك اداپتاتسيا باعىتتارىندا جۇمىس ىستەيمىز، - دەيدى ۇلتتىق بالالاردى وڭالتۋ ورتالىعى 2-پسيحونيەۆرولوگيالىق ءبولىمىنىڭ مەڭگەرۋشىسى.
ورتالىق ەرەكشە بالالاردى ەمدەۋ بارىسىندا زاماناۋي ءادىس-تاسىلدەردى قولداناتىنىن ايتادى.
- ءبىز شەتەلدەرگە ءارتۇرلى ءىس ساپارمەن جيى بارامىز. سالىستىرمالى تۇردە ءبىزدىڭ ەمدەۋ مەتوديكالارىمىز زاماناۋي دەپ ايتا الامىز. جاڭا ەمدەۋ تاسىلدەرىن وزىمىزگە ەنگىزەمىز. ءارتۇرلى سيفرلى، روبوتتالعان ادىستەمەلەردى ورتالىقتا قولدانىپ، ونى اۋماقتارعا تاراتۋعا ۇلەسىمىزدى قوسىپ جاتىرمىز، - دەيدى عالىمجان جىلقىبايەۆ.
ەسكە سالا كەتەيىك، 2025-جىلدىڭ باسىنان باستاپ الەۋمەتتىك قىزمەتتەر پورتالى ارقىلى مۇگەدەكتىگى بار ادامداردىڭ 211,6 مىڭ تاپسىرىسى ورىندالدى.
