قازاقستاندا ۇلتتىق قور قاراجاتىن باسقارۋ ساياساتى وزگەرەدى

ۇلتتىق بانك ءتوراعاسى تيمۋر سۇلەيمەنوۆ ۇلتتىق قور قاراجاتى قانداي جوبالارعا سالىنىپ جاتقانىن ءتۇسىندىردى، دەپ حابارلايدى Kazinform.

«بىزدە ەكى پورتفەل بار - تۇراقتاندىرۋ جانە جيناق پورتفەلى. تۇراقتاندىرۋ نەعۇرلىم ءوتىمدى سانالادى - 17 پايىز. ۇلتتىق قوردان شامامەن 10 ميلليارد تەڭگە تۇراقتاندىرۋ قورجىنىندا. بۇل قارجى جاعداي كۇرت ناشارلاعان جاعدايدا، ءوتىمدى اكتيۆتەردى تەز ارادا ساتىپ، بيۋجەتكە ءتيىستى ترانش ارقىلى كومەكتەسۋىمىز ءۇشىن قاجەت. قالعان 83 پايىز جوعارى كىرىس الۋعا باعىتتالعان ۇزاق مەرزىمدى جانە ورتا مەرزىمدى تەتىكتەر. ءبىز ۇيلەستىرگەن دەڭگەي 80/20 شاماسىندا بولدى. ياعني، 20 پايىزى اكسيالار مەن قارجى نارىعىنىڭ باسقا دا قۇرالدارىنا، ال 80 پايىز دامىعان ەلدەردىڭ وبليگاتسيالارىنا سالىندى. ولار وتە سەنىمدى، ءبىراق كوپ كىرىس بەرمەيدى»، - دەدى ت. سۇلەيمەنوۆ ءماجىلىستىڭ جالپى وتىرىسىندا دەپۋتاتتاردىڭ سۇراعىنا جاۋاپ بەرە وتىرىپ.

ۇ ب ءتوراعاسى ۇلتتىق قوردى باسقارۋ ساياساتى وزگەرەتىنىن مالىمدەدى.

«ۇلتتىق قوردى نەعۇرلىم پروگرەسسيۆتى جانە كوبىرەك كىرىسپەن باسقارۋ ءۇشىن بىزگە نە قاجەت؟ ءبىز تاسىلدەردى 80/20 دەڭگەيىنەن 60/40 قا وزگەرتەمىز. ياعني، 60 پايىز بۇرىنعىسىنشا ۇزاق مەرزىمدەگى سەنىمدى باعالى قاعازداردا قالادى، ءبىراق تابىسى تومەن. بۇل تۇرعىدا ءبىز 40 پايىزىن كىرىسى جوعارى اكتيۆتەرگە سالعىمىز كەلەدى»، - دەدى ت. سۇلەيمەنوۆ.

ول وسى ماسەلەدە تەڭگەرىمدى ساقتاپ، پايداعا الدانىپ قالماۋ ماڭىزدى ەكەنىن اتاپ ءوتتى.

«ويتكەنى ەگەر ءبىز شامادان تىس تابىستىڭ سوڭىنا ءتۇسىپ كەتسەك، پايداعا الدانىپ قالساق، 2025-2026-جىلدارى ۇزاق مەرزىمدى پەرسپەكتيۆادا ۇتىلىپ قالۋىمىز مۇمكىن»، - دەپ ءتۇسىندىردى ۇ ب باسشىسى.

مىسال رەتىندە ول نورۆەگيا قورىنداعى جاعدايدى كەلتىردى.

«بىلتىر بۇل قور ءوزىنىڭ قۇنىنىڭ شامامەن 20 پايىزىن جوعالتتى. سەبەبى ولار اگرەسسيۆتى ساياسات جۇرگىزدى. ولار اكتسيالارعا كوپ ينۆەستيتسيالادى جانە بىردەن ايتارلىقتاي ۇلكەن سومانى جوعالتتى. سوندىقتان ءبىز بۇل تەڭگەرىمدى بازالىق تۇردە، ياعني اكتيۆتەردى ۇيلەستىرۋدى وزگەرتۋ ارقىلى ىسكە اسىرامىز. بۇل ءوز كەزەگىندە بىزگە قوسىمشا جاۋاپكەرشىلىك جۇكتەيدى»، - دەدى تيمۋر سۇلەيمەنوۆ.